دار الثقافة الجديدة - 1972

سمير عبد الباقى

من قبل قبل التاريخ
يا مصر عشقك أمل
في الشوك وزهر الورد
حضنك مراسي الحيارى
تمسح دموعى ع الخد ..
حين يعلا صوت الخلايق في الغيطان ...
بتجاوبني ..
ينشق صدر الحجر
ويغني قلب الأرض ..
لو ينسوا يوم البشر إنتي ماتنسيش حد.
·
أنتي اللي ليه ...
عيونك شموس الصباح والمسا
وحضنك غيطان الحنان ... والعمل ..
وإسمك يا مصر اللي ما بيتنسى
يداوى الشقا .. والأسى بالأمل ..
يا قطر الندى
يا طراوة الصباح
ياطعم الكلام والحنان والقبل
باشوف إبتسامتك ندية وخضرا
علي وش طفلة .. تهون الجراح ..
وأسمعها تنطق في صوت السلاح ..
تهون المصاعب وأهد الجبل ..
·
وبطول ليالي التاريخ
أنا اللي عشتك محبه
عشتك أمل في صباح ..
حبه في حبه .. في حبه ..
يطلع يداوي الجراح ..
قلب الصبايا يآمن ..
قلب الولاد ... يرتاح ..
والسكه يامصر صعبه
لكن هواكى براح ...
وغيط سنابلك يابلدي فى الأصل كان من حبه ...
·
أحلم يافلاح....
ياب>ره يامغمضه كونة أمل وزهور
عشق النباته كاسات ع الشقيانين بيدور
بيقول ياب>ره إطلعى طولى السما .. وامتدى
عليت علالى الحيطان .. حطت على زندى.
خضرت كل الغيطان وأكلت على قدى.
وعشان عيونك يامصر
يا عيون ولدى
أروى بدمى الب>ور حتى تشوف النور.
·
قسم له يامغنواتى
محلاك يا مصرى فوق شطوط النيل
عرقك مع الطمى فى عروك البنات بيسيل
فى كتابى شايف قصة المستقبل
م الطمى طالع .. وطالع تكتب المواويل ..
·
وقول مع الأطفال
عاليه يا نخلتنا
ضللى فوق بيتنا
عالى يا سجرنا
ضلل على دارنا
رفرف يا عصفور وعدي
عدى الشط الثاني
بلغ السلام لأبويا
وتعالى تانى..
وياطير ياللى طاير
خد معاك رساله
وسلام من قلبى
على كل الرجاله
إللي في الغيطان بعيده
شقيانه شغاله
غريبه رحاله ..
قول لها ترجع تاني .. تاني
ومعاها لقمتنا ..
·
وتحلا ساعة المسا..
يا حضن دفيان يا فن يا فرح يا أحلام
يا منقد النار دفا قرب ما بيناتنا
قربنا من بعض ندفى نوصل الأيام .
وخلى ضى الصباح يفرش فى ساحاتنا
ونقول ياليل وياعين.
يقول معانا .. الحمام ..
·
الأرض تتخضر..
وتهل على أرضنا ويا الشتا اطيار
علشان تدوق ميه ع>به
وشمس وطراوه
ومع الربيع تعلا ترحل ..
زي النسيم ... بالهداوه ...
كل المواسم بلدنا مزهره الأشجار
والنخل فاكر نفسه فى النسمه
وينسى ..
يسرح ويتمايل مع الأحلام
ويا الحقيقة يعاود
ينزل حمامنا الجرن لجل الحب .
نهشه .. يرحل يهاود ..وتهل شمس الصيف لهيب في الغيطان
تحضن سيقان القمح وتعبى السبل
وتلون الكمترى والرمان ..
تملى قلوب الصبايا بالهوى والأمل
حين نجمع القطن .. حيدق الفرح بابك .
قومى أفرحى زغرطى ..
وارخى الجدايل جداول ..
وغنى للشمس ترحمنا تشق اللوز
وتصب ماء الحياه ..
كيزان وتمر وسنابل ..
* * *
كل المواسم خواتم فى صوابعنا
اصفر وأخضر ودهبى .. كلها ألوان ..
فوق العيدان ..
تحت العيدان أنزل أركع بارك الخضره ..
وصلى خللى الغيطان
تدى كمان وكمان ..
أفراح .. وأحزان ..
شقا وراحة وأمان ..
حتكونى يامصر دايما للأبد ..
ونكون ..
مادام عروق البنات ..
موصوله بالأنسان ..
·
فوق الجسور والمراوى
عالى .. عالى .. عالى ..
ووتر حساس ....
ياصوت الفاس ..
عللى فى العلالى ..
وتبت الأساس ..
وأنت الغالى
حقق لى آمالى
يا صديق موالى ..
يا لحن غنايا ..
ياعرق الناس ..
عالى .. عالى .. عالى ..
وأنت الغالى ..
وأنت آمالى وموالى ..
إطلع بمصر العلالى ..
يانبض قلب الناس ..
·
علمنى معنى الغنى
الكلمة .. والغنوه والموال .. يدفوا القلب ...
يهون علينا التعب ياناس ..
يهون الصعب ...
والفن لو كان أصيل ...
زى الطعام ياناس ..
ولاأصيل إلا فن جميل .. يفيد الشعب ..
·
يحكى الفتى ويقول..
قلبى ربابتى يامصر
وحبك الأرغول ..
ياما على سكك الهوى بنقول ..
قلنا فى حبك .. وياما ..
لسه ياما .. نقول ..
م القلب للقلب بينا للمحبه رسول ..
أنا هنا في المدينه .. وقلبى فى الرياف ..
صاين نعمها الشريفه .. والرغيف الحاف
غنيت ترابها
ع>ابها
حبها .. فرحتها ..
غنيت غيطانها .. بيبانها بحرها ترعتها ..
غنيت شوارعها ياما والحوارى السد
وبكيت فرح وأنحنيت .. قبلت صخر السد ..
أنا أصلى مصرى وعاشق بنت مصريه ..
على كل جسر تلاقينى زى غاب الريح ..
وأٌقدر أغنى لبلدى لو حتى قلبى جريح ..
طول عمرها وعشقها بيخفف المجاريح ..
ويعلم اللى ملهوش غيرها .. يقول .. ما يخاف ..
في عز .. عز الجفاف ..
وفى السنين العجاف ..
وانت ياكيت صبابه ..
