شمروخ الأراجوز 4
شكشكة شعرية بالفصحي و العامية
إدمان
ألا إنى تعودت انكسارى
وأدمنت انحرافى عن مسارى
نهارا تهرب العنزات منى
وليلا يختفى عنى حمارى
شموس الغابرين إلى شروق
وشمس حالفة ما يطلع نهارى
بنا الأجداد من عظمى فخارا
وعشت أبيع للخبز افتخارى
إذا ما قلت صلت وجلت نخعا
أنا عربى ومهد العز دراى
ألم تر كيف ذلك الأرض نفطى
وكيف الغرب يرضع من دنيارى
جنود الأرض أدعوها تلبى
وحتى الجن يرغب فى حصارى
فلا تطلع لى فيها يا واد يا فندى
وخدها منى كلمة ولا تمارى
بلاها القدس وبلاها الأراضى
غراب وخطفها يوم عز انتصارى
وطار، صابتنى فى عقلى البارومة
بفضل الأمن فى الحقل اليسارى
فأدمنت انحدارى عن مسارى
وعايشت الهزائم بانكسارى
فإن فلسعت يوما من مدارى
فكن سندى ورد لى اعتبارى
وخلى عنك من قصة حياتى
فقد مسحت مراتى نص عارى
أنا اللى كنست حوش الست عارف
مكانى فى التاريخ حوض المجارى

==========================


اتذكر
فى عالم بتموت فيه الأطفال
م الجوع
وبيبنى تجار الحرب المجد
من عظم الأجساد البشرية
فى عالم
نصة مسفوح الدم
وعريان
محكوم بالقوة
والنص التانى
بينام على صرخة فزع الأطفال
من حلم الحرب الذرية
فى عالم خايف مرعوب
غالب بالعنف ومغلوب
وبتحكم فيه القوانين الحميمة
القوة بتصبح هى الحق
والكلمة الكدابة
تصرخ وترفرف فوق العمارات
يبقى الباقى للمنهوب المطلوب
فى أى مكان أو أرض
إنه يفجر بركان الرفض
ويموت
فى لهيب النار
لجل تعيش للإنسانية
وللمستقبل
كلمة لأ
تفتح فى السور الأبواب وتشق طريق الحرية
واتذكر
وانت بتقفل بابك لجل تنام متطمئن
كل مساء
أن الألوفات فى نفس الساعة بتموت
فى الف مكان
من أرض الناس والبشرية
بتموت م الجوع أو تحت نابالم الطيارة الامريكانية
--------
فى الهلمة
قوم قول شى الله يا طاهرة واظهر بعض المهارة
ح نخش فى المظاهره وح نهتف بالإشارة
الكل الوقتى رافض الكل مع الحجارة
كله يعارض حتى جوز الحمارة
فاملا بقك ح نهتف من بحر الثورة نغرف
عم التاريخ مستف ندوة تبع الوزارة
فيها خبير التراضى ورقاص السلالم
وسمسار الأراضى ووكيل الست هانم
مع الواد المرازى ولعيب التوازى
وزعيمة الغوازى بالنضارة السيجارة
على خبراء الخرايط ونجوم الاستلايط
واللى طبيخها شايط فصيحة العبارة
مافيش بينهم مجامل الكل جاى يناضل
نضال جذرى وشامل ح نشمع الدوبارة
واللى رسماله بقه أو غلبه علينا زقه
أو زرجن يبقى حقه مكسبنا فيه خسارة
كان اللى كان ما كانش الصدقة كدبة يمشى
الواعى باع ما باعشى وان خد الاستمارة
ناسك وهمه همه إياك تقول لى أمة
الزيطة فى الهلمة والخطة فى الاستخارة

=====================

حكم الفته شرعى
نرفض ونرضى قرعى
فين أيامك يا مرعى
السجن طبخ بصارة
واللى مات فى الزنازن
زى حرامى المخازن
ما دام فوق المآذن ينخع ليلا نهارا
بميراث جهل القبيلة
فخر الخيبة التقلية
نسينا أنه شاتيلا
مصيرنا حارة حارة
والحال عمره زماهو
العبد وله إلهه
فقوم وادعى لنيتاهو
يشاركنا فى التجارة
نضمن بيه كله مكسب
نفط وفوسفات ومحلب
والحال ح يبقى مقلب
لو شن فجأة غارة

======================


فزلكة تاريخية
التاريخ حواديت
أو ع الأكثر حكايات شعبية
أو رسمية
فيها بعض حقايق وحوادث واقعية
عن والى كان عبد رقيق واستعفى
عن مماليك أكلوا مال النبى همه
وحريمهم
بالفقه
أو عن قيصر
ضيع امبراطورية
وهو بينزع عن جسد الحرية حزام العفة
عن ملك استنفر شعبة لموته فجائية
عن أمرا ووزرا
وحرامية وزعما دبحوا شعوب
فى حروب دموية
دينية وقومية
حفاظا ع المظهر
عن قواد شيدوا على جثث الخلق حصون وقصور
علشان تتدمر
واكثر ما فى حواديت التاريخ انسانية
وجمال
اللى بتسحر قلب وعقل الكمل والهمل
واصحاب الأقلام
هى اللى نتحكى على قد ما فى الكدب خيال
وتصور على قد ما تقدر تهاويل الأحلام
أوهام العامة عن الجنس الأرقى والوطن الأكبر
فتعتق اكثر تصغير تكبر
ترجع تقلب ع الوش التانى
الأخطر
تحير عقلك ما بين بول بوت وشارون
ما بين بوش وما بين هتلر
لكن فى كل الأحوال فتح مخك واحذر
أن التاريخ مع كل قراية
أو منفعة أو غاية
ولأيها إنه بيتغير يتفسر
طبعا على دين أم مزاج اللى فى إيديه المدفع
فى كثير م الأحوال
أو وياه قلم السلطة الأحمر
حتى لا ننسى
الدم فى طبق الرئيس الامريكانى
الدم فوق صدر الوزير المعجبانى
الدم فى المزيكة
وف نوت الأغانى يكتب
شعاراتنا على حيطان المدينة

