الشمروخ 33

شمروخ الأرجوز
33
فى أمور البرطعة
يا طبيب جراحى اللى طابت ليه تعاودنى؟
عندكش يا طبيب دواء لوطن معاندني
برطع
لم المقاطيع حواليك واتمتع
ما تاخدش ف بالك
أوعى الخوف يرعش رجليك
وألا الأخبار السو تبريش فى عينيك
لو تقلق ح تفلسع
زى اللى قبليك
فارزع فى بطنك غيط بطيخ
وأبلع
الجنة ماهيش أجمل من شرم الشيخ
ولا اروع
واللى ح تاخده القرعة أم ضوافر
تاخده أم ضفاير أجدع
دلع نفسك دلع
وأوعى تحط ف بالك وانخع
أمك داعية لك
يستر عرضك بعيالك
إلا إذا كرسى العرش المرصود باللعنة
مماليك وفراعنة
اتفزز تحتيك من أوجاعنا
على سهوة وفرقع
سايق عليك الوطن
لا بقت روحك بتهتز لأغانى
ولا يعصرها عديد الأمهات
ليه طرشت ما عدت تسمع من يعانى
من ولاد ولا بنات
ليه عميت من البيوت وعن المبانى
اللى صارت خرابات
بين ضلوعك قلب تانى؟
وإلا قلبك ذل مات؟
ما بقاش بيدق إلا للغوانى
والبلد صبحت رفات
البشر زى الحجر عدموا المعانى
والكلام شبه السكات
وأنت فى القلعة لوحدك لا تعانى
ضاحك الطلعة بشوش الوجه باسم
ومتيم فى غرام الخواجات
يومياتى
بتخرج من شرنقتك
مادد رجليك الكدابة
فى هو الأحزان البشرية
الخلق ماهيش هى
ولا إنت طفل زمان
أوهامك قدك لسة
الايام مصت من طول البال
ضاقت مساحات الود الريفية
قصرت أحبال الرزق
وخلصت بين الألوان
سرقت منك وقتك
كشفت عورة خطاويك
خطفت منك – كل اللى ما كانش ف يدك
لكن كان ضى عينيك
شكات الرعشة
روايح الشوق
مراوح قلبك وبراءة أغانيك
حد الخوف من بكرة بيبقع حدك وبيغويك
عاود كن وبالراحة قبل ما تبهت
ضم المتبعتر منك
طاوع سنك .. ما تحمرقش
إتصالح مع عجزك / أحزانك
خيبة أملك
شيل على قد ميزانك
إتصالح مع المك
غفرط قلبك للى يقول لك بيحبك
لكن ما تفرطش
حرم ريقك على عسل اللى ما بيحبكش
النوة الجاية ما ح ترحمش
جاية عليك زى العادة – أكيد0
وح تاخدك قفش
إيه اللى اتغير
علشان تتحير وتشك
إمسك نفسك – ما تعطيش
ما حدش ح يسامح ضعفك
حتى اللى ف صفك
ما ح يسملحكش
إيه اللى باقى لك غير قلمك ؟
والورقة الدشت
اللى أما ف سرك تلاغيها
عجينة فى ايديك
وما بتعصلجش
نقد ذاتى
لو كان رفاق النضال قطعوا لسان النميمة
واقتصوا م المجرمين بدل الخلاف ع الجريمة
ما كانش سوس الحكومة أكل عقول الناس
ولا كانش رامى الاساس غش فى المونة
**
وما ضاعش دورنا التاريخى كعركة فى السينما
ألفية بن عبد الباقى
أقوم من النوم مهدود الحيل
أحايل الحنفية
أهلل على السكان
أنادى على قدرة البليلة
أتقلى فى الزيت المغلى على ريحة الطعمية
ألطف بنت الفران
أرجع محموق كفران من الطابور
أطلع ع السلم مخنوق مش طايق رجلية
أبص فى وش مرايتى
ألعن ابو أم الموس وحلاقة الدقن
أدوخ ورا فردة شرابى الشمال
أهابر وأشخط فى العيال
أتغسل
اتشطف
استند
اتنشف
ألبس
أحجل فى نص البنطلون مستعجل
أنادى على مراتى بكل هدوء وأدب
أشتم ياقات القمصان وزراير الجاكيتة
التهى على عينى ف طعم الشاى الماسخ
أنزل ع السلم دايخ
أزك فوق الرصفان على رجل ونص
اتشقلب فى مطبات الشارع
اتلكع عند بتاع الجرانين واتلصص أبص
أستفسر عن نوان باستناه من ست سنين
أجرى ورا أتوبيس واثنين
أتشعبط
أتعصر
أتحسر
اتحشر بين الرجالة والنسوان
استعبط
أفاصل الكمسرى ع التذاكرة
أتحجج بالفكة – لا مؤاخذة
أتمحك فى الباقى
أنافق السواق وأنا قرفان
أنزل مدلوق قدام الشغل
أتمحلس لبتاع الساعة
أماين ويا سواق الأسانسير
أتهرب م الساعى بتاع القهوة
أتفزع الكرسى خرمان من أولها
اقوم على سهوة وأهنن فى الفراش
أسأل على المنحة، ع الجهد الزايد
على كشف الأوفر تايم
أيها حاجة تسر
أخبار حلوة تصبر على المر
استثناء استغناء
إفتاء
إجراء
إنهاء ، إلغاء – إيه بالضبط؟ مانيش عارف
اتقلق ع الكرسى زهان
أقوح فى الكورة
أتخانق .. وافتى فى معجزة المعراج والإسراء
أخرج أدور فى الطرقة على سيجارة
أبحلق فى وشوش الخلق
اقلق أكتر على بكرة من أمبارح
أتلقح تعبان
أحس صداع من غشيان النفس
أتألم من فتق قديم
أتوضى على مهلى قاصد رب كريم
أصلى برضه على مهلى السنة والفرض
أقع فى عرض إله الكون
أترجاه ..