شد العروق ع الربابه ..
أشكيلها م التباريح ...
خليك فصيح وصريح ..
مصر الحبيبه يا شاعر تعشق أولادها ..
وتحب تسمع غناوى الموت فى أعيادها ..
لجل اللى ماتوا ف هواها
يرجعوا .. تحييهم ...
وف حضنها تلمهم من الطين تدفيهم ..
وبكف معروقه للدنيا .. تسميهم ..
·
ياليل ياعين
حيوا ويايا الأيدين الفنانين
إللى بتشكل صوابعها التاريخ
ع الحجر والصخر من زمن قديم .
البشر طلعوا القمر .. بالصواريخ ..
·
اصل الحكايه ..
العيون إللى بتحلم بالنجوم ..
شالت الانسان على أكتاف الأمل ..
حبه حبه يقروا في كتاب الطبيعه ...
حبه حبه قلدوها ..
ويوم بيوم ...
غيروا وجه الطبيعه ...
بالعمل ...
·
النقش فوق الزمن ..
وشالت الإنسانيه حملها وسارت
ومصر شايله الأمانه يادنيا من بدرى
والشمس كم في السما والأرض كم دارت
والخير فى قدمك
يا ملح الأرض .. يامصرى ..
·
حمل المحامل ..
والمصرى واصل طريق الفجر
واتقدم ....
عرقه دليله بيرسم سكة الأجيال
الطمى فى إيديه يقول .. والفاس بيتكلم ..
وتهل سود الليالى
يشيل معاها جبال ..
·
ودارت الأيام ...
دخل الملوك مصر سارت مجتمع مقسوم ..
أمر وكهنه وحاكم يظلم المحكوم ..
يا شعب مصر القديم ..
مين اللى قسمها ؟..
وانت صنعت الحضاره .. إنت معلمها
وانت اللى خليت شعوب ياما ..
تقوم م النوم ...
·
ماء الحياه في كفوفك ..
عجبى على ب>ره تصبح سنبله وكيزان
وعود صغير حطب ناشف بيعلى عيدان ..
وف كف إيد الرجال عمر الحياه ما تموت
حتى فى ليل الع>اب ..
حتى فى ضل الموت
طول عمرها خضرا تحكى قصة الأنسان ..
·
في الغيطان ...
حمل شيل حمل شيل
إنت القوه وأنت القدره
وانت الخضره لشط النيل
* * *
حمل شيل حمل شيل
ياما وياما ولا هملت
وعطيت ياما وخدت قليل
حمل شيل حمل شد
مد الخطوه عفيه ومد
شد القبضه وشد الحيل
* * *
شلت ياولد النيل أجيال
شلت وهديت ياما جبال
إهدم شق حيطان الليل
·
وفي المحاجر
تشر شمس الصيف على الأنسان .
شمس الضهريه الحرانه ..
راقده على ضهورنا العريانه ..
لاهى بتمشى .. ولا بتكن ..
* * *
حن .. ياصخر علينا حن ...
الدقماق فى إيدينا بيئن ..
* * *
الكرباج يفرد شراشيبه
للريح بتوديه وتجيبه
في اللحم الحى مابيون
* * *
عشنا جعان والميه عطاشى ...
بحر الرمال مالهش شطوط ..
شلناه ع الأكتاف بالطن ..
* * *
فتفت فتفت في الصوان ..
حن الصخر على الأنسان
والأنسان على أخوه ما يحن ..
·
وعلى الشطوط والموانى الغربيه ..
يحلم بشط صديق ..
شد العروق يا رغيف
شارب عرق سيال
إمتى تنام المقاديف
وينزل السقال ....
ياريس الغليون متشوقين للدار
جفت عنينا النوم
والقلب قايد نار
ياريش الغليون
وانت عليم بالحال
مين اللى حيودينا ؟
لعيالنا ولأرضينا
كل العيون .. ماتطوف
بين الشطوط وتشوف ..
النور .
تقول دى المينا
نرجع نلاقى أيادينا ..
متربطين بحبال ...
·
وفي الغيطان
ترحيله ورا ترحيله ورا ترحيله
ياخولينا الشمس عاليه
فين الضله
وإحنا عطشانين عطاشى
ولا فيه قله
* * *
عمر ما بارت غيطانك
ولا فيه مثيل زراعتك
داحنا مية نيلى زمانك
ياخولينا أكسر عصايتك ..
* * *
ياهوا ضل جنينتنا
ياطراوه
إمتى حنشوف حضن بيتنا؟
إمتى نرجع ...
إمتى نسمع
ضحك أولادنا وبناتنا ..؟
والشقاوه ..؟
* * *
ياخولينا .. حتى قرص الشمس ميل
ياخولينا إرحم الجهد القليل
ياخولينا بالهداوه
خللى لقمتنا القليله
تبقى فى البق حلاوه ..
لجل مره ينام عيالنا ..
ليله مرتاحين شباعى ..
إنت فين تلقى زراعه ..
فى الغيطان تشبه زراعتك ...؟
ياخولينا ...
وإحنا عطشانين جواعى ...
ياخولينا اكسر عصايتك ..

وازعق يا صوت المغنى ..
صابر يا جمل المحامل .. ياماع الجمال ..
طالع ونازل بفاسك .. في الصخور .. أجيال ..
والجوع مالوش قلب ....
كافر لما يتمكن ...
والصبر قتال
إ>ا لو مخلقش رجال ...
ونقول ياليل ويا عين ...
صبر الرجال محدود يادمعة الأطفال ...
·
واتقدمي ياخطاوى
ودقة فوق الوتد والثانيه ع السندال
ودقه مع بعض يبقى المستحيل ممكن
القوه نار وحديد .. والسر فى العمال
واضرب يامصري بسر القوة واتمكن
الفجر يضوى جوه فرن الحديد.
·
شق ف بطن المنجم شق
فتت صخر الجبل العالى
واسقى ترابه لهيب النار
خد من فرن الصلب القوه
فجر قلب الضلمه نهار
* * *
فات ياما لسه وباقى كتير
أزرع شط النيل مواتير
دوس العصر الحجرى أتقدم
دى الصواريخ في السما بتطير
* * *
دقة قلبك شعلة نار
دقة ايدك صلب حديد
مصر بتحلم فيك بنهار
أدخل بيها عصر جديد
شق صدور أعداءك شق ....
