يا تكون زعيم بالتجارة يا بالدعارة أمير
ليه تكتب اللى الجميع يا بوسمره كارهينه ليه صعب تكتب لهم ما همه عايزينه
انت اللى دوزان غناك طول عمره نبض الناس .. ليه دوخك همهم .. ولا همه حاسينه
زمن العوالم بدل بالعولمة .. دينه !
بسكوته ؟ يا راجل عشان بسكوته ..... تخسر قيافتك وتصبح نمره فى النوته
ملقف نهيبه لكافة مخبرين الأرض .. والكل يشمت وجوه ف قلبهم زغروطة ..
تفرق بإيه لو ضياعك غربة أو موته !
خارج لحضن الناس بقلبك برى . .ساعة زمن واتهريت م الزغد والتشليق
ساحات طفولتك بقت غابة وحوش مهابيش .. لا عرفت تغطس ولا قادر على التحليق
قصيت خرابيشى .. قصقص ريشى كل دنئ!
أنا الحمار اللى ما بيفهمش بالعربى .. عافقين رقبتى بسبب حاجتى وحسب طلبى
عفن عقولكم معشش عته فى دماغى .. وضعف حيكم حلق قبل الغرق شنبى
وكل ما يخيب املكو تقولوا دا بسببى !
مضطر تشرب سجاير فى موسكو .. وإلا تقاوح بفودكا .. يا ديسكو
فإن لم تكن فعليك السلام .. تعيش لاجئا فى حماية اليونيسكو
فى موسكو نفوسكو رهينة بفلوسكو
ما فيش حد ندبك تكون فيها مفتى .. وتسهر تشخص عيوبها وتفتى
دى حالة استحالة وجمرة ندالة .. محال يطفى نار نارها العوالة الكليفتى .
فوفر نافوخك مسيرها ح تشتى !
ماء الحياء انسحب منه فبان جهله .. عشمان فى بكره انه يستناه على مهله
فضح الرجال والنسا ومزع الألبسه .. وفى الصباح فى المسا ح تقابله .. تستاهله
العقل له ناسه زى الجهل له أهله..
ما اكترها أحلامنا ياما أسهل الأفكار … الكل عارف وشايف الفرق ليل ونهار
اصبحنا مستهدفين من كل هب ودب وهمومنا صارت حمول ومحتاجين أنفار
والكل صاروا اساتذة وعقدة فى المنشار !
هو احنا يا صاحبى بينا تاريخ وتار بايت ... كا أما نتقابل تخربشنى بلسان فالت
من حقه بس اللى دمه سال يحاسبنى ... حتى ابنى مالوش يعيبنى والميزان فالت
ايه ذنبه من لم يمت يوم ما الرمم عامت

ليه اسمى فى حلق امك طعمه حنضل مر .. وان جابوا سيرتى فى حضرة حضرتك بتهر .
يا عم أنا شعرى متحصن بحب الناس .. لذا يفرى مطرح ما يسرى ف جتتك ويضر
طبع الأصيل م الجمال ما بيمرى غير فى الحر !
شاعر فى ظنه بأنه الشعر فوق رأس هو اللى يسكر بخمر الشعر أنفاسه
فوزنها مللى وقيراط من يوم ركب سيده .. وعشان رضا العمدة يفتل له شعور ناسه
عجيبه يا خلق جبر الشعر إحساسه!
ما عدتش مصدق إشارة المرور .. وبايت مآمن لفتحى سرور
مجالسة جرايدة بتنهش فى قلبك .. تغمى عينيك فى السواقى تدور
وناسى انها فوق قرونك يا تور !
كلكو ورثتوا حصانة سعد وهبة .. المراسلة والموالس والقفا والعرض لاهبل
كلتوا يا ما من ماعون ياما تف فيه .. خيبتوا ليه واللعبة ماعدتش صعبة !؟
عمر شجر الكره ما طرح المحبة!
من صغر سنه اتفظم ع الكدب والتدليس ... وأما لاشوه العساكر ادمن التكسيس
أصبح اسير علته متبرى من ملته... ملعون أبو جبلته - لو جده كان ايزوريس!
النيل فشل يغسله من طرطرة ابليس !
اللى خان المراكسية عشان تلمه الناصرية التقى ف عموا السادات حاجات مثال الوطنية
والشعوب يا صاحبى ما لهاش فى النوايا والنفوس .. طول ما فى بنوك الفلوس، التيوس رهنوا القضية
عملوا م الحرية حجة لجل ما يبيعوا الهوية
ليه اسمى وليك مفاتيح الإذاعة .. ليه شط النيل ولك رف البضاعة
يا للى عمرك تلحق الفرصة بشوكها .. قد يجوز البنك يضمن لك شفاعة
لما شعرك يبقى فى قبرك اشاعة!
حلوة وكانت فى صباها خليعة .. دلوقتى قطة لها كل الوقار ووديعة
يا للى رزقت القطط عمر بسبع ترواح .. ارزقها لجل النبى يارب بوجيعة
فطموها من ميت سنه هجرى ولسه رضيعة!
عودت نفسك تدارى ما جنته يديك لحد كفك ما تقنت كيف تخبى عليك
جاى النهاردة على خيبتك تلومالناس.. بس ف مرايتك جنايتك جمر جوه عينيك
دموع ندم م الألم كافرة بتلعن فيك !
الدنيا لفيتها عافية وصدفة واستعباط ... بيروت وباريس وموسكو وطنطا والعياط
شفت العجايب غرايب خلق وطبايع ... ما صادفت عجبة كما (البيومى) و(الخراط)!
النار فى باط حضرته ويقول لى ريحتك شياط!
بيفتى كأنه مسجل شريط ... طويل المدى فى فصاحة حويط
بيرطن يرص الكلام هو - هوه .. وسايق الهبل ع العبط مش عبيط
طراطيش ذكاوته تسمم محيط
تراعى حق الرياسة وحرمة الريس … تصبح مواطن جميل الطبع .. وكويس
بعض الأدب يجعلك رسمى أديب تأويل .. فى كل لجنة تشد الحيل - فتتكيس !
سكك السلامة - ندامة وسعرها رخيص ...
يا كاتب العصر يا بو الهيبة والشورى .. بعد المسلسل نلاقى رواية منشورة
وعمود سياسة وسهرات شبه عائلية .. ومسرحية بنجوم - بتكمل الصورة
يا هلترى ... النفس راضية وإلا مكسورة !
أهل الثقافة اللى انت يا بعيد منهم ... ساقوا الهيافة وصار العقل بيشينهم
من يوم ما شبطوا فى ديل الكاكى والقفاطين .. مرض الغرض ذلهم، وعمى العرض عينهم
واللى سلفهم تلف، خوفهم خلف دينهم
عصر الهيافة مسلسل روحنا يا ندامة .. نهار وليل لت عجن ورغى وتلامة
خير فى سلامة ، وسلامة عمره ما شاف خير .. فى وحل بحر الجهالة روحه عوامه
حتى تاريخ مصر صار تماخيخ فى دراما!
كوادر الأمن الثقافى الكمل الملهمين .. على نواصى الوطن لابدين ومتر ستأين
تكريم وتأبين جوايز مهرجة وفلوس .. تهين كرامة النفوس وتعلق النياشين
كوميديا عبثية بتشل الدموع فى العين
مثقفين مهزومين متجمعين كالقطط بياكلوا ويينكروا ومقسمينها خطط
وانت افتريت لما طولت بالهزيمة ايديك بالخوف هرست ف قلوبهم قرقشولك زلك
بكره عبط ينهشوك .. بالصدفة أو بالغلط !