أن يبعد عنى العيا والعين
أشكى له لحد ما أتعب واتهد
أزهق مش طايق حد
أتخانق تانى على قيمة الماتش
أهلل
أزعق
.. أتحايل
أتحمس
أشحت
أتكلم
اشاكل
أسابق
أتلط
أتألم
أجادل
أحجز
أشد
أرق
أتحمق
اتشال
أتحاط
أتبط
أفاصل
أخرس
ابحلق
أتفرج
أتسحب .. اتقلب . أنااام
أدعى من قلبى يا رب يخلى لنا الريس
ومراته
والحزب الوطنى ووزير الداخلية
اتمنى فى سرى بجد بجد
ما حدش منهم يطلع لى فى الحلم
أصلى بأكون اتهديت
جتتى مش خالصة
كفاية
1-
زهقنا وحرقت قلوبنا السلاسل
وبعتوها خردة ورهنتوا اللى فاضل
كفاية .. ديون مصر خنقت سويسرا
وأطفالنا سممها زيت الفلافل
2-
ما فيش حر يرضى الهون والسكوت
لأن اللى يرضى المذلة يموت
كفاية – بقينا فى ديل الأمم
كما نمل مأسور فى بيت عنكبوت
3-
بتحكمنى غضباً تسلسل ايديه
وانت الحلم والقضاة والقضية
كفاية يا ظالم بتكسر بإيدك
ميزان العدالة وتحكم عليه
4-
كمان جايب ابنه يخلص علينا
وكنا على قدوم سيادته انتهينا
كفاية خربتوها حتى الزراعة
وضاعت على أيدكو فى (الكامب) سينا
5-
لكن مش كفاية
مافيش فايدة أنت افتريت وانتهيت
وما عدش يكفى تبدل جاكيت
أنا عايز أحاسبك وأحاسب خليفتك
نسيب مصر حرة لأولادنا بيت
فشل الغل صحة
ظلموك يا سبع البرمة
حين قالوا عزمك خسع
من كتر ما بتلغ فى البرسيم
اللعة كانت زومبة من الأول
وليها رب لئيم
وأنت بحكم الطبيعة لبست توب التسول
غرك خيال التحول
وغشاوة الجغرافيا
وهبالة العافية لما تشط وتغول
تحسبها بالمليم
عملت فيها الحكيم
أمنت بلا قافية بغباوة التاريخ
لما بتكتر عند موته الحمير
والفار يباهى العرسة بالزلاليم
الحظ يدى القطشة جوز حلقان
أو يهدى للمتكسحة خلاخيل
وتطلع أنت بكافة ما خفاه الليل
تشريه عسكر وخيل
كل النجوم أم ديل
تبرم وتفتى فى كل شى على كيفك
تحكم على الدنيا تشتى
فى عز صيف صيفك
يحفظوا التلاميذ تخاريفك
ويرصك الأستاتيذ نغم مواويل
تبقى الأعز الجميل
تفهم سلو كالجوافة حين
تفهم سلوك الجوافة حين يحين لاختيار
ومدارس الألامونيا وعلوم البحار
تفتى فى الأحكام
وتتبرمج على الأيام
كان راضع فى صغرك حرفة الحكام
سبحانه رب الجهل صدفة رماك
على عتبة الأحلام وقال لك نام
قرأ عليك ورقاك
ورضعك علمه
حين تصحى تلقى الصولجان فى أيديك
أوعى تصدق عينيك
لو شفت نفسك فى الزحام عريان
وأوعى تصدق ودانك
حتى أما قبل الحقيقة يتلوى لسانك
هذا قانون العالم الفالت
حيث العقل مقهورة
الكل يفرد جنحته ونفسه مكسورة
يبهت الصورة – يغيم الألوان
طبع المفلس يشتم السلطان
أعور ويتباهى بقفة عيون
ويا دوب نافوخه ينطق الكورة
وصوابعه تبصم محاضر الشعب والشورى
وحدك قانونك وقدرك دورة الافلاك
دوس بالبيادة رقبة المنصورة
صدق غرور نفسك – مين لها غيرك
ما فى حد يقدر فى المكايدة ينافسك
الأمرة مووشة ورصيدها الصفر
ذمتها منكوشة وخلفها يعر
والهمة منفوشة لكل فى السر
رقبتها من تقل الهموم مقطوشة
إنت الوحيد على الحجر
فى المية غرقت ارة السقايين
ما عادش فيه عمال ولا فلاحين
من العطش مات الجنين اليتيم