·
ودق باب بكره
وعدى يا مصرى بحر الليل بموالى ..
قبل وبحر وفكر كل بال خالى
دانت رويت الغيطان وأرضنا نشيتها
وإنت حييت الصحارى والجسور عليتها
والميه خليتها تزحف تطلع العالى
كمل بإيدك وقلبك سكة شقيتها
نقول ياليل وياعين
فو كفوف أيديك المستحيل ممكن.
وغنى يامغنواتي
للخلق والتكوين ..
بالأيد مع الأيد والقلب ويا القلب
نقدر نخطى سوا نقدر نواجه الصعب
وف حضن شطك يانيل .. الب>ره ماتموت ..
واحد وواحد سوا
تخضر ب>رة شعب.
·
ولسة المستقبل ..
حبه فى حبه ويوم يسابق يوم ..
كان ابن آدم يقوى .. ويتعلم
على شط نيلنا المصرى كان بيقوم
بكره حيحكم بلاده بكره يتكلم
بكره حينطق سلاحه وكف إيده .. يقول ..
وللدليل ع الطريق ..
الكلمة م القلب توصل قلب أصحابك
وندفى بعض إن قعدنا معاك على بابك
ياللى انت وحدانى فكر .. تلقى فى الصحبه
مشتقبل الدنيا واسال لمة أحبابك ..
·
وف حب مصر ...
قلب اللى مؤمن دليله للنهار وحاديه
مهما يطول الظلام .. الفجر ملك إيديه ..
وعشان بحبك يامصر
ضروري راح أقاسى
وح أغنى اسمك محبة لآخر أنفاسى..
وحط ياليل وخيم ...
إحنا مش ضعفاء
داحنا اللى كنا .. ومصر بتحفظ السماء
وإحنا اللى حنكون لبكره .. كلمته وأياديه ...

فى إيدينا شمس الصباح ...
باحلم بك يابكره
فى عيون الصبايا
تمسح دمع عينى
وتغسل أسايا
باحلم بك يابكره
يامرسى المراكب
ياحضن الصداقه
يابيوت الحبايب
باحلم بك محبه
فى قلوب البنات
تدفى تحنن
صدر الأمهات
تسهرنا نحكى .. لولادنا الحكايه
باحلم بك يابكره
يارغيف الجواعى
باحلم بك سنابل
واحلم بك صناعه
باحلم بك مداخن
فى غيط الزراعه
باحلم بك سفاين
وحروف للطباعه
أكتب إسم بلدى
فوق زرقة سمايا
باحلم بك أغانى فى ضل السلام
باحلم أبقى ريشه فى جناح الحمام
وأطير لجل أقابلك وافرد في سماك
وأبشر ولادنا .. بدقة خطاك
وأقول وأهل بلدى يغنوا معايا ..
واحام بك يابكره ...
·
ياراحة الشقيانين ...
على شط بحر الأنسانيه رسينا
وفوق بحور المستحيل .. حنعدى
يا مصر مدى الإيد خدى بايدينا ..
داحنا الولاد الطيبين وإيدينا ..
لحرام محرم عمرها ماتمدت ..
آدى السما والأرض ..
طول بالعرض .. شاهده علينا ..
·
والسكه شاهده ...
وكان الطريق يااولادى صعب وطويل
ولابد يا مصر تبقى جنه وهابه
وعشان يكون النيل .. وشط النيل
كونى يا أيد المصرى .. غلابه
·
والتاريخ شهاد ...
كم ياما صامت بلدنا وربت الاولاد
مصر اللى طول العمر .. ولاده
من صغر سنى براحى حضنها الوداد
وغنوتى لو تسح الدمع .. وداده ..
* * *
إحكى ياصوت الربابه ..
إحكى ياقلمى
على سكة الصعب كان يابلدنا مشوارك
خدنى فى حضنك يانيل
طهرنى من ندمى
وعلمينى يامصر غناك وأشعارك
باحلم أغنيكى طول العمر .. وزياده ...
·
يحكى الفتى ويقول ...
كنا صغار .. ياما ..
لعبنا فوق السواقى والسطوح ياما ..
طيرنا مع الزعاليل عصفوره ويمامه
غطسنا ويا الضفادع فى البرك والطين
مدينا خطاوينا ويا الحاره .. للميادين
ماء الترع زى النبات خضرنا
حبا الجسور زهر الكافور عطرنا
طرح الشجر فوق السكك بحترنا
ضى الفانوس ضى القمر .. سهرنا
نعصى كلام ألأم
نعصى كلام الخال
نسمع غناك الصبى فى كافة الأحوال
فى قلبنا يرتعش فرحك وآهاتك..
تسقينا م الحكمة ..وتقدرنا ع الأحمال
نفرش لك الضحكة سكه
واحنا بنشرب الأحزان ...
* * *
كنا النسيم الرطيب
نتشاقى فى الأجران ..
بكريه ياقلوبنا
نبع الضى ياعنينا ...
يارجل مدى الخطاوى وأتنفض يا لسان
خللى الغناوى العيره تلحق الأحلام
* * *
وتحت زرقة سماك العمر بيعى ..
أنزل بحور الهوى وارمح فى وديانك
تاخ>نى سكك الأمل يامصر وارجع لك
ترمينى ريح الألم
أمشى وأنا شايلك
فى كل سكه ... وغربه
بتبقى دارى وزادى وميتى والمال
وأنتى الكلام اللى يجعل قصتى تنقال
طول عمرى يابلدى من غير عزوه
من غير خال ...
وانتى يامصر الصحاب والأهل والقربى ..
وإنتى بيتى وأمانى بعد طول ترحال ..
·
صوت المغنى
حتى الغريب يلقى المان فى الصحبه
وقلب لاصحاب ساعات أدفى من القربى
وسكة صعبه تهون ..
لو تلقى صاحب .. صديق ..
يمسح عينيك م الأسى ويهون الغربه ..
·
فى كل واحد ... سندباد ...
مركب وحيده مبحره فى البحر
رزق العيال
والا عقود اللولى ..
الصيادين بين العشش ندهولى
قعدنا جنب النار
غزلنا حبل الود والأشعار
حلمت بالسندباد
وبالمراكب بعيده معطره بالقرنفل
حسيت فى حلقى حرقة الجنزبيل
حملت ياما سفينتى من البهار .. والفلفل ..
