الشمروخ 36

شمروخ الأرجوز
35
صفحة من أحزان مصر فى دفتر جبرتى العصر
فى ثلاثة وعشرين يولية
ح نعمل حفلة فى جزيرة الشاى
يخطب فيها العفريت وابو حنتيت والنساى
وح يحضرها كل الضباط الأحرار والأشرار
من روز اليوسف لمباحث دمياط
والقاضى بتاع غزة وبعض الصحفيين الخصيان
وبعض النسوان، وبقايا الأجهزة والشخصيات الفذة
مع بعض المساكين الأقباط
والشعرا العباط وهبل الثوريين اللى اعتزلوا كل نشاط
وكان امبارك بكرة نمنع أى عياط
نتباكى على الخط الثورى
نخطب فى جلال الذكرى.
نحكى ف سيرة عبد الناصر ونجيب
والعبقرى وشهدى عطية
وفنانين سنباط
ننهش لحم الديمقراطية الحى بدال المزة
نمارس بشجاعة لاسبتدال
بعض الاستهبال على بعض
ببعض الاستبعاط
حلم والا علم؟
خمسين سنة وأحنا .. بصدد
نقيم صروح بدل الهدد
نشد حيل هذا البلد
نمسح دموع البنت ونرى الولد
فتلنا حبل الصبر – يا طول المدد
أجيال تموت فقر وكبد
الحلم صار كابسو عبوس فى العين رمد
أجيال تنام قهر وكمد
وبرضه مازلنا – بصدد
ما شفنا على إيدكم سواه حبل السمد
واحد أحد – ع العرش
من غير مستند
مالوش فى شرع الحق والدستور سند
هو العمود، هو العميد ، والمعتمد
واحنا جميعاً والوطن – بدون حسد
حواليه خششبان
مسلوبين الهمة والذمة
معدومين العافية وكمالة عدد
الصوبة الأمنية الثقافية
من نص قرن ابتلانا الحظ بالعسكر
عقلية أن لم تحارب دمها يعكر
شايفة الحياة كادر ثابت والفرات دجلة
والنصر يا الموت ولو عركة على فجلة
بتخاف قوى م الكتابة والحروف والفن
يلسعها جمر الثقافة تنهطل تنجن
تكره خوافى الجدل تجهل جموح الخيال
وتضيع فى فورة حماس تطلب سراب المحال
عكمو ميدان الثقافة والفنون حكموه
بايدين حرير أن فلت منها اللجام شكموه
إعزف غنايا ولا ترفرفش يا عصفور
دا لحن حبى، أن حفظته راح تكون مشهور
شاعر على الشعرا أو أستاذ على الأساتيذ
يا تبقى ثورى تقود الدورى والتلاميذ
بكل حرية أرقص وانتشى وحلل
وعلى حدود رؤيتى رفرف سعيد هلل
لكن فى بحر السياسة الزم أمان شطى
إذ كل ما تشتهي تلاقيه رهين خطى
من أجل نضمن سلامة النية والأوضاع
نقطع طريق على النشاز ونزيط الإيقاع
كنا انقالب أيوة لكن ثورة شعبية
لا شرق ولا غرب لا استعمار لا حرية
إلا لمن يقتنع أن الوطن فى خطر
وإن احنا بالصدفة جينا لكن استجاب القدر
من كل ناحية العدا متربصين بينا
وإحنا اللى كافة بدع ظهرت على ايدينا
بدعنا فى الضل صوبة وريفة الأشجار
أزهارها أفكار أليفة لجل لاستقرار
لها خطة ميرى انضباط، ما يخرش المية
رافعة شعار إلتزام ضد الشيوعية
كون ما تكون، إنما لما نعوز هاود
تعيش فى حالك ولما نندهك عاود
تكون يسارى، يمينى بورمجى حلقى
قول ما بدالك سوى تمارس صراع طبقى
وإن شئت غذى طموحك شهرة والا فلوس
لكن حس بنفخناح تقب يا متعوس
عاملين حسابنا قوى ولو الزمن غير
عيالنا رسمالنا جيل من جيل ما يتخير
منذ البداية صنعنا للأدب ضباط
محصنين ضد داء الفك روالغفراط
يجندوا لصفنا كتبة صغار وكبار