على صدر أمه وهو فى اللفة
حسب أوامر البنك والتنظيم
وملحقات المعاهدة
وهزيمة ابن النديم
فاعمل حسابك م النهاردة خلاص
ما عدش بد ومناص
ح تشوف فى وسط العماص
زى الغيام النهاية
تمن الهوان والغاوية
مرسومة منذ البداية
على الحزام والبنادق
مكتوبة فى مذكرات وأغانى ومحاضر
مزخرفة ع البيارق
- جايبة م الآخر – آخر ما لقيت مبادئ
كدبة وآخرها الرصاص
وزى ما بدأنا أول فيلم بنعيده
أو يستمر العرض
وأن خلفت مواعيده
سبع البرمبة وبطل السيرك فى المولد
ترقص على حبل الوداد وتزوم
شقع بقع لما تقع حتقوم
مبسوط ورايق
بيحسدوك الملوك والزعما م الأنصاص
ع الهمة والإخلاص
فايق بتسكر تمزمز شجرة الزقوم!
الدود
زاحفة اليرقات ذات الهيئات البشرية
على كل منصات الطول
وشاشات العرض
بتبخ لعاب الدهن الفكرى
تبزق سم القلق العاجز
على وش الأرض
إيه يا أخوانا – يا أصحاب العقل العاقل
والقلب العاشق للحق ولللأوطان
فين الإنسان؟!
مش شايفة ف زحمة سوق الأعراض
من أكوام نفايات الأغراض
وكيمان الأنقاض
قال لى حكيم الوطن الغلبان
طبيب الأحزان
لو عندك ذرة إيمان
كنت فهمت إن الإنسان
كان فى نية رب الأكوان
مجرد .. فرض
بغل الحكومة
حمار الترك أكرم من نيافتك
ياريتك كنت تركى م الحمير
أكم فى الشغل سرق الغلب وقتك
طلعت معاش عطوك زنبوخ كبير
مكافأة صابونه لما تحل ساعتك
وراتب للجراية ياريت شعير
لأنك كنت يا مقطف بخبيتك
عبيط تخدم بذمة وبضمير
ما خدتش رشوة على امضا بسلامتك
ما قلتش للجهول أنت الخبير
ما طلوتش أيدك فى عز حاجتك
على شوك الأمانة تبات أسير
لا يوم قصرت لعلاوة رقبتك
ولا لمكافأة طاطيت للمدير لا مخبر كنت بترازينا بغلاستك
ولا ودان كنت لسيادة الوزير
أهو حمار التراكوة سبق سيادتك
لقى اللى يطالبوا بحقوق الحمير
كرامته مصانة وأنت فين كرامتك؟
فى حكم (الغز) يا سوء المصير
تحز سلاسل الفرعون رقبتك
لابس بدلة وركوبة للأمير
الكلام
شفت الكلام ميت ورا الشبابيك
تخحت الحيطان أكوام ورا أكوام
كلام سليم النوايا طيب النغمات
كلام فى سن الفطام
كلام فصيح بنظام
كلام مهيب له هيبة أمر ونهى
كلام بيشبه للكلام الصحيح
كلام قليل العلام مقنع ومترتب
كلام قليل الطهى حسن العبارة
كلام مسبك من حروف الكلام
كلام بصير وأمير ومتأدب
كلام بيلعب فوق حبال الشطارة
كلام قليل الأدب حين يبدو متهذب
كلام حرير زى لمسة كدب وأخدة زكام
كلام ملون مزوق بالنقط والشكل
كلام بلا لون مفركش
كلام صريح للقتل
كلام بكافة باهت الالوان لسد الخانات
كلام مالوش طعم مدهش متقن الحركات
وكلام شديد الوطء ومميز ولا الإلهام
أبيض وعلى كل لون
صادق عنيف القصد – بس كلام
كان المكان لبلب بألف لسان
بيغشى كلام
خايف يخطى العتبة – مش م الخوف
لكن لأن الحروف اتبعزقت ع الأرض
مش لاحقة تترتب فى أى ودان
فاتكومت خرساً وراء الجدران
عديمة الشوف كما الأوهام
وساد سكوت الموت
وخرجوا كل اللى قالوا
اتبعتروا على بعض
وتاهوا وسط الرخام

الشمروخ 33

الشمروخ 33

الشمروخ 33 :: تعاليق