* * *
الصيادين قالوا الزمن ناسى
دار الكلام بينا ودار الشاى
مركب وحيده مبحره تايهه
ناكره طريق المينا .. ترسى إزاى ...؟
* * *
الصيادين فى الدروه دفونى ..
أخدونى ردونى لحضن الدار
فوق الموانى ولفت أطيار معديه
والليل قمر ونجومه مصريه ..
قادوا عشانى النار
وبالأمل عشونى
دار الكلام بينا .. ودار حوالينا
طير البحور زعق فى حضن السما
والغاب صلب عوده صمد للريح
طلع القمر ...
ضحك الكلام في عنينا
الصيادين شبكوا الأيدين فى إيدينا...
مركب وحبد كانت فى عرض البحر
رزق العيال .. واللولى
الصيادين دلونى لما قالوالى ..
قلب الرجال هو الأمن والمينا ..
·
روادة الرحله.....
فى الريح تعدى المراكب مبحره فى الريح
ترتاح قلوب الصبايا يفرحوا المجاريح
عديت بحور الشقا ونزلت بحر الناس
عشت الصباح زقزقه .. عشت المسا أحساس ..
ورخيت حبال المحبه غزلتها تباريح
* * *
وهيلا هوبه ..هوبه يامقدافى
عديت على شوك الشطوط وأنا حافى
شوق اليتامى بردتى ولحافى
والأنسانيه الورد .. والتسابيح ..
·
على خطوة الأيام ...
ياللى قريتوا تاريخ الدنيا وعرفتوه
وعشقتوا مصر وترابها وع الكتاف شلتوه
وزرعتوا غيطها وشجرها انتوا اللى خضرتوه
ياللى نشيتوا المكن والنهر حولتوه
درس التاريخ ياحبايبى هو باب بكره
ياحسرة الدنيا لودرس التاريخ تنسوه
·
غنوة الموت والحياه بين الحصار والعواصف
- أفتتاحيه -
حرب دفاع .. حرب هجوم
من أيامها لحد اليوم ...
عمر ماهديت .. عمر مانمت ..
عمر ماشافت عينك نوم
مكتوب تشقى يا أنسان ..
لجل تسطير ع الأكوان
مكتوب حتحارب طول عمرك ..
وتدافع عن الأوطان ..
·
الصدر
زاحف ضل الموت ..
ع الغيطان الخضره .. زاحف .
ضل الموت بيفوت ..
بكى سنابل قمحنا . مالت . دمعات سالت ..
ناحت ع السبل المفروط
زاحف ضل الموت .. ياسواقى
رمل صحارى
ريح وشراقى
ملح برارى..
يدفن فيه غيطا المحروت ..
زاحف ضل الموت ..
سقط زهر الورد
وعرى الأرض ..
وبكى الولد
ووقع ورق التوت ..

موت سلمان
أكتر أهل بلدنا .. ابعد حته راحوها
المركز .. والدنيا بالهم قد المديريه ..
أويمكن أكبر حبه .. مصر حداهم أم الدنيا..
مش عايزة كلام . وأكترهم مابيقروش الجرانين
يمكن قلة ماده .. أو يمكن مش رايقين ..
والحلم اللى بيقلق نومة أكترهم هدمه للعيل
.. وكتاب للبنت .. وأجرة دكتور المستشفى .
الميرى .. وف بعض الأحيان .. تمن البرشامتين .
والناس فى بلدنا بتشيل الهم مجامله على
طرف لسانها . مع إنه أبيار ف حشاش القلب
والصرخه لما هزت صمت الليل .. هز الرجاله
دماغ عدمان العافيه من الفكر
- عارفين .. عارفين ..
ول>لك محدش طل .. ولا عيل راح يسأل
مصمصت النسوان شفايفها .. وعم محمد كبر
فى الجامع زى العاده .. وف قلب القهوه
(عم أحمد) رش الميه .. وفتح الراديو
ودارى دمعه عينه ف كمه .. وعلا الأخبار
ولا طاوله ولادومنه .. ولاحتى الشاى
له طعم ...
- (سلمان) .. ما رجعش ..
أمه قلبت كل الدنيا عليه .. سألت
عنه طوب الأرض .. وندهت بأسمه
على كل القطورات .. وقفت ع الأسلاك
الشايكه م الأسماعيليه للفيوم .. ودقت
كل الأبواب الحكوميه .. ضاع منها تمن
الأردبين القمح .. إللى زرعهم قبل ما يترحل ..
ويروح ولا يرجع مع الأيام ...
فى قلوب الناس ياما كلام .. والناس
أحيانا تبقى هيه الكلمات .. لو مش راح تتقال
تنطق حتعض لسانها .. تتألم وتنام
كمدا .. مقهوره .. وحتمشى .. وحتعيش
تاكل .. تشرب .. وتجامل فى الفرح وفى
الأحزان .. من فوق الشفه مش م القلب
حتسوق المحرات وعيونها ف طين الخط ..
وحتكرى الانفار للرز وللقطن .. وتحسبها
وتطلع مديونه تحلم بخلاص الدين .. وبقرشين
لجل هدوم العيل وكتاب البنت .. ويمكن تسمع
راديو وتشرب الشاى .. والقلب حجاره ..
وف صدر الواحد منهم راقده جبال أحزان
- (سلمان ) ما رجعش ......
وإحنا اللى وصلناه بالطبل .. وبالأشعار
وقعدنا نحكى عنه فى الضل وهو بيشرب
لهب النار .. وبعتناله جواب .. وجواب
وأمه ندهت إسمه على كل القطورات ..
بعد الوقت مافات ..
- تايه فى الصحرا؟..
- يمكن ضمن السرى؟
سيان .. سيان .........
إلى ف قلب الرجاله .. غير اللى ف الرجاله أكبر منها
ومنى ومنك ....
يمكن .. حتى لو يوم راح ترجع .. أمك
هيه إلى حتفرح بك .. لكن قلب الناس
مكسور .. والمكسور القلب .. لما يهزه
ويعصر قلبه الكرب .. ما يحسش طعم
الفرحه .. لو نجم السما ينزل ف كفوفه ..
لكن برضه الناس عشمانه ف فرحه
فى بسمه .. تشد عروق الجبهه وجلد الخد
الحزنان .. عشمانه الناس وبتحلم ..
الحزن بيحلم .. القهر بيحلم .. والأمل الأخضر
برضه بيحلم .. من حقها تحلم .. تاخد
تارك .. من كل اللى غدروا بيك وبامك
وبالأردبين القمح ..