مسرح وسيما وصحافة فنطزة وأفكار
والكل عسكر فى جيش الأمن والإعلام
لشئون عموم الثقافة ويسقط الإلهام
حسب احتياجنا تكون العقدة والأوزان
وكل ما نحب ندوة مؤتمر مهرجان
ثقافة بالمسطرة متقطرة ع الخط
وحضننا للعواطف فى العواصف شط
**
على كل ناصية وكل ساحة فن
فيه مستشار قومى متمرس بشأن الأمن
هنا مستشار للأغانى، هناك للاشعار
سمسار فى بورصة فنون يحدد الاسعار
هذا مفبرك برامج وده له صالون ملحوظ
وده ف نوادى الأدب يعم لنجيب محفوظ
وده لهو مخفى تلاقيه مكفى على نيه
وده حاطط الشارة رهن إشارة علنية
ودى مشاغبة تحبك ، وذه تلاغيك
ودى تربكك بالحداقة لحد ما تلغيك
ودا فى التاريخ معلمه ، ودا له عمود ثابت
وده رئيس محكمة فى النقد والنابت
وده شاويش فلسفة فى الفكر متمكن
وان كان بسبب الهزيمة ساعات بيتمسكن
نافوخ، ساعى الجميع على موجه مدينة
لكنه فى الميرى يضبط ابوه بحنية
**
والكل فى الصوبة خلفه عز يتزغط
يقوم بدوره وحسب ما يدوروا يتخطط
يفتى بما يعرفه واللى ما يعرفهوش
ولإنه واخد أمانة حسب زمانه يلوش
يهد حيل موهبة شافها بجناح طيار
أو يخرم المركبة لو هدده التيار
ويبقى زى العسل ينضح خجل وأمير
حين يضربوا به المثل فى كتابة التقارير
والحق مش كلهم قادرين كدة وقارحين
لكن كتير منهم لابسين سماحة الدين
وبعضهم يرطنوا حرية والإيسار
وكتير لهم موهبة فى الحنجلة بأفكار
لكن الجميع ملزمين بالشكف حين يمضوا
ويختموا بالدعاء حتى الحمير يرضوا
مع أن كل بعضهم ايام ما كانوا عيال
وعد وبشارة وأمانى للوطن ومثال
إللى أتوحل فى السلالم أو اتهبل بالفلوس
واللى شبع بانهطل واللى عمل فلحوس
واللى انكسر غصب عنه حين رماه الريح
والبعض من صغر سنه بورمجى تفاريح
ولقاها سهلة فقب ف خمة واستعجل
يدوس على رقاب زمايله عمد مستهبل
والى داق السلطة عايز جوقة تعزف له
ولما يدمنها يحتاج شعب ينزف له
الصولجان من طبيعته مفترى وجهول
محتاج يربى ف زرايب هيلمانة عجول
تنعر له يوم الانتصار تلاغيه نهار الكرب
تهدهده فى السلام وتهننه للحرب
وأنظر بيعنك يا تاجر كل شى مكشوف
هاجمه القططع الأناجر دون خجل وكسوف
**
وهكذا يا ضنايا بقى المواطن موظف
يا دوب يطول البقايا واتهد حيل المثقف
فى كل حتة اللوا يأمر له الطاعة
ما دام ركبنا المنصة تخضع القاعة
وصاحب العصمة ظنه أنه سواها
ما دام العقول اتهلت هرستها بلواها
لا الشعر لا سعر ولا فكرة لها حرمة
والشومة كف الحكومة، والنافوخ صرمة
عايزين – عليه العوض – خمسين سنة تانيين
لحد ما حميرها تنفع يبقوا بنى آدمين
مش كفاية
رئيسنا ولا ريس غيرك غصبن عنهم
يا فارسهم بخطوط سير كيفك سيبك منهم
ما فى غير الجهال والفقرا بيقروا عليك
ومنين ح يشوفوا وأمجادك عامية عيونهم
**
والرب اختارك له حكمة تطلع دينهم
*
شكراً إليك يا رئيسنا يا أشطر الرعيان
على أمن الدولة اللى هدانا لصمت الحملان
سلمت حبال رقابينا للعدو فسلمنا
بنلغ الفول وبنتكرع زى الخرفان
**
عامينا الرعب اللى مخبى عورة العريان !!
