شعر / سمير عبد الباقي
فوانيس الأراجوز التعيس فى ليل المد والتوريث
* إنت النموذج ، وإحنا كلنا أشباه
لو شئت إنت نبى ملهم. أنت نص إله
قول ما بدالك واعمل ما بدا لابنك
نعيم رضاك ح يكفينا ما موتى ـ حياه
الكل دبحاه هزيمته بيبكى على ليلاه!!.

* كم للزعامات حسابات على حسب الشعوب تلاكيك
تسوق عوج رأيها لوجع القلوب تماحيك
كان لك منين كل ده وزرعك شجر عاقر
وكل عامر خربته ونفضت منه إيديك
كابس نفسنا.. هتفنا بدمنا نفديك!!

* سماحة ملك شعب مصر العزيز مطرطق ودانك لروما وباريز
عشانهم بتعزف همومنا نعم
يطول حبال اصطبارنا اللذيذ
يعشمنا لحنه برجوع لانجليز!!

* بتصبغ مشيبك بنيلة وهباب
عشان تقنع الدنيا إنك شباب
فصدّقنا ما دمّسه الكدب فينا
وطفحت علينا طباع الكلاب!
من الجوع نشمشم نفايتك كباب!!

* ضربوه على قفايته خدوه على المشم
وغرقوه عطايا.. صبح أعمى وأصم
خدعوه بالجات فصدق بحق العولمة
لو طاطى شعبه اكتر يصير هو الأهم
حفظ درس اللى حشش محبس باللى شم

* اتنين وعشرين سنة تحبى وما بلغتش
ياللى انت مصمصتها للعضم مارحمتش
والبعدا بيدلعوك ويجملوا الصورة
يكحلوا العورة رقص وكورة مافلحتش
لحقوك بقفة عيون/ بحلقت مالمحتش

* لو مؤمن ليه مش خايف تصحى قدام ربنا عريان
عوراتك كلا باينة ومخفى ملفاتك ح يبان
وساعتها ح تُعرض ع (الجماهير) بلا حوله
ولا ينفع أمن الدولة ولا يشفع خلف الصبيان
راجع نفسك واحسبها (مصري) يا غلبان!

* طول التاريخ مصر فقر وجهل عثماني
آخرتها قهر المرض كبدى وسرطاني
وعتاة جيوش الجباه ساقوا الهبل ع العبط
إيه الغلط أن تعود ملكية من تانى!
طول عمرها عباسية ولاية سلطانى!

* الدنيا ماشية معاك عشان انت فى القلعة
والمجد حواليك أمم لأن ريحك مطاوعة
ديتها طير الحوارى يطير بريش وجناح
يضيق عليك البراح وتنطفى الشمعة
بعض الشرر قد يفجرها نيران والعة!!

* من غير ما يشرب لها تفاحة ولا ينسون
شرعى ح يقعد على كرسى أبوه فرعون
لا عمره خطا قنا ـ ولا تاه فى حدوتة
وحى ياكل (التوتة) من شجر الرضا المهزوم
رضيتى ليه بالسكون؟ وكانت حركتك قانون!!

* طفل الأسد.. خبرة عصرية وإنترنت
فى جميع شئون الوطن على سلو أبوه ح يبت
والكل حامد وشاكر فضله.. ومهاود
مادام بلبدة حى يتمرن.. ويصبح حنت
دا ابن أمه بشنب، حتى لو كان بنت!!

* أفسالها ع الكرسى يبقوا من ذوات الهمم
جندرمة وبيادة أفندية وكباتن ـ رمم
لأنها ورث شرعى لكل هب ودب
نهبوها واستكتبوها صكوك براءة الذمم
وهى منذ ابتداها ـ تاريخ ضمير الأمم!

* للجن ميت حق لو خافوا يقولولك.. لأ
والنمل والطير وأسراب الجراد والبق
طول ما سيادتك على الكرسى ورب كريم
من كل زوج بهيم ـ رزقك فى غرب وشرق
واللى بيرضى المذلة يحق فيه الحرق!

* خلاص بقت مسخرة كل البلد قشلاق
حسب مقام رتبتك تتوزع الأرزاق
لبس المدير بدلة كاكى بسلسلة وضبابير
واحنا المراسلة بخبرة نزبط الأوراق!
واللى (خري) ف سينا بيبعبع فى بر بولاق!