العقل غايب لذا هرب الخيال منكم .. تراث نميمة قتل طيب النفوس بينكم
واللى بلعتوه صغار بتطفحوه شيبه.. شايفينها عيبة سواكم والعما عيبكم
بعتم سنين النضال ما سددت دينكم
اشعر من الجن بعض الإنس أحيانا .. تشوف بديع أو فؤاد الموتى صحيانا
وشوف ولاد الحكومة المشعروين خيالات .. خلفه زمن قحط رسم الدودة ثعبانا
وعين ابن اللئيمة الدفعة - قبطانا...
يا صاحب الهمة حلفتك تقول لى يا بيه .. إذا كل دول شعرا جرحى اللى دابحهم إيه؟
كل السلالم لفوق متلغمطة بالدم .. على انهى سلم نضيف انت طلعت عليه ؟
وحدك على القمة زى الرمة .. فرحان ليه !
من فين يا ماضى اشترى قطع غيار أداريك .زكدب اعدلك وابدلك ع الموضة بالسراميك
كافة بشر فرحانين بأيامهم الأولى .. غير شعرا كبرتهم صدفة فصغروا فيك
نفخت جيوبهم عيوبهم حملوها عليك !!
لو يوم ح تكبر يا صاحبى وتبقى فحل أديب .. علم لسانك يلالى بصورتك الأكاذيب
الناس بسيطة عبيطة نفسها تصدق .. انك يا أبو ودان طويلة كلت كبدة ديب
وف بطن امك عملت لأمتك اعاجيب !
مبروك مكافأة نهاية الخدمة يا شاعر .. عاوج رقبتك سقوط زى الصعود فاخر
لو باقى خيط من ندم كان دمعنا يهنيك .. لكن بحور الخجل نشفت على الآخر ..
الشعر طفل البراءة بيفسده التاجر
يا شاعر الغبرا حتى الشعر زعلته .. مع أن يا ما زمان دلعته وغزلته
خليته مسخه تسالى ف سهرة الأمرا - لابد يهرب مادام بالكدب مسخته!
طمعك ولد فار وعملك قطة فأكلته !
شعوب جهولة ويلزمها ملوك وشاهات يحطوا على فقرها من قهرهم طبقات
تضوى قصورها باسم الشعب وتلعلط فيتقنوا مثقفينها خدمة البشوات
يقتل فقيرها الندم حسرة على الخواجات !
بينى وبينكم سنين من فقرى ما نسيتهاش .. بينكم وبينى سجون قهرى اللى ما تفناش
سجانة كتبه دكاترة مخبرين شعراء .. بوشوش أليفة مخبية غيلان وحناش
بعتوا الوطن كاش وسكرتم بدمى بلاش !
الطين بيطرح بناتى هندى .. فيومى .. بلدى وبزويافاوى ارمنت أو رومى
إنسانى وطبيعى اختلاف الصنف والمرعى .. وانت لوحدك جينات طفرة - يا بيومى !
جبلة من صخرة كل ما تغرقى .. تعومى
يا رازق النملة قوتها فى حجر صوان ... ليه ضاقت الخية ع الرزقى وع الفنان
ذو العقل زاحف ورا فرافيت رغيف العيش والجحش متربع على القمة عمل سلطان
صايبة العما وكحله أمه العامشة شمشم زمان
يومتبقى ملعب بهلوان .. متحايز .. وبحاجة من كل هوجة ومهرجان فايز
يجوز ساعتها الست ترضى عليك .. وتلاقى اسمك فى كشوف الجوايز
ويمها يبقى الشرف زى الوطن - جايز !
من كتر ما الكدبة نفخت سمها فيها .. فيه ناس بالونات بتفحت قبرها ايديها
الشاعر اللى اتنفخ ذلة طلع بكاش .. قبضها كاش ومش عارف يخبيها
بالونات وعيل نفخها .. غباوته ح تصفيها !
اللى مضروب بالقديمة لما يصفع يختشى .. وانت راجع من غيطان العيبة شبعان منتشى
ليه تقول مغصوب وكان صعب الهروب .. وانت من يوم ذلتك حالك مشى
الشريف لو حتى جاعوا أولاده عمره ما يترشى !
شفت اللى رضعوا من لئيم الحبر .. بيزحفوا كالديدان فى الطينة شبر بشبر
سيدهم كسر نفسهم علشان يلمعهم .. كالأحذية فوق كراسى من تراب التبر
يهيسوا كزهور بلاستيك - زهزهه بلا عطر
كل اللسون الملسنة مقطوعة .. وعن الكلام اللى فيه الفايدة ممنوعة
عالى يا صمت الخرس زاعق بألف لسان .. ولا آهة من حر جمر الحق مسموعة
حر الكلام فيه حرام وأنا كبدى موجوعة
كان قبل تشكيل الوزارة ولد مرم .. أصبح فى غفلة من الليالى مهم
فتح على البهلى طالب بيه دراعاته .. من كل انجر غرف حتى ولو فيه سم
طبع السفنجة اللمامة م القمامة تلم
الشاعر لا خرس لا عمى هوه اللى حويط ... لو يدى الطرشة لزوبة العامشة وأبو النطيط
فى سوق العصر يا يخطف رزقه يا يموت بيه .. الشاطر هو اللى بيعمل الأيام دى عبيط
ملعون الخيرة لو تبقى يا زعيط يا معيط !
صاحبى اللى مغرم بأمن الدولة كان شاعر .. رضيت عليه الحكومة - غوازى وعساكر
من بطن امه ربايته الفقر لها أحكام .. حين قلبت الموجه صار صايم وكان فاطر
تبع هى النفس مالقاش للعطش آخر ..

يا صاحب الفكر اليسارى السليم .. على عتبة القبر جاى تدفن جديد فى قديم
انزع يا راجل رقبتك من لجام الخوف .. وانفد بجلدك م التاريخ الهديم
مادام حكمها العسس فمسيرها للتسليم
الهلف ما قراش قصيدة وصار خبير فى الشعر .. والبأف شاف الجريدة سفك بحور الحبر
يا سباكين الكلام يا طرح صوب الأمن .. واستاذكم النص امى كان لوا فى السر‍‍‍‍‍‍‍‍‍‍‍‍‍‍‍‍‍‍‍‍‍‍‍‍!
بفضله بقت الثقافة حمار لكل جعر !
خدت إيه يا للى انت بايع من زمان .. سبع والا ضبع - والا الألعبان
لبسك طرحة وعملك م الغوانى .. ركبك معزة وقال لك دى حصان
واللى رضا الذل سكره لو يفوق غلبان
فارشة الغباوة الملاية وابتدت تردح جمعت حروف الهجاء م الأوبرا - للمدبح
واربعت ع المنصة ملكت الميكرفون .. والجهل ع الكرسى يلقى الفرصة فيرحرح
عيان بينكح فى ميت ظنه ح يفتح !
ست ف مقامها جميع الخلق خدامها .... شمال/يمين كلهم كومبارس أفلامها
كباية وزبيبة بينه وشيبة زمارة .. كتبة قصايد بتعزف هى انغامها ...
ومين انت يا فسل تلمس طرف اكمامها !
اللى استحق الرضا السامى خد النياشين .. قانون وبالمسطرة شرعى يسار ويمين
ياللى بتستنى فضلة خير من الفضلات.. اغسل بشال الكرامة عتبة البال - طين
طيورها على شكلها ف عشق العوج واقعين ..
اراجوز طلع ع المنصة ف ابهة وزيطة خطف القلوب بهلوان ومشى على الحيطة
قلب المدينة ولعب بينا التلات ورقات ... رطن بلا فرنجى قال ع الكنبة (كراويته)!