*
يعتذر الشمروخ لأصدقائه وقرائه
عن شوية تأخير لشوية أسباب فنية
الطفل المعجزة
أنا واد خالص مخلص
مافيش زيى ولاد
تربط ع المفلفص
وتضبط لاجتهاد
**
مين فيكو عنده بابا
مدرجح زى بابتى؟
وجاى من صلب ماما
شطورة زى مامتى؟
**
نسبة زكاوتى عالية
بتلجم لى حصانى
وليه ف مصر جالية
تلعب لى أمريكانى!!
**
مش أى فرافيرو
أنا جاى يعنى جى
مين غيرى والا غيره
ح تلقوا غيرنا زى
**
دانا بابا عامل لى لجنة
ح تكبر تبقى حزب
وماما جابت لى بدلة
ما يدوبها شى كذب
البديل
محمد هنيدى رئيس جمهورية
ونائب سيادته زكية الغبية
و عادل إمام مستشار الرياسة
لشغل الزنب فى أدب وف كياسة
و أحمد بدير للجيوش والمعارك
و الليمبى لجل اقتصاد الجمارك
و عبلة ح تمسك وزارة الثقافة
ترتب حداثة شئون الهيافة
تصور .. معاها علاء مرسى مفتى
يجدد شباب الجرايد ويفتى
و غانم ومرته دلال للمشورة
إذا العامية رضيدت تخليهم عورة
و يوسف داود لوح نحتاج معارضة
معاه منتصر للسلام والمفاوضة
وإذا احتاجنا للشاشة مجدع وراجل
وحيد سيف و يعشة و نجم اللى فاضل
وأحسن تضموا المجالس جميعها
فى مجلس عشان لو تأزم نبيعها
كدة المنحنى يبقى دوغرى وتاريخى
وتقبل ولو كنت قرفان طبيخى
فلا نلاقو لحظة نفكر ونحزن
ونضمن لمصر الأمل تبقى أحسن
دى نكتة وإذا قبلوا أن يحكموها
وعالجوها م الاكتئاب ضحكوها
ينسوها حالة القرف والمجاعة
ولا تبقى ورث لحساب الجماعة
هموم على لحن مصرى
دى بلد عجيبة ومهبولة
وعاملة مش فاهمة الفولة
سهرانة ترقص طول الليل
وتقوم من النوم مشلولة
تقوم من النوم كسلانة
تقول يا وسطى وآه يانا
ضحكتنى وأنا عيانة
أنا مالى، أنا غير مسئولة
تقول لها كانى ومانى
ترقع بصوتها الحيانى
الذنب ذنب اللى رمانى
ع الغلب وأنا كنت الأولى
كنت الأميرة والدرة
راح جاب لى م الشارع ضرة
خلت عيشتنا سواد مرة
والحال بقت مش معقولة
كل هذا العز مش صدفة دى لعنة حكم مصر
اللى يركبها يبرطع يبقى يوم هزيمته نصر
الصيف باين مولع
أنا شايف الدخان
مش طالع م المداخن
طالع من الغيطان
والصيف ده جاى ساخن
والشوق هجر المكان
الخوف فى الجو سلاكن
ملبش الحنان
ضل المدن مدافن
صهد الحرام بينهش
فى الأرض ولاحيطان
الله يكون بعونك
يا حضرة المواطن
ياللى ف نفسك تقيل
وتريح الحصان
اللى من الرعب يصهل
مشكوم بميت لجام
لجام فى أيد عدوه
ولجام فتله الجبان
اللى حرمه الأمان
وأنا علشان عيونك
يادرة المداين
مجبر أعيش جنونك
أكمل الرواية
قبل الخريف ما يبهت
على خدود الصبايا
وعلى حدود الزمان
يبهت من المراية
وجهى من الدخان
من نهنهات المشيب
بلغ يا طير شكوتك للشجر
واشكى همومك يا غيطان للمطر
أما انت يا جعرفاكتم حاراهاتك
**
امتى ح تفهم وتتعلم لغات الحجر
بنيت لى زانزانة فيلا دورين بتراسينة
شرح هواها ترد الروح لها جنينة
وعملت سجان على نفسى – ادلعها
أتاريه ماهوش بره منا السجن شى فينا
**
يا ويله فنان فى دنيا دنية وسجينة
حملك عليه بقيت مش حمل أحمالك
أنا ياللى صبوة صبايا ندرتها لجمالك
بقيتى كالدنيا .. ما افتكرتش ترحمنى
شغلها عنى اشتغالى بصعب أحوالك
***
فات الكتير واللى جاى ما خطرش على بالك
غرام الأفاعى
طول ما انت جنبى
عمرى ما خاف مستخبى
ابتسامتك لما تفردها لى تبقى الدنيا بمبى
ياللى بشجاعتك بقى العالم أمان
بعد ما دفنوا عساكرك طالبان
فى تورابورا الأفغان
و أبن لادن راح فى شربة مية
أصبح ياما كان
واختفى صدام كما يطير الدخان
يا سلام .. صارت الدنيا أمان
فيها إيه يتحرقوا أطفال الحضانة
لجل تحرير الشيشان؟!