* خُدنى على قد عقلى واشرح الجاري
دى مصر؟! والا انكشف لعدوى أسراري
عسكر على كل ناصية غير ميدان الحرب
وجنرالات مطهومين بين رقص ومجارى..
وأنا قلبى ينزف عشان أعزف بأوتارى!

* عفريت العلبة اللى مراهن على فقر خيالنا
بيسوق الهبلنة شيطنة ومبرمج سوء أحوالنا
بيشرع فينا الكدب يطوّع حق الملكية
نصبح ورث هنية للى يتموا أطفالنا
فينا اللى مكفينا. ارفعوا رجليكم عن مستقبلنا

* بالاغتيال بانتخاب بالورث باستفتاء
الابن فوق كرسى أبوه يرقد بلا استحياء
ياللى انتو فاكرينها لعبة حظ ومصادفة
على قفاكم قُليل صك ألف حذاء!!
عصر الهزايم عايزكو ضحايا مش شهداء!

* فيه ناس على نية تسرق يصبحوا محابيس
وناس علانية تلهف موقف السرفيس
تسرق رغيف م الفقر تقطع نفس
تسرق وطن بالقهر تصبح رئيس
والعقد شرعى برضاها أمة المتاعيس!!

* نص البلد عسكر على نصها
ودا اللى من بدرى قطم وسطها
لو كان بعتهم يزرعوا الصحرا
ماكانش فلاحها شحت قمحها
ولا خرس بين الأمم حسها

* ماعدتش مصدق إشارة المرور
وبايت مآمن لفتحى سرور
مجالسه وجرايده بتنهش فى قلبك
تغمى عينيك فى السواقى تدور
تعبى الهموم فوق قرونك يا تور!!

* الخلق متبعترين ما بين رصيف ورصيف
متعترين شرق غرب ما بين رغيف ورغيف
الأزمة ضاربة الخلايق ع النافوخ جزمة
ومالهش لازمة الشرف نفسه ماعادش شريف
حكم الجهالة المخيف خلا الأمل تخاريف!!

* من مرج (برج العرب) لمغانى (شرم الشيخ)
والجنة متعة بشر صدفة قدر وتاريخ
وارثينها شرعى غنيمة مهر وهزيمة
فى حروب مخيمة تفرقع للسلام صواريخ
والسلم والحرب بمبة خيارة أو بطيخ!!

* بينى وبينكم سنين من فقرى مانسيتهاش
بينكم وبينى سجون قهرى اللى ما تفناش
سجانة كتبة دكاترة مخبرين شعراء
بوشوش أليفة مخيبة غيلان وحناش
بعتوا الوطن كاش وسكرتم بدمى بلاش

* يا رازق النملة قوتها فى حجر صوان
ليه ضاقت الخية على الرزقى وع الفنان
ذو العقل زاحف ورا فتافيت رغيف العيش
والجهل متربع على القمة عمل سلطان
صايبه العما وكحلة أمه العامشة ششم زمان

* ابن الأسد له عرين الغابة مش عمه
خصوصى لو واد مخلص شبل وابن أمه
كله ح يخرس مافيش حيوان بيتكلم
واللى مسلّم أكيد له مصلحة تهمه
خدوه مثل حكمة واكفى القدر على (تمه)

* كل أما سكعوه قلم على طول يدير الخد
كإنه من يوم حبا ما صلبش حيل ولاقد
والواطى يفضل مطاطى ولو ركب مهرة
الصدفة وهبت له قدرة وشهرة مش على حد
مع الخيانة ـ الكنانة تصير وطن ع القد

* عز الظلام الجهول الجاهل الزنهار
اللى ما كفاهش ليلنا فطفى ضى النهار
بدمى ح اكتب له شعرى نجوم فى عز الضهر
تفضح أبوالعهر اللى حكم فى الوطن تجار
باعوا لنا رمق الحياة وباعوه للاستعمار

* لابد على قمة طرطوفها
بتبرطع فى جناين خوفها
فى وهم ان الحال دايمة لك
والناس م الجوع فقدت شوفها
لأ. فوق دى الأيام بظروفها

* لايق عليك هذا الهدوء الفريد
اللى يبغويك بيه شيطان عربيد
قال لك تغابى تجاهل كل ما بيضايق
ح تبقى عايق على القمة وهمه عبيد
دا اللى اشترى مصر باعها (لوّط) خردة حديد!!