قلعنا عمة جدودنا لبسنا برنيطة !
اللعبة يا جعر خلصت صفروا الحكام .. ,اللجنة بتت ونقت كافة الأحكام
وحدك بتجرى لوحدك فى سبق فردى .. ما تفوق يا فندى دى سكرة ميكرفون ولجام
وكاس ودورى اختصاص الأمن والإعلام ..
ماتت مشاعرنا وتحنطنا فى الأخبار .. أصبحنا مثل اليرقى فى ملأ بلا أشجار
الناس تموت عينى عينك والبيوت تنهد .. واحنا على المجد نتهايف بطبلة وطار
وعبط نلف الوطن فى كفن من الأشعار ..
مبخت هبلنا بجوع أهله وذلتهم .. وحشا جيوبه بغنا عيوبهم وسيرتهم
ولما ربه عطاه وفتل له فى حباله .. حين جم على باله خبى العيش ما قوتهم
للشعرا شياطين بتكشف قصد عورتهم
بعض البشر ينسوا الحذر والهيلمان أول ما عضمة تفك عقدة اللسان
كما ضى تحت المى لمسه وانطفى .. واللى اختفى بالكدب بان يا العبان
يا جبلة طول عمرها عايشة بعمى الألوان
ح اشرط عليك يا صديق والشرط نور البداية .. لو راح تحملنى همك كون عليه ويايا
خطوتنا مع بعض حمايتنا على السكة .. واحس نبضك، فقط - لو كنت قلبك معايا
شكل النهاية بيظهر فى نسيج الرواية !
فن الزجل له جبايره وله خرابيشه.. حتى ولو سد بابه أو قفل شيشه
ياللى افتكرت بدعا الوالدين تكون زجال .. دمك يجبن ولا ح تطول قشاقيشة ...
الفن مش هلفطة ح تعيش بتحاشيشة
من كتر شعره ما بغبغ بالبشر والطين .. حسبوه يسارى وقلبه جوه صدره يمين
كم ياما فلح وصعايدة اتونسوا بحسه .. وضاعوا اسرى لأحلام فاتها فى الزنازين
وعاش على حسها يسكر مع السلاطين!
من أى مهرب تفر .. ولفين تآمن تزوغ ؟ .. وانت بتهم التحدى للخرس .. مدبوغ
كافة عيون الحرس أرضية فضائية راصدة غناك م البداية وحكمها مدموغ !!
فرصة وراح يقطعوا لسانك من اللغلوغ!
يا كتابين السياسة بعقل بوجى وطمطم الحمد لله مازلنا بننفعل ونطن طن
حرام تبيعوا اللى فاضل بكره ح نروح فين وسموم خياباتكو خلت أرضكو .. تعطن..
ما عدش يا خلق غير فى جتتنا نستوطن
كما الغيلان فى الجرايد يسموا لقمة بعض .. وفى الجنازات بيبكوا من الندم لعى بعض
يا مقسم الرزق ليه قسمت أقلامهم .. ما بين يمينى ويسارى وهمه خلقة بعض
وبيسألونى اليتامى له تضيع الأرض!

يا عم يا للى خيالك واطى على قدك .. وعامل بجبنك مسيح علشان تدير خدك
الثورة يا ابنى نقس وللوطن ناسه .. كانوا عطر انفاسه وخنقهم عفار هدك
لولاه بيت المال ما كنتش زدت عن حدك
عمان ترقع توب نظام مليان رقع .. وبتدعكه برابسوا الخجل يزداد بقع
وعشان كد مخاصمك ميزان المشاعر .. نسيت يا شاعر أن والدك كان جدع !
مهما سندت الهديم على دماغاك يقع !
نطيتها والا زحفت يا فسل على قدام .. انت فى عرف السيادة امعه وخدام
فى السركى كاركى مسجل تحت بند المطايا .. حتى ولو بالعطايا ح تفتى فى الإسلام
هذى شريعة عساكر اصبحوا حكام
البشر مليون نمط مش طينة واحدة اللى سايقين العبط .. غير الصعايدة
واللى راكب ع الحمير .. غير اللى ماشى ... إلا فى بعض الحواشى مصطفى بكرى وسعده
ألف ندوة بألف غدوة .. يا ريت بفايدة ؟!
يا معذب روحك وهاريها بهموم الكون .. ما (تاك ات ايزى) وتعقلها وتفوق للون
امريكا قشت حين غشت كل الأوراق .. جمعتنا نقمع لها بامية وفى التلفزيون
نحلم بالكوثر نستحلب فص الأفيون !
ما تقولش ح اعمل ولا اترك قول تاريخك ايه !شايفك كما انت ما تكدبشى عليه با يبيه
إذ كلنا فى الهموم كنا هموم على بعض عينى فى عينك يا ريت عيبى تقول لى عليه!
الحق ليك عندى اصارحك باللى عنى خافيه !
مين اللى سلب الشرف منك وإلا قال لكش ... حلمك صبح ممسحة والعصر ما نصفكش
ايه اللى فاضل تبادل بيه على بكره والكل هبشك وفاتك رمة ما استنى كش
عيان بنكح فى ميت شفته ما ذلكش
الواد دا ماله بيتعملعن عامل شاطر شغال قلق من زمان بيعكر الخاطر
كان ودون مخبر وصار اواكس متصيت يا عم طلع بطاقتك هات من الآخر
كشفت ياما الورق بس انت مش فاكر؟!
بيدلعوك - انت سيد الناس وده حقك بجايزة تغسل مرارة الغل بقك
أو رحلة جايز تسامح كدبك النسوان .. وليه يافنان سيوف العجز بتشقلك!
من عهد لعب العيال جشع الخيال حارقك !
شنب عليه صقر لا الغورى ولا قلاوون من خلف نضارته راقمنى بست عيون
قدامه صورتى وزنزانتى وأيامى .. وبينكر انى على وتر الوطن موزون
وأما سمع شعرى قال لك ده ولد مجنون
أولاد حكومة العساكر من يمين ويسار .. المربوطين للمدار منذ ابتداء الحصار
من مخبرين الكتابة الدوبيا والكوبيا ... بيتاجروا باسم الوطن والعقدة فى المنشار
جن البقر يا غجر وح يفضح الأسرار!
ما أخدعك يا عديم الأصل فى الزفة .. عمال بتنفخ بالونات الأدب ... عفة ..
واللى يسيب تربطه واللى اتزبط ترميه .. وبوش بومة ف قناع بلبل بتتخفى
بيضه وحجر لعبتك وديتك .. تفه !
بتفى بما تجهله فى اللى ما تعرفهوش .. ساعات خواجه ساعات عمة فقى وطربوش
وبر الغلابة اتنحل من كتبر نتفك فيه واكلت مال النبى شرعا وما رحمتوش
واللى اختشوا ماتوا حين افتى اللى ما خجلوش
من تواريخ القهر وذلة يا حر اتعلم .. اللى يدوس على طرفك لبه واوعى تسلم
أعلى ما فيهم بالغ صرمة قديمة - وطالع عز الضهر يكركع كدبه وقلبه مبلم
ذل النفس يخلى الروح فى الشمس .. تضلم!
شعر العروبة ماهوش محتاج يحط عقال .. ولا قصايد الوطن يلزمها لاشة وشال
يا أبو شعر ماسخ رمادى بيعجب النسوان امتى ح تلمس جمرة الفن المحال ؟!
خلى الخيال خيال .. يمكن ترد سؤال ؟
الهلف دا اللى انت متتربس وساكن فيه فى كل مجلس يهطرس لك هبل تحكيه
بعض البغال فى عقولها باضت العصافير وكل جحر وإله .. نملة تبرطع فيه !