والحلم المجروح فى قلوب الرجالة ليلاتى
بيصحى ويدور فى الدنيا مع إيد (عم أحمد)
فوق مفتاح الراديو .. وهيه بتدارى دموعها
وبتترجى الأخبار ....
·
بكائية الست العجوزه
فاتت سنين ع الفرقه
فاتت سنين ياعيونى
مرار قلبى وحرقه وولادى لم دلونى
* * *
سهرانه أعيد حواديته
أفتح وارد الباب
متشوقه لحديته
فى لمة الأصحاب
القمح بات مستنى
ياعروسه نوحى وغنى
لامنه كن ف داره
ولاعرفنا مزاره
* * *
فوق الرمال كان ماشى
والشمس مش شموسه
والموت غشيم ضباشى
فى عمره زى السوسه
* * *
إبكى عليه ياشابه
دالموت زحف يتدبى
إبكى عليه يا صبيه
فى الصيف وفى الشتويه
* * *
(سلمان) ياولد الجارحى
يامهجتى وجوارحى
إنت اللىكنت هنايا
صبحت همى وجرحى
* * *
ولعت نار لحمومك
وقعدت أستناك
أغسل عناك وهمومك
ياريتنى كنت فداك
* * *
الغيبه قاسيه
وانت هناك عريان
إبكى يارملة سينا
وأندهى الشبان
·
حتى م>كرات جندى لايحارب
انا انهارده حزين
وحزنى مش يائس
أنا النهارده حزين
كما جميع الرجال فى الدنيا حين تحزن
أنا النهارده .. حزين
والحزن مش عيبه
الحزن نار- لو أصليه
تصهر قلوب الحزانى تبان معادنها
أنا النهارده حزين .. والحزن مش عيبه
الحزن ريح عاصفه
تقلع وترمى القش غاب الريح
لكن تثبت شجر أيامك الممدود
فى طين غيطانك – لو كنت صاينها
* * *
انا النهارده حزين والحزن مش عيبه
الحزن ماء الحياه
حين تاخدك ال>كري
وتحط أيدك فى إيد احبابك الغايبين
وتفكر اللى ف زحاف الدنيا نسايين
* * *
انا حزين ..
وبرغم >لك أبتسمت
وتحت ضل مدفعى اتركنت
وسرحت ما فى القلب من تباريح
بكل جوارحى
حزنت ... آه ... حزنت
أنا حزين ..
أصلى أفتكرت
(سلمان) اخويا وابن خالى الجارحى
إللى اتقتل فى سينا – من سنين
·
ترتيله مصريه قديمة
يامركب الشمس
ياشارده فى طريق الغرب
ياواخده منا حبايبنا لوادى الموت
لو النواح كان سلاح
أنا كنت أشق القلب
واشق صدر الرياح .. لجل الأمل .. مايموت..

الفارس والحلم الأخضر
رفرف يا قلبى محبع على شوارع بلدنا
وعلى الحوارى القديمه كون أمل وحنان
وافرد ياصدرى جناحاتك ..
وخد فى حضنك ولادنا
وكون فى حر الصحارى لشعبنا البستان
ولازيى حد يامصر عاش فرحان بك
ولاحد قدى قاسى م الأحزان ..
لو تطلبى لولى البحور ياحبيبتى ..
أشق موجها .. لو جبال وانزل لك
ومن رموش المستحيل أغزل لك
حريرك السلطانى ..
لو تطلبى القمره لا طير بحصانى ..
أطير فى أحضان النجوم .. وأطلع لك ..
وأجيب لأبنى وأبنك الحواديت ..
وابنى عشانك عالى البنيان
* * *
انا ياحلوه خضار الزرع والفدادين
وف قلبى قدره تاريخ الشعب .. والملايين
قوي انا مثل الجبل والطين ..
لكن فى بعض أحيان ..
بيهزنى الحرمان ..
والظلم والنكران ..
طعم الخجل أنسانى..
مالح ..لكين إنسانى
باحس إنى ضعيف ..
واحسنى خايف ..
باخاف ياحلوه تلفنى أحزانى ..
باخاف أتوه فين ما الطريق ودانى ..
وينكرونى الناس ..
أنكر أنا حسى ..
مدى الأيدين ياحبيبتى .. خدينى من نفسى ..
ورشرشى على سكتى الحريه ..
ردى عليه تيابى ..
وأغسلى الأحزان
* * *
عينى ياليل ع اللى كان ياما كان ..
عينى ياليل ع اللى بكره يكون
إحلم ياقلبى واسبق الزمان ..
ياما حتيجى ايام .. تروح أيام ..
ولا يبقى فى الدنيا ع>اب ولا فرقه ..
ولا دموع فى السر قهر وحرقه ..
ياما حتيجى أيام ..
وآخدك واطير بك فى الخلا بحصانى
وتصهلل الخياله والأيام ..
وأحس أيام الصبا من تانى
أشرب من النبع القديم بحفانى ..
واهتف بعزم القلب فى الميدان
انا باحب الشعب .. وباحبك ..!
·
ماء الحياه ...
ياب>ره يامغمضه فى الطين وفى الميه
مدى دراعاتك لفوق .. للشمس ..للأنوار
وسيل ياعرق الغلابه فى الفروع .. حنيه
الطين بصيبح عسل وورد ع الأشجار
خضر غيطانى يادرع الفاس
خللى المغارب .. تنده الفجريه
الشمس راحت .. لم كل الناس
عرقنا ملح وعيش على الطبليه ...
·
ياضى لعيونى
ياقوة لايديه
يا فلاحين ..
يا زارعين الحلم فى ضلوع الحجر
ياغراسين
يامشوقين للفجر أحلام البشر ..
إزاى حالكوا ..؟
والشافعى .. والجارحى .. وامل ..
والجسر ..؟ والحوض اللى ع البحر القديم ..ظ
ازاى غيط الخمس ..
والسبخايه والساحل وغيطان الدومين ..؟
موالى شارد ع الغيطان زى النسيم ..
جاى من بلاد الغربه مع ريح الفلا ..
يحجل على كتاف الغيطان ..
وفى الخلا
يركع قصادكم زى ما ركع الولى ساعة صلا ..
قدام تباريح السنين ..
يغسل بدمعه .. كفكم ..
يستغفر الزمن القديم ...