* واهم تانى رجعوا بخيانة وعساكر
وانت فى غيبوبة ماانتش مذاكر
ح تحزن ح تشمت ح تفرح بإيه؟
ومهما ح تنكر عذاب جوعنا كافر
مصيرك يا بيه رهن فتح الدفاتر

* من يوم رهنها الزعيم على نسبة فى الميه
عدى يناير بليد ما انتفضوا (حرامية)
يا هلترى الخلق نسيتم الهموم الجوع
والا الجموع رقدتها سكتة قلبية..
قطعت شعوبنا الخلف من غلطة قومية!

* بيطولوا ع الكراسى دمهم يزرق
يبقى الميراث شىء طبيعى إنه يصبح حق
حتى ابن فجلة اللى أمه كان بترعى الغنم
صبح كبابجى ولا قدرنا نقول لها ـ لأ
لذا ح يحصل ـ ولو قلبك كمد ينشق

* يا اللى أنت ساحب من وشوشنا حمرة الخجل
وبجزمتك دايس فى قلب الشعر مسخت الزجل
سايق الهبل ع الشاشات تعلنا ـ تذلنا
طب دلنا لو كان لنا بحضرتك نتفة أمل
(عيان فى ميت!!) حسها ـ ما عادش يجرحنا المثل

* يا ريس الحى خفف عن ضميرك.. مات
خلق الجمال والشرف جوه البشر إخوات
طفحت معاك العيوب على الوجوه مسخرة
والجهل صار مفخرة والسمسرة درجات
م الحسرة صبح الفقير يبكى على الخواجات

* بيقولوا راح يخلفه ابنه بفكر جديد
لأنه طالع لأبوه وأمه ومش تقليد
بس انت قول لى قديمكم إيه وأنا أدركها
وافهم فباريكها ليه بعتوها خردة حديد

* كان شر بره و بعيد، أصبح بكم تقاليد!

* أوراق التين على سذاجتها بتخبى ثماره
والديك الخايف م التعلب بيدارى آثاره
وزعيم الأمة اللى مكمل بجيوش وعقول
بمزاجه بيستدعى عدوه لاستعماره
مين المستحمر؟ طب مين الجارى استحماره

* لو كنت حاسب حساب فيه حد ح يحاسبك
لم كنت تعمل ولا تقول غير مابيناسبك
خدعوك جميع اللى عدموا العزة غنوا عليك
عملوك (نوايه) سنادة وسبحوا باسمك
عزوة ندم من عدم فى الوهم بتقاسمك!

* لو.. لسه ما شبعتوا (بز) ابنى يرضعكو
وإن كنتو ما فرحتوا زماميره تدلعكو
وإذا لسه فيكم رفق للاعتراض ـ دوغري
جيش تحت أمري/ وأنا ف قبرى أركعكو
دانا اللى شخلعكو حبه ورعبه ربعكو

* الشاعر لاخرس لاعمى هو اللى حويط
لو يدى الطرشة لزوبة العامشة وأبوالنطيط
فى سوق العصر، يا يخطف رزقه يا يموت بيه
الشاطر هو اللى بيعمل ليام دى عبيط
ملعونة الخيرة، لوتبقى يا زعيط.. يا معيط!!

* بتفتى بما تجهله فى اللى ماتعرفهوش
ساعات خواجة ساعات عمة فقى وطربوش
وبر الغلابة اتنحل من كتر نتفك فيه
وأكلت مال النبى شرعا ومارحمتوش
واللى اختشوا ماتوا حين افتى اللى ماخجلوش

* يا عمى جاتكو القرف هزمتنى بلاويكم
كم عشت وهم إنى كنت بروحى أفديكم
ضحايا؟.. يادى العجب وانتو الجناة والسبب
موتى..! برغم أن قالعة الأرض رجليكم
تفتوا عيش الحرام لفطار أفنديكم

* بلّغ يا طير شكوتك للشجر
واشكى همومك يا غيطان للمطر
أما انت يا جعر فاكتم حار آهاتك
طرشة الحيطان، فاتك ميعاد السفر
امتى ح تفهم وتتعلم لغات الحجر؟!