واكم مواهب رهينه بالغباء تحميه !
أنا مش حقود ع الحمل دولم ولا حظوظهم ولا على اللى كدب عمدا يعززهم
أنا أرقى .. انى أبقى .. ابطى وعشتى للريح لكنه قلبى جريح من لدع بزابيزهم
ولأن عمرى وقع غصب ف أرابيزهم !
الكاتب اللى بدل بالبرش حجر الوزير .. طلعت له خرابيش تجرح غل .. ضل الطير
ربوه يشوف الشرف علة .. وترف غموه ضموه بمحض اختياره خدوه رئيس تحرير!
لحد امتى يا شعرى ح تنبش الأضابير
ولا انت صنع الطبيعة ولا انت صنع الله .. نفضك شيطان من فراكة حكة الحله..
فى عشق ذاتك جرحت الأهل والأصحاب . حتى اللى وهبك مناب أولاده ما خلا
جدك فعلها زنا ومن غير وضوء صلى
لوكان طلع من أبوك .. كان شئ طلع منك .. يا للى انت فى عز عزه كنت ابن امك
صبى لئيم فوريجى متدارى فى جرافته .. وكدبهم فى الكتابة جينات تقيل دمك ..
منها ومنه سئيل باهت زجل ... فنك !
صبح الأدب سبوبة للنتاشه والبكاش .. كل بينخع ويوصف دنيا ما عشهاش
يا صاحبى غير إلى قلبك حسه ما تحكى .. لو ناوى تبنى بما معناه ما راح تعلاش
وإذا غاوى تكدب .. حتكتب .. بس ما ح نقراش!

ياما ف ليالى الجفا كن حضننا يضمك .. بيتنا واحة فى صحرا القاهرة تلمك
الموجه عليك ووافق البحر مجاديفك .. فضاع حنان ريفك اللى كان عسل فمك
أمك نسيت اسمها .. ايه بعد ح يهمك !
واقف فى مقلب زبالة .ز يقول لنا: اخييه شامم وشايف ويسألنا قرفتم ليه ؟!
الصبر حرق الكرار واللى اختشوا ماتوا .. يا أطرش فى زفه عموك .. ح نلوموك على إيه؟
حسابنا وح ندفعه بالدم .. يا بان الإيه !!
عديم همة ماسخ رباية عبيد .. لا فلاحة امه ولا أبوه صعيد
ما يكرهشى قد الشجر حين يزهر .. سوى أن شاعر يقول شئ جديد!
وقالوا لى سيد .. ومولود فى عيد !
جعبة مهولة تبان محشية بالأسرار مع أنه كالبحر بعد ما تسقط الأمطار
طيب مؤدب قوى ولا مية فى قزازة أرومة هزهازة خايفة مزازة الأفكار
يا عم بعض الحزاز لذاذة – يا جيار
ما كفاكش تشحت على شطوط مدامعى كمان جاى تشمت فى حرقة مواجعي
عامل لى بطل .. وانت فارش قصايدك بضاعة فى سوق الحمير .. يا برادعي
عديم ذمة لكم يبيع أمه شرعي
الشعر أصبح بديل للخمرة والتوهان من خوف يصير عهدة بايرة وخدمة للسلطان
الخيرة حيرة فى ليل من غير قمر ولا فجر باشرب همومى واخبى خوف لضعفى يبان
فضلت أكون أهبل ولا أكون صبى سجان..
فقير موهبة ضلة غامق سئيل بيكتب روايات طويلة لإنه هلف طويل
ولما قالوا له الأدب إنسانية بقى يربى شعره عشان يبقى دليل
وغيط بوريطبل .. يخضر نجيل
لما ضميرها الفنانة بقى على تلفون صبح اللى منه بنعانى زى الأفيون
فص الألم نستحلب فيه حتى سلطنا وبطلنا قاعد بيفاصل ياخذ النولون
أفهم بقى سر الخيبة وصحصح لللون
قاعد على القهوة متقمع وصابغ شعره بيفرقع البمب واحنا مصدقين معره
مسكين ما شافش اللى بيدهوس حرم بيته صدقتوا حواديته امتى ح تكشفوا ستره
فتوة والا خرع مغلوب على أمره
زمان زمان كانت القراية بتسعدك تفتح عليك .. تملا عينيك .. وتسيدك
ليه كل شيء .. كلمة وخبر واللى انت سحره حررك – مستعبدك
العقل مات .. وأبو الندالة بالجهالة سيدك
اللون الأحمر جمره يحيد كل الألوان .. وانت بكيفك ياما اخترته موضه زمان
دلوقتى شايفه بيشوش لوحة ألوانك حين خنت زمانك ببراءة قدر الإمكان ..
ما تغسل دمى من على كفك .. يا فنان
نساوين غلابة ما فيش رجاله فايقه لها تقتلها لمسه وهمسه شوق بتهبلها
لا حول ولا قوة .. مخك يا بلد ضارب طالعين نحارب وخلينا .. انقطع حيلها
الحمل كان كدبة .. أصل عويلها حبلها
حيرنى مبدع أريب أديب وابن حكومة إتربى على عز أمن الدولة بالشومة
رعب الديانة اللى مصمص بيه عظام الحق خلاه يقول : لأ .. دايب رقه ونعومة
إلحقنى دى القافية هربت منى يا ابو دومة
كون أى حاجة فى عالم كرنفال ألوان انخع كما تحب غنى ما تشتهى ألحان
حاجة ما فيش غيرها أس اللعنة والتجريم إنك تظل الشيوعى الحر والإنسان
يحلو دمك يا شاعر زلفى للسلطان
عشق الوطن يوهبنى حق الغضب يعطينى شرف الاحتجاج والشغب
لما العقول الرزينة تهجر الساحة .. تسود تفاهة القباحة بفن قلة أدب
ويبقى بكره احتمال خيبة فى غاية العجب
باعته الجناين لقلبك فى الصباح وردة ليالى .. سهر الشجر ينقشها باللون ده
هذا دليل أن روحك خالية م الأمراض ومازال على نبض شعرك فيه حجر يندى ..