* * *
يا مغربين ومشرقين وسط الحبال
يا مقدفين ل اللقمه فى بحور المحال ..
ومعشمين الولد بالهدمايه .. واللقمه اللى حاف ..
ياعاصرين قلب الجفاف .. خضره وحنين ..
زى المطر على كل أرض مشققه
متغربين ..
زى السحابه فى السنين الضيقه ..
ودوارين بين السكك ..
من الواحات للغردقه ..
من كيما لعتاقه لشبرا لمشتهر ..
مسهرين الليل على نغم الشقا ..
قلبى الصغير .. غنوتى ..
عاليه كما عاليه صفافير المكن ..
شايله هموم الليل على دروب الزمن
تضحك لكم
ضحكة رغيف القمح فى حلق الكانون ...
بتدق أبوابكم بكفين معروقين ..
تنده لكم
يا أسطوات يامقنفدين فى الدكانات الضيقه ..
يامهلمين قلب التعب مواويل محبه رقيقه
تسرى كما دخان حزين ..
تريم على الجدران خيال الفوانيس ..
وتمد ضلى ع الرصيف من غير ونيس ..
باحلم بإنى ف حيكم
باسقى عطاشى الليل عصير قلبى الضعيف ..
وافرقه فى حبكم رغيف .. رغيف
يا ملاحين بحر السويس ..
يامكتفين موج العواصف فى الهويس ..
فوق كفكم نشفت جبال الملح أمواج البحور
وبتحلموا ببدر البدور
ترجع معاها الحنه للولد العريس ..
فردت قلبى قلوع فى ملقف حبكم
قطعت فى بحاركو المراسى والحبل ..
عنيت لرمانه ..
وغنيت لاربعين مواويل طوال ..
إيه اللى باقى م الكلام ...
من بعد ما رفرف على سطح ( الغريب )
طير السكات ..
واتفرقوا الخلان .. وخليت الساحات ..
وحط فوق بحر ( الزيتيه) ليل غطيس ..
باحلم بكم ..
نغزل سوا الفجر النميس
هدمه وقميص ..
لصبيه فى الغربه بتحلم بالعريس ..
وولد بيتهجى أساطير القلم فوق الورق ..
وعجوز بيحلم بليل نهار ..
إنه فى لهيب النار وفى بحور العرق ..
حيصحى من تحت التراب تانى ..
وحيشوف السويس ..
·
نوبة صحيان:
الفاس تشق الغيطان الفاس يشيل الأرض
ويعلا صوت الفلاحين للفرض
وسط الجناين بلابل .. تحت التراب أشلاء ..
والدم تحت الرمال يندهنا بالأسماء ..
وسط الليالى المظلمة ينده علينا ..
م الأرض يعلا للسما .. يملا عنينا ..
ويسد باب المرحمه لو يوم نسينا ..
* * *
قوم بدل الفاس بسيف . قوم عمر المدفع
ىن الأوان ياغريب الدار تعود .. ترجع
سينا وشطآن الخليج يابلادى ..
والبرتقان والزيتون والدم بينادى ..
يامصر قومى وافردى جناحاتك ..
قومى انفضى القهر قومى رجعى الشهداء.
·
الميلاد الثانى
إبنى بيتهجى الكلام .. ويقوله
عرف لحد الألف .. بكره يقول البيه
وبعد بكره حيطلع للقمر ويطوله ..
ويكتب الكلمه م الأولأ لحد ألييه
* * *
احلى ما ينطق فى الحروف .. (الميم)
و(الصاد) .. و(راء) من بعدها تامين ..
مصر العزيزة أمنا .. والعزوة
هيه الكلام ياابنى .. وهيه سلاحك ..
هيه أبتداك .. هيه أنهاك .. وفلاحك .
هيه الحنان .. والحب والحنيه ..
وهيه برضه المرحمه .. والدين ..
وأسمها يا ابنى يدى .. للغنا معانيه
·
ومصر تعرف سكة الصبحيه:
مصر بساتين القمر
مصر غنيوة النسيم بين الشجر
مصر قلب الأمهات
وضفاير البنات ..
ومراسى الحلم وموانى المراكب
مصر احضان الحبايب
مصر واحات الصحارى..
مصر عنا قيد العنب سمك العصارى
مصر عيدان القصب ملح البرارى ..
مصر ريحة الفل والطين والمطر ..
* * *
مصر قمصان الصنايعيه على حبل الغسيل
مصر طمى النيل صفافير المكن
والخطاوى اللى من الفجرية بتسابق الزمن
مصر طين سبتمبراللى بعد مشواره الطويل
رفرفت جناحاته فى صدرى .. ورجع لى م السفر .
* * *
أمنا مصر الحبيبه ..
عم توفيق .. عم صديق العجوز ..
وبنات أختى الكبيره
عم صابر والمغاورى النادى ومجاهد شطا
خالتى خضرة
والعيال السمرا فى هموم التراحيل الكثيرة
اللى شافت ياما فى الصيف والشتا
واللى زى السطح والأجران ..
تشرب الأحزان ..
تنام الليل بلا فرش وغطا ..
مصرنا الأم الحبيبه .. الباقيه لنا ..
الى عاشت عمرها تشق الخطاوى فى الحجر
* * *
مصر غيطان الرياح
مصر أصوات التلام>ه فى الصباح ..
مصر عابدين المظاهرات القديمة ..
مصر زفتى ملوى برديس جهينه..
مصر ميت سلسيل وشبرا
مصر شهدا الجامعة الأزهر
مصر حلوان دنشواى كمشيش وسينا
مصر غنيوة الألم .. لحن الجراح ..
اللى عايشه العمر تتحدى الزمن..
والأسى وسود الليالى والقدر ..
عمرها تزققنى ألحان الحماسة ..
أعشق الأحلام .. ولا أخشى الخطر
مصر تعرف فى السياسة ..
عارفه إن الشمس فوق سينا يطلعها البشر
·
ومنين أجيب ناس ..
وإحنا اللى فوق صدرها غنيوة التراحي
وعمرنا .. صبرنا . سايل عرق سلسال
ياحبة القمح .. يادرب الشقا ياطويل
يالقمة شقيانه فى حلم اليتيم موال
إحنا المراكبيه فى بحر العرق يارغيف
فى عز ليل الشتا .. غنينا .. بالموال
عرفت أيدينا القلم وعشقت المقاديف
إحنا يامصر الولاد والعزوه والرسمال
قطعنا حر الجبل يابلدنا عز الصيف
لجلن نخفف عليكى السكة والأحمال
وصبرنا ياما ياليل صبر النخيل والنيل
وحلمنا كم بالهلاليه .. وبالأبطال ..