والا تندك البيوت فوق روس
صاحبها فى الفالوجا ؟!
فى جنين أو زفت سان؟
قبلهم دمرت هيروشيما عشان
تبنى اليابان
تبقى غيه فى حسبة الكون كردفان
إيه تكون لبنان أو الضفة
فى حسابات الزمان؟ ! كستبان؟!
وحدك أنت القمة أنت الهيلمان
يا وريث (فوستردالس) قيمة ومكان
حقك أحنا أركب وبرطع بالحصان
كلنا هنودك وفى خدمة جنابك
لحمنا مرة منابك
حقك اتعلم على الخارطة النشان
كلتا خلة لتسليك السنان
واللى يزعل من كبارنا إكسره
فكرة أن المقاوحة تصغر
وزى ما انت فى غفلة التاريخ علينا مأمره
حسب ما ح تشوف سيادتكم طيره
أو كدره أو صنفره
إمنع الكاكولا والويمبى وحتسة باللبان
إحرمه من رضعة المحاياه ولاعبه بالخباثة
أحقنة بمصل الحساسية الجديدة والحداثة
فهمه أن الزعامة مش رياسة أو عواطف
امنعه يجهز ولاده للوراثة
الطمع أحيان يفجرها عواطف
قول له يتعلم سياسة / الليل مخاوف
وكل يوم الصبح يصحى يحب على كعب الحصان
يعترف / يعرف إذ يحتاج يصلى
فين بولى الوجه لو عايز يفوز بالمعمعة
راح زمان المجدعة
النهاردة كل فرص وله فاتورة
وكل حج وله أدان
السجود فى كل مله رهن منديل الأمان
وطريق الافترا ما فيهاش رجوع
موت وجوع .. أو ركوع
ركعة ذلة وركعة تدريب على الكياسة
وألف / تكدير للى ما فهمش تعاتير الحماسة
أو خرج عن النص واتنمرد سقط فى الامتحان
تخاريف الصفحة الأخيرة
وحش التعاسة زى فيل مجنون
عمال يدهوس كل يوم
مليون
ياللى طلقت قيوده من حبسك
علشان تمنحه بالغنايم نفسك
بكرة يقولها الشعب
كن – فيكون
**
لا الأبهة تنجيك
ولا يحزنون
مليار يا راجل بتكنز كل عام مليار؟
أمال بتصرف منين
لو كل ثانية دولار؟
داحنا اللى هو احنا
بنشوف المنام بالأجل
بنحلب الصدفة
ونراهن الظروف ع الأمل
لإمتى ح تقلبونا
ولا تحسوا العار
**
يا حسرة السبع – حين يحكم مصيرة الفار
إيه يا وحيد عصرك ح تاكل إيه؟
كفتة ولحمة؟
عيش أفرنجى؟
مارون جلاسيه؟
لو حتى – عجل وطابونة
كل يوم لعشاك
وخمس عيال وأمهم
وألف عيش لغداك
ح تتخمد جثة هامدة أكيد
ح تحلم ليه؟
**
أخرتها قطنة
ولو كانت بعشرة جنيه؟
ما أعجبك
وانتى فى هدير الصمت
مسلمة الأحزان لنيل الوقت
مين اللى ذلك بالمواجع؟ .. مين؟
وعلمك صبر ورضا المجانين
ومين بلانى بخوفى
شرقت ما صدقت
إن الشجاعة شفاعة للعاشقين
رضيت بعجز الحجر
عن شوق بلوغ الشط

الشمروخ 36

الشمروخ 36

الشمروخ 36 :: تعاليق