إوعى تشوف صورتك انت بعين ده أو عين ده
من يوم خربتم وعشتم تخربوا ع الكل ياللى ارتضيتوا عشان اللقمة عيش الذل
فى السوق وع الشاشة سراً أو علن أندال وآخر جمال فى الصور والهيئة زى الفل
قدر البدايات نهايات م العفن بتطل
بضايعكم البايرة قادرين لسه تبيعوها على قد ما ف قلبكم أطماع .. تحلوها
وبقد ما بتهتفوا هانت عليكم .. مصر يا نفاية العصر جالكم عين تعروها
والجتة ع الموجة عايمة وبرضه تخفوها
أنا مش بياع جوافة طول عمرى تاجر خضار فى ثقافة الهيافة أنا صرت .. المستشار
موهبتى كان شديدة من أول مسرحية شفت القطط عفية على طول عملت فار
وبقيت وحيد زمانى فى السيما .. وأنا الحمار
حتى القراية فى عصر الناصبين مشروع ومش مهمة الحكاية لا شكل ولا موضوع
بدل عبايته يجبة .. وقلوظ العمة .. دى أمه خمه .. جهولة .. مخها مقموع
والكل ح يبيض ويقبض – باشا أو جربوع
يا كريم العنصرين حلمك علينا التاريخ الحى مات ما بين ايدينا
إيه بقى معنى الحواديت القديمة قيمة البدايات فى ميزان ما انتهينا
مش أقولك .. حسنى تجرى تصحى مينا
الكل براويز لسيادتك سته فى تسعة ياللى ما ضيعتش وقتك زاحف تسعى
كل الفنون طبلة تدندن دقة زارك والك ينفخ .. ليه نارك باردة وخسعة
يوماتى بتقيف بدلة .. وتطلع واسعة
من حق من بعلها مخبر تكون مخبرة تستر معاه المعايب .. خافية أو ظاهرة
وبنطة على حبل غيره تصير رئيس تحرير معاه تزق المسيرة بكل همة لورا
واللى رخيص من دناوته تزيد غلاوته مرة
سارحة النميمة فى ليل الفنانين بالعيب لا عاد لخبرة مكانة ولا احترام للشيب
المخبرين افتروا .. وبقى الشرف عيرة .. واللى كتاباته مرض .. هو اللى عامل طبيب
حتى الفشنك اللى يروش قد لعله .. يصيب
أول ما فزعت أمريكا صاحبنا قتله الفزع إتوضى قلوظ عمامته وربى دقن الورع
وعلى المنابر طلع يهدى لسبيل الله .. وهو سكران بيفتى فى الأصول والبدع
لذا حالنا باقى على حاله بذل الجدع
عن المعسكر وأحكامهم
شعوب طويلة وعريضة الجهل حاكمها دهسها كعب البيادة مسخ معالمها
يا من خلقت البشر بين الشيطان والملاك وكان ليه بسكك الهلاك تغوى مقاديمها
وليه رهيب قوتك ماهلكش ظالمها

مرة اسألوا نفسكم ليه يا غجر عايشين خلقوك رب البشر ولكم عيون شايفين
والعمى بيحسسوا والأخرس اتكلم .. والجحش متعلم ما يعملش الغلط نوبتين
وانتم عقول من زلط أعمى وقلوب من طين
عمانى ؟ يمنى ؟ .. بدون ؟ والا انت سودانى ؟ كويتى ؟ إماراتى ؟ تونسى والا موريتانى ؟
جتكو البلاوى قرفتونا عقال ولسان لا سعودى طايق عراقى ولا طايقه لبنانى
والجهل حزه ف رقابكو شعر ربانى
قال لك / تصعد .. ح اصعد وان شتمت ح اسب ان كنت لابس ملك انا زعيم .. وباقب
والنار ولا العار وصية أمر تكليفى .. فاختار لنفسك بسيفى أى موته تحب
ورث القبايل جهول .. جعل العقول فى العب
حبوب نكد فى الصباح وحقن نكد فى المسا وهو ضارب طبنجة وصحته كويسة
ياللي خلقت البقر نتغمى فى سواقى يا تلم أشلائى غل يا تسخطه خنفسه
طلعنا م المعمعة فى عزه بدون البسه
حاربنا دم وعرق من أجل ما ننتهيش يوم ما رفضنا هزيمة قبلتها يا شاويش
قلت لنا سكة سلامة ح تشبعوا حرية واتاريها حرب الندامة لجل بص نعيش
وحرب لجل الوطن غير حرب ع القراقيش
القوة مهما افترت لازما يجيها اليوم تبكى بدموع الندم قهرا تجافى النوم
ياللى انت سطوة مهولة وخطوة مهبولة على سكة مجهولة قلبك م الأمان محروم
ملاح فى بحر العدم على موج هوان بيعوم
اللبوه عملوا لها حفلة يحتفوا بيها أكمه سيدنا الأسد غلبة الحمار فيها
سفحوا عرقهم وقعلوا ف مدحها تريتيز حتى العزيز بط نفسه تحت رجليها
طق الشرف م القرف وحاميها حراميها
جربت كل الوسايل ليه ما رديت ليه ؟ حتى (الموبايل) ما طمنى – طب اعمل ايه ؟
لو كنت فاكرنى لجلن مصلحة رايدك ملعونة أبوها المصالح – قلبى دست عليه
دا عيش وملح اللى بيقصقص جناحى يا بيه
هذا الزعيم كلما اتبسم يبكينى وده باشوفه ف ملابسه الرسمى بكينى
ود عينه لو جت فى عينى يذلنى الإحساس بأننا ناس بقر .. من (فعل) تهجينى
يا مين عساه من شرف رؤياه .. ينجينى
دوقوا مرارة الهزيمة يا جبارين الأمس يا ما سقيتوا البشر ذل انكسار النفس
ايديكم المصبوغين من دم أطفالنا بترتعش م الهلع مشلولة عجز ويأس
للمفترى يوم أكيد يشربها نفس الكأس
شعبك نصيبك وقدرك ان تشيل همه غموه بيهتف لمين هزمه ومين خمه
وح تنقمص اوح ترضى آخرتك سودا التهمة موجودة فى رقابك علقوا دمه
جاع العويل باع شكك ع النوتة ( .. ) أمه
فى كل يوم يحرقوا دمك ولا بتفهمش ان اللى حطك فى قفص اللقمة ما حبكش
نتف ريشات عقلكك العصفور فمات قلبك تفرق فى إيه لو رئيس ملهم تكون او جحش
وف حضن أمك ممدد والا جدوه النعش
يا صاحبة العصمة إيه فاضل ومتخبى الأمر طول عمره ملك إيديك وإيه ذنبى ؟
أنا لا ركبت الحمير ولا لبست الحرير وكافى شرى بخيرك – خنجره ف جنبى
يكفينى ان الوطن ما ها جرش من قلبى
بعض التكاذب بدونه الأمر ما يمشيش الكدب أصبح خميرة وريق لكسب العيش
ظنك ملكت الأمور حواليك بتبنى السور والكل راح ينتفوك لو يوم طلع لك ريش
اعمى البصيرة عيونه من الغباء شيش بيش
يا هلترى الدنيا مرهونة بإرادة الست لجلن يدور العجل من كارو لأنترنيت
أول ما تظهر مرة فى وسط رجالة تهبل الحالة واخيبنا ف امورنا يبت
وبرضه من غير نسا تلقى الرجال بتعت
طول عمرها جبلتك ولاده مش وش فقر وليه خصيب بذرتك رنخ فى طين القهر
طميك صبح ليه يبيس نهرك تعيس المياه وانتى اللى كان فطرتك صنع الحياة فى القبر
وكنتى قبل الحضارة للضمير الفجر
يا عم ما تتحمقشي اهدا وخليك ملاك عمرك عديم الملامح خلقتك فى قفاك
دم البكارة على حجارة الشوارع سيل وعملت راية جدودك ممسحة لعداك
الخير ييجى لها منين وانت الكبير (عكاك)
هذا الذى ع الفطار روق بدم شهيد وخرج على أمته لابس هدوم العيد
من بعد ما جاب درفها الأرض يدعى لها ويصلى للبنك يستغفر لقرض جديد
غراب هدم عشه ومزقطط بقفصه سعيد
يا عمرو موسى يجوز لك ربع ميت بوسة ولو ان فى القلب عضت ربع وسوسة
مخوفانى قوى على توبك الزاهى .. اللى الوطن شافه شاهى ف لحظة منحوسة
فرح عروسة فى دماغها سوسه ممسوسة
حتى المطر يوم ما تشتي لك بيتأخر وان شق قلبك حنين للشمس بتمطير
ايه اللى بدل سماحك شوك يأرض النيل واحنا اللى عشنا بجميل طبعك بنتمنظر
سيبى لنا م الحلم خير .. يا مصر يتفسر
ضاقت بنا مصر يوم شاويشها ما حكمها قلب مسار الطابور للخلف وشكمها
قطعت نفس والقفص ضاقت سراديبه
عشان ركب عيبه مهرة فخنقه لجامها
حسرة على شعوب غجر بين الأمم انتيكة زعمائها كهنة متاحف لابسة مزيكا
عاملين فتوات علينا وهمه سقط متاع روبابيكا – على شخطة – قطة ف حضن أمريكا
ناعمين كسرا وعمر فوق بورسلين سيراميكا ..