على عتب بكره ...
إبنى لبس مريلته ..
حضن كتابه
وفرد درعته على الآخر .. ونزل السلالم
- تروح وترجع سالم
شايف الزمن على خطوتك يتلفت
ولمحت بكره ف عيونك
فاتح لنا أبوابه
إبنى وصحابه .. أغانى
فى الطريق ماشيين ..
* * *
كان جدى يابنى بيحكى لى عن الأيام
كان ياما كان كان نفسه
يعرف حروف الكلام
كان ياما كان كان نفسه
يطول زمانه .. يلمسك بأيديه ..
يلحق زمانك
ويلمح ضحكتك بعنيه .. وبودانه ..
* * *
- مع السلامه ياجدى ..
يا عطر شجر السنط والجميز ..
ياريحة المنقد وطعم الفطير ..
وقشطة كياك واللبن والعجوزه
وعرق المعيز ..
كلامك وصية شايلها فى قلبى ..
"جدور النباته
تشيل السبل
وطين البرارى
بيطرح أمل .."
* * *
وآدى إبنى شايل كتابه الصغير
وقلمه الصغير ..
وعارف حكاية الأميرة الجميله وشاطر حسن
وماسك بايده الحرير الصغيرة .. عصاية التاريخ
وواقف على بوابات الزمن ..
وماشى قصير .. قصير ..
بيصلب فى طول القصير ..
ويقرا الكلام اللى ياما ياجدى سمعتك .. تقوله .
·
من قبل قبل التاريخ ..
دمى بدرته فى أرض الجنه ما اخضرش ..
عرقى بدرته فى أرضك ضلل الطرقات ..
خضره ونبات .. وحياة ..
أنا ابن عيش الدره والملح والبتلو
أنا ابن حبق الجسور
والطمى الغنى والطل ..
رضعت يامصر من صدرك لبن العصفور
خلانى أفرد جناحى ع الفيافى نسور
ألمح صباحك صباحى ..
أبنى على جراحى علشانك مدن وقصور ..
* * *
أنا شلت فاسى وقلت اللى بعيد يقرب
وقطعت سكك البرارى الصعب والأصعب
زوادى كلمه وأمل .. وميتى أسمك ..
وكتابى لو ت>كرى .. حواديتك المنسيه
شايله على قلبى .. قله وزاد ودفيه ..
أنده عليك فى الصحارى والهجير والشمس
طوبه وكياك برهمات مسرى بؤونه بشنس
عطشان يابلدى ونفسى من إيديك اشرب
فى الليل أنا متغرب ..
بابعت غنايا بيسرح للبلد موال ..
يحضن صياح الديوك فوق البيوت للفجر
لنا فى حضن عيال
لنا ف رقبتك وعد
تشمى ريحتنا ساعتن ما تشمى الورد
وتمدى أيدك لأيدنا .. نمشى يد ف يد
لا نخشى سود الليالى ولا نهاب من حد ..
داحنا يامصر أبتسامتك واحنا دمعتك ..
واحنا التراب اللى راح تمشى عليه للمجد ..
·
الرجاله ..
حسين المغاورى الخطيب .. كمسارى
وعباس حنيقد .. منجد
ومسعد .. منادى وبياع جرايد..
وأحمد سليم بيزرع غيطان اللى عنده
وعبده بيسرح بحبة بضاعه
وباقى الجماعة ..
عصام .. صبرى مدحت معاهم مؤهل
وممدوح صنايعى نسيج
ويبقى اللى باقى
شاوبش الفصيله وده كهربائى ..
وغير اللى فى الخدمة احمد وسيد موافى ..
وعبد الصبور البلاسى .. اللى كان فى جماعة عبور
وصابع إيديه الصغير . . تاواه أنفجار ..
نهارهم ف قلب الخنادق..
وليلهم بنادق
ونومهم طشاش ...
لأن القضيه اللى صاحيه ف قلوبهم
بتسهر معاهم ..
بتحلم بساعة خلاص الرجال ..
بساعة الميلاد من جديد
بساعة الميلاد اللى يصهر فى ناره الحديد
يدوب جليد الأسى ..
ويوصل ما بين الشطوط ..
عشان البيوت البعيدة تقيد المواقد ..
تدفى المقاعد .. تعلق غسيل ..
عشان العيال يرقصوا .. يفرحوا ..
برجعة أبوهم من الشغل تانى ..
عشان الرجال .. يرفعوا .. جباة الكرامه لفوق
شوق لحضن السما .. والحمام ....
فى ايام عزيزه .. وأيام .. سلام ..

البنادق ..
عم الصديق الصحصاح ..
فلاح .. ميت سلسيل ..
مصرى ..
دمه شارب من ماء النيل ..
أسمر وأصيل
زى الجامع و ( المورده) والمدنه
وقبة سيدى مجاهد والسبخايه ..
والتل وخوص النخل واحزان الليل ..
عم الصديق الصحاح ..
من ست سنين ماقابلتوش
لكنه دايما ويايا ..
نظرة عينه ..
كفه المعروقه ..
طراطيف أسنانه وصوابعه ..
إللى من شرب الدخان محروقة ..
ولفة ايده للورق البفره ..
وكلامه ..
وآه يانى من هم كلامه ..
فى عز الليل بيصحينى ..
وياخدنى ف حوارى بلدنا النايمه يرمينى
فوق سطح بيوتها يحدفى يطوحنى ..
يمرجحنى .. يموتنى .. يحيينى
على كل أبواب الدور النعسانه
يوقفنى ويفكرنى .. وينسينى ..
ويسيبنى وحيد
وسط العمارات العاليه والعربيات ..
غرقان فى بحر الزحمه
أحلم بالفاس فى غيدين أعرفها ..
احلم بالمحاريت بتشق غيطان أعرفها ..
بالمناشير المواتير
العجل الدخان الصفافير .. اللى أعرفها ..
ببنادق كنت أعرفها .. زمان
وكانت تعرفنى ..
كل صوابعى كانت تعرفها ..
ودراعى وكتفى وكف إيديه كانوا أكتافها
عم الصديق >ات نفسه كان شاهد ..