==========================
يعطيكو العافية
إيه ذنب الجغرافيا ؟
ما تجيبش الذنب على الجغرافيا
وتقول لى
الصحراء والندرة
بلا قافية
وتدور لى ف غضب الريح
والأنهار عن شماعة
تعلق فوقها ذنوب الذمم الخربانة
وهموم الأرض البور
وعذابات الأمم
اللى بتخرج من أزمة
لنقرة
لدحديرة
لمجاعة
وتقول لى بكل نطاعة
الكثرة بتغلب كل شجاعة
يعطيكو العافية إيه ذنب الجغرافيا
إيه ذنب البحر الأبيض
فى اللى احتلوا شطوطه
وهمه مالوهمش فى صيد البحر
إيه ذنبها مرتفعات الهملايا
وأفغانستان فى الجهل
ايه عيبها الدلتا
فى رخاوة العيش اللين
والرزق السهل
ايه عيبه البدر
لما يشتت جيش الضلمة بطلايع النور
فيفضح لوع الحرامية
وسياسات الغدر
ايه ذنبها ليلة القدر
فى كفر الزعما معتادى الإجرام
والقهر
هل تعلم يا همام
أن الراجل الاسكيمو
.. بيهجر بإرادته قبيلته
لما بيكبر فى السن ويحس أنه ح يموت
لجل يموت وحده
زى الشمعة أما بتبهت فى ليل الأحلام
لأنه بيخاف ويستحرم أنه يقاسم
عيلته فى لقمة أطفاله
ويخاف من نفسه – واللقمة شحيحة
أنه فجأة يخطر على باله يحرمهم
أو يخطف منه حتة لحمة حرام

=========================


من نهنهات المشيب
باين الزهور
راح تفتح فى الربيع يا سمير
وكنت طول الشتا
للحزن عبد أسير
القلب صحرا
يباب بادت مداينها
فجأة ينعنش جناينها
نسيم وعبير
رجع إيمانك يا شاعر
تانى
بالأساطير

==================

فى حب مصر
على باب الألفية
عصر البشوات راجع فاضى
الأومباشى اصبح قاضى
يحكم على بكرة بالماضى
فى الرمل يراه وفى المندل
شغل راسك يا ابن بهانة
أمك عيانة وجعانة
خدوا لقمتها للهجانة
وبلاها العشق بواد أهبل
حفظت آيته رفعتع رايته
من جوعها خبزت له جرايته
بات ينطح بغباوته مرايته
كسر قرنيه ولم يعقل
دكتاتورى
ديمقراطى
يعلا مع الموج لما يطاطى
طالع مهما السلم واطى
واذا هرب الحظ تمهل
الحظ ضرب له فنحسنا
وحبسنا ف كتمة أنفسنا
قلعنا لباسنا لحراسنا
رهن لاسرائيل المغزل
خطة رسمها له أبو ريالة
لبسة كرافته من البالة
وعمل ندوة لشرح الحالة
يحسمها بالحل الأسهل
والأسهل فيه أسهل منه
حتى البرغوت كسر سنه
وجابو الدكتور والذى منه
نقل الأحزاب إلى المعمل
ح تغنى فى ضل الصفصافة
والعيان توصف له جوافة
وتصبرنا تصنف ثقافة
تسلبنا الروح فنتجمل
يرمينا المر على المالح
نتباهى بالفعل الفاضح
والآتى نسخمطه بالرايح
ونصدق أجهلنا الأهبل

=======================


أراجوزات مصرية
النكدى
سياسى أنا
علمنى الحزب
إنى أكون حزب بشعرى
ماليش مجلة شلة وعب
ولاف جهاز يرفع سعرى
عشان كده .. عاشق
وباحب
ونكدى
غضبان طول عمرى
أشب بعصايتى
والب
لذا محيرهم أمرى
-----------
رباعية وربع
اللى مضروب بالقديمة لما يصفع يختشى
وانت راجع من غيطان العيبة شبعان منتشى
ليه تقول مغصوب وكان صعب الهروب
وانت من يوم ذلتك حالك مشى
****
والشريف لوحتى جاعوا اولاده عمره ما يترشى
------------------
فى الحب كالحرب كل المدبوحين شهداء
إلا اللى بالكدب العاشقين بغباء
وانا قلبى غير القلوب يفرغ لدق الطبول
طبعة الخجول عوده ما يبوحش بالأشواق
****
ويخاف قوى من هاتف الشعراء فى الأسواق
------------------
شرط نور
كل المطلوب
يا جعر
تردم ع السر
تهمبك
للهمبالك
وتعك مع العكاك
تشهد زور
وتقر
ريحهم يبقى هواك
يرخوا الحبل معاك
يعطوك لقمة
تبر