واجب عليك الخجل يا عجوز سليل اوزيريس فات الأوان تتغسل فى النيل من التدليس
فضلت تركب وتفضل بردعة ولجام .. خدام معاوية شاويش أمره فى إيد ابليس
ملعونة ابوها الجراية السرقة من محابيس
غلبان وهايف خطف من إيد سيادتك جنيه وعمل عليك فهلوى وذلته فى عينيه
لكن انت لما تروح بص فى مرايتك واسألها صورتك تصارحك يا سعادة البيه
ما محترم يا برم، مضروب صرم ، كده ليه ؟
طالع متقمع ع الخلق ملمع صابغ شعرك ومبدل وشك من غشك ومخبى مشاعرك
وحداك قدرة تغشنا وعينيك فى عنينا تقلع فينا .. ولكن اغانينا بتفحت قبرك
غليطة ذل قديمة وخلطة عزة ح تقطع دابرك
على فين يا راكب ضهورنا مدلدل الرجلين واخد فى وشك براحتك قول لى رايح فين ؟
ارحمنا .. حتى الحمير ساعات تعوز ترتاح واحنا الركوبة اللى مركوبة يسار ويمين
قمصنا والا رقصنا ، ودانك معمولين من طين
تاهت مسالكها يوم جفت مداركها بكل أحزانى باتحداك – ماح تدركها
سألت صاحب نظر / عزوة / وجاه محسوب قال لى : الفراخ ذلها بتحلم يبيض ديكها
واكم دواجن شعوب .. الخوف ملبكها
فى كل يغمة الحدادى غربة آخر زوق فيه مغنطيس عبقرى بيشدهم على فوق
يعومون على المية خفة يبلبطون فى النفط وان يحكم القحط أمره .. يقرقشوا المحروق
فى كل نكسه لهم على كل وكسة حقوق
مع الأسف من قديم هذا الوطن نساى لا مستفيد م اللى فات ولا أكيد م اللى جاى
كأنه فار للتجارب سلسلوا رقبته يرهن بدايته لنهايته بنص كنكة شاى
والشعب ده مات فى حبه ؟ طب وعاش ازاى ؟
لو كنت حاسب حساب فيه حد ح يحاسبك لم كنت تعمل ولا تقول غير ما بيناسبك
خدعوك جميع اللى عدموا العزة غنوا عليك عملوك صنم للغباوة وسبحوا بإسمك
عزوة ندم من عدم فى الوهم بتقاسمك
عربيات اللادا بتخلط ما بين الإشارات مكسورة حزينة عشان لاسطى أحمد مات
قتله اللحم الأبيض حين بص لفوق .. العشق الكداب توه قلبه ما بين المسافات
لحد ما هرسه الغل الطبقى تحت العجلات
ح تعمل إيه لو صحى ناصر وقابلته وحبكت الواقعة واضطريت وعاتبته
ح تقول له حسابنى ع اللى سرقته من عمرى والا ح تعزف ندم خيبتك على خيبته ؟
وانت اللى خواف ان توافق كدبة – صدقته

لو .. لسه ما شبعتوا ( بز ) ابنى يرضعكو وان كنتو ما فرحتوا زماميره تدلعكو
واذا لسه فيكم رمق للاعتراض دوغرى جيش بأمرى – وأنا ف قبرى – يركعكو
دانا اللى شغلعكو حبه ورعبه ربعكو
مالكش تسأل اذا ضرب النفير والبوق زى القدر كالمطر فرمان صدر من فوق
فى الصنف كله انتباه للموت نضاف لا معين ما طين وحاطين رقابنا فى اللجام والطوق
ولا الحمير – فى طوابير الأدب – والزوق
لما انكسر خيلها دلاديلها اللى حكموها واتحالفوا ويا الشيطان ع اللقمة ذلوها
يسارها سلم راياته الدايبة ليمينها حتى النسا خوف يشيلوا العيبة مارسوها
الكل ساق الحداثة حجة وباعوها ..
فى دولة الأمن الدولة هو الأساس هذى الحقيقة الأليمة ارحم من الوسواس
يعكم رقابها كوادر .. فكر وعساكر تبقى النعم للخدم ولمن خدم بحماس
يا للى انت عقلك فى راسك بعت ليه الراس
تجنبا للخجل أرضيت جميع لاطراف وتحسبا م الهبل بقيت غبى وخواف
وبين الخجل والهبل ضاع الدليل منك القاضى شطب القضية لا مين درى ولا شاف
نشفت عروق الأمل يوم حكمت الأنصاف
على ركبك ازحف يا أمينها فى يمينها وطاطي وفق ما بين دم الشهداء والسقف الواطي
كان مالك بالاشتراكية وقرف الدهماء طول عمره مقامك مترستأ والريح بيواتى
والماضى حسبته حسب وقته ع الظروف الذاتى ..
أهل الصعيد صاروا نكته ف قعدة حشاشة والفلاحين اتلغوا الا على الشاشة
يوم حل عصر البنوك صبح العساكر ملوك فبقى المثقف مراسلة لأى أو مباشي
بالماشة عمالها سهروا يرصوا للباشا
آخرتكو هى الفناء بالسيف يا بالنبوت دا شرع رب العساكر صاحب الملكوت
واهبها لجنوده من نيلها إلى فراتها آخر حدوده ووعوده وأول الجبروت
ما دمتوا سلمتوا ليهوده رغيف القوت
الخلق متبعترين ما بين رصيف ورصيف متعترين شرق غرب ما بين رغيف ورغيف
الأزمة ضاربة الجميع على النافوخ جزمه ومالهش لازمه الشرف ماعادش شريف
ضل الشاويش المخيف خلا الأمل تخاريف..