شافها وشافنى .. بعينيه الأتنين ..
لما كنا اصحاب ايامها ...
وكنا مع بعض فى سته وخمسين ...
·
الطريق ..
اثر القدم يشهد على اصحابه
والمستحيل يخضع لطلابه
يامصرى بالكلمة شق الصخر والجرانيت
النصر بالديناميت .. يفتح لك ابوابه ..
·
الوعد أمانه ..
ياأرض ياشراقى
فات الكتير وباقى
وياما باقى كتير
قد مالفت سواقى
راح أدور مواتير
علشان اطفى اشتياقى
والبك حرير ..
* * *
ياارض ياسواحل
قلبى لشط راحل ..
يربض بين الخنادق
ويتبت فى المداخل
ياريتنى ألف راجل
ويموتوا على البنادق ونصحى تانى نقاتل ..
* * *
يامصر قلوبنا .. مشوقه
لو نمشى ع الشوك فى الشقا
نحكيكى م النار والرياح .
وم الشمس المحرقة .
ونفجر الليل بالصباح
يملى غيطانك زقزقة .
·
الجرح والبلسم ..
ولاح اخد براحى
ولاتهدى جراحى
إلا اما يسيل دمى
وتعرف كفى طعم سلاحى .
دي الرجل الغريبه
فى القلب خناجر
يامصر الحبيبه
إتصفى عساكر
لاوقت لنواحى.
*
وآدى صدرى سلم
وسكه لرجوعى
ملعونه يادموعى
يوم تزحف جموعى
تخرس الأحزان فى قلبى
حين ينطق سلاحى ..
*
ياما شافت لما شابت لاولاد والصبايا
واحنا ياما كتافنا شالت .. ما قالت كفايه
ياشمس الأضاحى هلى ..
قلبى نبضه صاحى
لو تطلى .. ف بحر دمى ..
راح تهدى جراحى ...
*يامعدى الشمس لسينا ..
ياما صبرنا ياما .. ياما قسينا ..
واتع>بنا كتير ما نسينا .
رسى ع الخلجان مراسينا ..
فوق بحور الدم عدى طلع لى صباحى ..
·
عشان الربيع ...
إيدك ع الزناد
قلبك ع المصانع
خللى ضحك الولاد
يغلب صوت المدافع ..
*
إيدك ع البندقيه
قلبك ع الغيطان
خللى عيون الصبيه
تحلم بيوم أمن
*
يا ابو العيون بيادر
ياأبو الحضن الوسيع
تهون كل الخساير
لجل يعود الربيع
·
الندا ...
ياقلب يامقهور فى كل مكان
باناديك بطول التاريخ ياقلب يامقهور
فتت قلب الجبل ورفعته فوق عمدان
وقدرت ع الصخر وبنيته قصور وقبور
باحلم بيوم ماتقوم .. وتملك الأنسان ..
·
الخطوة الأولى أصعب الخطاوى ...
غزلت توبى وفصلته من الأخطار
ومشيت به وسط الخطر ..
عديت جبال النار
ياقلبى ياعاشق هوا بلادى ..
ياقلبى يامحروق على أولادى
مزع هدوم الأسى ..
والبس تياب لانتصار ..
·
إسم مصر ..
ولإننا بشر ..
بنعشق السلام ..
ونغنى من قلوبنا للنسايم والحمام
وندور السواقى
ونحرت الشراقى
ونعوج الطواقى
حين يتكتك المكن ..
وتزهر البراعم الصغيره ع الشجر ...
* * *
ولإننا بشر
بنشقى لجل اللقمه والهدوم ..
وبنشتغل كأننا خاليين من الهموم
وبنحلم بالهنا
وبنجمة السما ..
ونطير مع السحابه
ونحلم بالسفر ..
* * *
ولإننا بشر
بنعشق الغنا
شباعى أو جواعى ..
نغنى للهوى ..
ونغنى للدقيق ..
ونغنى لجل يعى ويعقد السبل ..
وتبان معاه بشاير الأمل ..
ونغنى .. لو تضيق ..
ونفرح بالصديق ..
بالنخله لما تطرح ..
بالبيضه لما تفقس
بالطفل لما ينعس شبعان ولاقى مطرح ..
ونقوم م الفجر نسرح
فى الشمس فى المطر ..
* * *
ولإننا بشر ..
ندوب هوا وغرام ..
وآى نعم .. تهزنا الصداقه ..
ويهز قلبنا دفا الكلام ..
وننتشى ونفرح ..
بخطوة الزمان ..
وهيه فى الجناين
بتلون العيدان ..
وهيه بالمحبه بالصبر بالحنان
بتدور الصبايا ..
وتدور القمر ...
* * *
ولإننا بشر
بيصبح إسم مصر .. صوتها ..
كلمة القدر ..
بيطهر ال>نوب ..
ويفتح طاقة الأمل ..
ويفجر القلوب نيران للحرب .. للعمل
وف ساعة الخطر ..
يقدر الأيدين المعروقين الشقيانين ...
تشد زندها .. وبعزم جهدها ..
بعزم ما فى قلبها من الشقا وم الع>اب
وم الحنين ..
تقطع رقاب عدوها ...
وتنطق الحجر ..
·
الوصية ..
باغنى م القلب
وامشى خطوتى
وأقرا الجرايد ..
وأفهم فى عيون الناس
الفاس فى إيدى ربابتى ..
وغنوتى وفنى ..
وقلبى يامصر فى حبك وتر حساس
كل الحوارى تحبنى .. وتعرفنى ...
دانا ليه فيها بيوت ياما
وليه أصحاب
وغيطان بلدنا حضنها بيلقفنى
تفرد عشانى دراعتها وتفتح الأبواب
يامصر .. إنتى الأمان والأمن والإحساس
لاع>اب
ولا موت
ولا غوله تخوفنى
لكن إ>ا ما الليالى اتدورت تخطفنى
أمنه لتغرقينى
فى بحور الناس ..
·
الأخراج الفنى والغلاف للفنان : حسن فؤاد
صدر الشاعر : - أغنيات للأيدين السمرا
إخترنا للفلاح 1967
- كلام من القلب
دار الكاتب العربى 1967
- إخترنا للفلاح 1969
تحت الطبع : -
شطوط الحلم والحواديت ..
أشعار مصرية – سمير عبد الباقى
رقم الإيداع 6018/1972
مطبعة أولاد عبده أحمد