ضاحك فى وشك وغله بيكوى مصارينه حالف يذلك بحجة خوفه على دينه
هذا الشحيح العواطف لدعته .. والقبر كافة ملوك البنوك والنفط كارهينه
وطول ما ضامن عروشهم همه رايدينه
الحمد لله لا هيناهم ولا اتهنا مشينا سكك الندامة ياما ماخونا
وخايب بلاده أكيد ، خايب بلاد الناس أما اللى راضع من أمه ما تفسدوش إنه
ما تخدعوش طلبة لابشنه ولا رنه
للعيش وللملح فضل خجلت أفضحكم
الخيبة لامه التمليه على الألاضيش بمب الفضايح يفرقع بالونات ويطيش
وياللى عدمت الخجل .. يا عقدة وشنيطة إتدارى ورا حيطة من عارك ورد الشيش
الناس ماهياش عبيطة ان ساقت التطنيش
أصبحت
نائب وصار لك فى الطبيخ نايب فاغرف يا أبو ( اللهم ) واعزف لحنك الخايب
رقصت ع السلك ترضى الست والسلطان لو للرجال فى الحبل كم كنت .. كام جايب
شوبش يا أهل السياسة حضوركم الغايب
يا مصر ليه افتريت وعايز يكون لك صوت علشان تشارك الحكومة الحكم يا عكروت
ما أنت بطول التاريخ بتحيكها .. وتدارى منذ الملك خوفو وأنت صامولة الملكوت
يكفيك خصى وإلا جارية تمسكك نبوت
بنى له قلعة وعلاها سبع أدوار ووقف على سطحها مآمن بكل فخار زمن الفزع م الهلع بيشرخ الجدران لكن الأساس الخرع يكمل الإنهيار
حكمة زمن ما التفت لحمار سوى مندار
أنا قلتها كلمة وأما أحكى ما أتنيش نفذ وبعدين تظلم وانكتم يا شاويش
يا باشا ما احناش عساكر داحنا ملكية اخرس جميعكم جوارى فى حريم الجيش
لو حر ليه عشت عبد ذليل رغيف العيش
بيقولوا قدسك .. وقدسى م العطش والجوع هجرها نبض الحياة – الشرعى والممنوع
خضنا بحار النضال عاطل على باطل كداب يماطل فى نورى ضحك على جربوع
وأنا اللى شايل الذنوب وحدى وأنا الموجوع
من مرج برج العرب لمغانى شرم الشيخ والجنة متعة بشر صدفة قدر وتاريخ
وارثينها شرعى غنيمة قهر وهزيمة فى حروب فخيمة تفرقع للسلام صواريخ
والسلم والحرب بمبه خياره او بطيخ
سرحان بولينياب عمل حفلة لتعاليبو سهرة وعزومة وخمرة من عنب ديبه
تعاليبو آمن عشم ابليس فى لاظوغلى خسر نصيبه أما عفقه من لباليبه
واللى الطمع عيبه ما فى حساب لملاعيبه
بالأمس أسكرتنا من خمرة العمال وانت موالس مع المخبر وصاحب المال
حريف يسارى حليف قرارى .. يميمن بتبيع هموم الوطن فى بورصة الرسمال
ومع العساكر تميل مع رنة الخلخال
كل الخروم اتملت كل الشقوق سكنت .. عايز تريح جناحك بعد ما خربت ؟
ما كان حداك فيلا بحرى هدمتها بإيديك .. من يوم عطيت فرصة لاولاد الحرام ركبت
الحزب قلبوه زريبة والخيول هربت
بالاغتيال بانتخاب بالورث باستتاء الابن فوق كرسى أبوه يرقد بلا استحياء
يا للى انتو فاكرينها لعبة حظ ومصدافة على قفاكم قليل صك ألف حذاء !
عصر الهزايم عايزكو ضحايا ، مش شهداء !
يوم تبقى حر بصحيح ح تبقى حر القرار حر الإرادة تقاسى أو .. تبلغ فرار
حتى لو الدنيا نتفت يا طاووس رشيك ترفض عشان أكل عيشك تفقد الاختيار
الطير يموت فى القفص والسبع فى القيد حمار
حنبدأ بفقع العيون ، ثم كسر القدم لغاية تتوبوا وتبدو الندم ..
فلا قدس .. لا دولة .. لا لاجئين ومالكوش حقوق في الحياة يا غنم
كفاية على شعب كل شعب الصنم

مراجعنا مواجعنا صارت شيشه وشاورمة من يوم ما ورثوها غدراً خلفة الهرمة
لا (كا) ولا (با) ولا تقوللي خلود أو روح طول ما رضاكو بلاكو – بقلة الهمة !
(الكاب) صبح تاج ومتأبد على القمة ..
كان إيه فى إيدنا عشانك ما عملناشى غربة وسجن اتسجنا ولا ندمناشى
غضبتى يا امة علينا رضيتي ع السجان لبس عمامة الإمامة وهو أومباشي
دايس دماغ حضرتك ببيادة ضباشي
النضال أصبح على ايدكم بضاعة أمريكاني م المشاغبات للمظاهرات للمفاوضات للأغانى
كاتمة بغداد حزنها وخايفة تغني .. م اللي دابحين حلمها أولاد الزواني
قتالين القتلى راجعين زعما .. تاني !
بقيتى ملقف وحيط واطي لكلاب الأرض للعرة والفسل سمسار الشرف والعرض
وللعميل يوم عمل لك زفة كدابة.. ترقص الفقرا على طبلة لصوص القرض
وخلا ذلى لرغيب اولادي سنة وفرض
فيه ناس على نية تسرق يصبحوا محابيس وناس علانية تلهف موقف السرفيس
تسرق رغيف يا فقر تقطع نفس تسرق وطن بالقهر تصبح رئيس
والعقد شرعي برضاها أمة المتعايس
الرب وزع هبالات ع الشعوب بالعدل وحرك كتير من زعاماتها فراكة العقل
وكلهم طمعانين فى المجد والنعمة فاكرين بيبان الخلود يفتحها دق الطبل
والكل مساكين سبايا للى عفق الحبل
قال ابن بوش الحزين – الكون دا في صناعي حاكم بأمرى في أمره .. كاش وقطاعى
وفتح عواصف رعب أبواب الجحيم .. لكن الخواتيم عبر .. يا قطب – يا رفاعى
يوم نارها تحرق صوابعة .. حتى تشفي أوجاعي ..
يا ستى لمي خرابيشك زمانك راح زرعتوا حنظل ولميتوا الحصيد تفاح
راجعة ترازينا وحمار خدك دما الشهدا وحرير هدومك نسيجه من عروق فلاح
يا حسرة على أرض حبلت بالهزيمة سفاح !
يا اللى ضمنت ان بعد السن – مدوا لك وحكموك تاني في اللي عمره ماهولك
افرد وقيم طولك احقن ع اللي جدد لك شرع المماليك سقوطه شرط لوصولك
فاقبل يا خلف الحكومة يقصقصوا ديولك !
لأنى لم كنت زيك لص ندل كذوب بتلوش في سيرتي عشان يبقى الجميع معيوب
وكله يبقى شبه كله – نفر وزعيم يا بيادة للعسكرى دايسة بشر وقلوب
والكدب عمره ما راح يعدل لك المقلوب
سك مخك ليفرقع – ركب فونيه واخضع – تخضع ليك وتشعشع بيك الدنيا
وادفع عجلة مالك ويروق بالك لكن حسك عينك تغلط غلطة يونيه!
كما من فضة تصدى وتبقى ولا الألامونيا !

عفواً .. يا خدام .. سيادتك ريس الخدمة شنجى وبرنجى .. حلنجى أفرنجى – كاب نجمة
خبرة سنين أمن جامعة وبصبصة إعلام غشوم ومشكوم خدوم باللقمة والهدمة
واللى اتفطم ع الحرام لو داق حلال – يعمى !
للجن ميت حق لو خافوا يقولوا لك .. لأ والنمل والطير أسراب الجراد والبق
طول ما سيادتك على الكرسى ورب كريم من كل زوج بهيم – رزقك فى غرب وشرق
وجبلة ترضى المذلة يحق فيها الحرق !
بالقهر سممتنا فأكلنا سحت الحرام خمتنا وأخذتنا على مشم السلام
أصبحنا فى السوق بنخجل من ملامحنا تنهشنا جوارحنا ونكمل عشانا كلام
على عشم ننسى يونيه ف زحمة الأيام ..
كرهت مصر بسببكم كرهت أكون عربي هبابكو عتم مشاعري فاتحرق قلبي
زي الغنم والبقر دهوستوا كرامتها وهتكتوا عفتها للغاصب .. حلق شنبي
شبه الشعوب بؤسها وحكامها يا شعبي !
الأمريكاني الجميل الدليل للعز والنسوان عطف عليه ركبني بدل حميره حصان
صورتي بقت ع الحيطان بوستر وفي الجرانين وسيرتي في لسانه صبحت زي فص لبان
عزة هواه في هواني .. لقلة الإمكان !
افعل جميع ما بدا لم إنما ما تقولش هذا قانون افتراس الحلم خوف البرش
إذا كنت حكام بحكم الطاعة ما عليك لوم وان كنت محكوم بحكم الجوع تموت بالقرش
وعودك ذلتك تلبس له ألفين وش
مين أوجعك – فين يلدعك .. يعكمك ومين تهمته وشتمته تقدمه يحكمك
ولذا باسم الحضارة القط لبس الجرس ! لأن جيش الحرس جاهز عشان يشكمك ..
ياكلو بمخك حلاوة .. رعبهم يسكنك !
اللي دفن في نعيم الجهل أثيوبيا نفس اللي صب الجحيم على شعب كمبوديا
أمم جهولة ف رحيل دايم في بحر القهر على طبل زار من جنون الفقر والفوبيا
والكل ممسوس إيقاع بتدوزنه كوديا
كانوا أغنياء بالوراثة عندهم رحمة صاروا رسمالية مسروعين اللحمة
لذا فظلوا ياكلوا لحوم البشر خوف من جنوب البقر ورعب م الزحمة ..
والسوق كما الفرن بيقلبنا عى الفحمة !
بقلب ميت وبارد فجروا طيارتنا وشالت الذنب ذلة وعلة حكوماتنا
ولما صابهم في مقتل شر أعمالهم .. قامت دلاديلهم تساومهم بحسرتنا ..
ضربنا والا انضربنا .. الولس خيبتنا ..
يا افندم الأمر تحت الأمر والسيطرة الحالة عال – ابتدينا بالبتر والقسطرة
مات المريض إنما كل الخطط في التمام حرب وسلام وما حتفرق لا في السمسرة
محسوبة – نصر وهزيمة الحسبة بالمسطرة !
خلاص بقت مسخرة – كل البلد قشلاق حسب مقام رتبتك تتوزع الأرزاق
لبس المدير بدلة كاكي بسلسلة وضبابير واحنا المراسلة بخبرة نزيط الأوراق
مدفع خرى ف سينا ح يبعبع في بر بولاق !
مفتاح ومجدى ولويس والشيخ فؤاد وحسين وفريد وفتحى وشندي ومجهولين مساكين
راحوا ضحايا الهزيمة ولعنة الأندال .. لما باعوهم جثث في الخمسة والستين !
واللى ما بيشوفش م الغربال مالهش عينين !
قف انتباااه – الأمور بالضبط محسوبة طابور تمام مش مهم ، صبية كركوبة
مراية في الوش بكره فى القفا سلة وشلة تركب تبات قلة ومركوبة
العلة أصلاً دماغها اللي بقت طوبه
وحدة الشاويش اللي فاهم واحنا مش فاهمين الزعما خاتم في صابعه من يسار ويمين
بنهيج على الطبلة رقص الهبلة يا رغاوي من خمر جهله سكرنا اخترنا مش داريين
واللى اتلحس باليسار جابه اليمين في الطين !
الدنيا ماشيه معاك – عشان انت في القلعة والمجد حواليك أمم لأن ريحك مطاوعة
ديتها طير الحواري يطير بريش وجناح .. ح يضيق عليك البراح وتنطفي الشمعة بعض الشرر قد يفرجها نيران والعة !

أنا كل ما آكل كباب واشرب لي تعميرة اعتب علي أمى ما اشتغلتش كماريرة
وازعل من الوالد اللي ما كانش يوزباشي أو حتى أومباشي لجل تكون لنا سيرة !
وفجأة افوق من جناني بنص كاس بيرة !
من غير ما يشرب لها تفاحة ولا ينسون شرعى ح يقعد على كرسي أبوه – فرعون
لا عمره خطى قنا – ولا تاه في حدوته وح ياكل التوتة من شجر الرضا المهزوم
رضيتى ليه بالسكون وكانت حركتك قانون ؟!
قلبك على الحزب والا الحزب على قلبك يا للي يا دوب قد كشف القبض بنحبك
حتى لبحر الهزايم حس ورغاوي .. زعق من القهر يوم غرقت فيه صاحبك
خصماً على الإنسانية من حساب شعبك !
يا للي انت فاكر الزمن لخبط خطوط سيرك حلمك على نفسك ولا تحملش على غيرك
جهلك ملخبطها بدري .. كإنه خططها شياطها فج ف بطاطها ماطالش منا خيرك ..
وفضحت شرك بنفسك في قرار بيرك ..
الطبقة ماتت خلاص قاعدين تهببوا إيه ؟ يا للي اشتهيتوا حياة ابن الذوات والبيه
جيفارا قلقان في قبره الفقري بيتعذب من عار خيبتكوا للي قلبت صنع ايده عليه
أصبح نضال الشعوب ارهاب – فهمتوش ليه ؟!
سماحة ملك شعب مصر العزيز مطرطق ودانك لروما وباريز
عشانهم بتعزف همومنا نغم يطول حبال اصطبارنا اللذيذ
يعشمنا لحنة برجوع لانجليز !
بلغ يا طير شكوتك للشجر واشكي همومك يا غيطان للمطر
أما أنت يا جعر فاكتم حار آهاتك طرشة الحيطان فاتك ميعاد السفر
امتى ح تفهم وتتعلم لغات الحجر
عمال تهطرس وتغلي تجز في اسنانك كاره حياتك معاشك ضل جيرانك
ما انت اللي جيبته لنفسك حين رضا صدقت – حتى اما دققت – إن النملة دي حصانك
وركبتها فنطزة تهتف لسجانك
اللي بيطبخ يا صاحبي المربيدوقه وابو ديل عوج بالأكيد يلبس على ذوقه
شفتوا أما دقتوا الهلع في عز سبتمبر ناركو اللي حرقت ايديكو امتى ح تفوقوا
بتعكروا ع البشر .. وبتحملوا تروقوا
شايل هموم اللي قتلتهم والا ذنوب اللي بينافقوه خيبة الأمل راكبة جملهم لقت الولد طالع لأبوه
حرق قلوب البشرية بجيوش عصابات ورهن بلاده بالفايظ للجات .. ركبوه
خدعوه ووعدوه بفطاره فاتعشى باخوه !
ما هو انتو لو كنتو حقيقي يسار كان يبقى ما بينكو لعطية اعتبار
لكن انتو قطفة باط ما بين البينين لذا محكومين بالخوف لنفس المسار
رهنتوا عقل التاريخ في البورصة للدولار !
بتصبغ مشيبك بنيلة وهباب عشان تقنع الدنيا انك شباب
فصدقنا ما دمسه الكدب فينا .. وطفحت علينا طباع الكلاب
من الجوع نشمشم نفايتك كباب !
من بعد عصر البقر ح يحل عصر العجول وعشمان مازلت ف بشر يا جهول
يا ابني الخضوع للضرورة طبيعة يا هبل التتر .. يا جنون المغول !
على قد ما انت بتحلم .. تنول !
لو كنت ثوري بصحيح .. كان راح تحوش عني وكنت تشيليني جوه القلب ..والنني
أنا يوم شتمتك كشفت اللي بيفعل بيك سوا عمد بإيديك حصل .. أو كان غلط مني
لهب المصالح لسع عقلك .. فجنني
فى الأرض زى السما ملعون يا بؤس الظروف اللي تعلق مصير أمة بقرن خروف
أنا كنت فاكر إنه وعد .. وقدر .. لحد شفت البشر ملسوعة ع المصروف ..
غماها زي البقر في سواقي عدم الشوف !
طولت صبري عليكم صبر عم سلامة ! مشيت طريق مركم عشمان في قيامة
لكن زمان الندالة بيكو ضاق بيه ما عادش في وسعي إلا الصك ع الهامة
ما فضلتش ندعة خجل في وشوشكو يا ندامة !
يا مقسم الرزق قسم .. بس حن علي العضمة كبرت ومحتاجة الأماني لفي
في شمس حامية وزمن بيرتب الجنازات .. لا مخلي شابه ولا شايب في ضلمة وضي
ماشي بغدرة بيعصر كل قلب .. حي