الشمروخ 28

شمروخ الأراجوز
28
شكشكة شعرية غير دورية بالفصحة العامية
لا يحق لنا مالا يحق لأهلنا
الموعودين
اللي انضرب بالشعر
من جنونته.. ما يشفاش
لعتبة القبر متغرب وإذا تهرب...فما بيسلاش
حتي ولو في بحور الشعر
راح مالة وعيالة – بلاش
الشعر للمبتلين العاشقين – الوطن
والعاشقين للشعر أهل وسكن
وبحق من صدفة – فن وهم – جمعنا
الأمر ياأهل الهوي والفن ما بيخلاش..
لو حط ع الدنيا ليل وزمان مالوش معني
جعل قلوب البشر مكوية باللعنة
بين زحمة السوق وهم اللقمة
والأشغال ماهيش معنا
فاحنا معاها وبها يحلو إبداعنا
خوفها يفزعنا.. أحزانها تجمعنا
مهما الغباء.. الجهالة .. غل لوعنا
عن دهشة الفرحة.. بالإنسان
إذا لأوطان تسمعنا .. ما نستغناش
طلب استعباد
إوعدني تدوس ضلوعي
كل ما تفوت في شارع
علشان تحفظ دموعي
تاريخ حكم المواجع
واياك تنسي تهيني
كل اما اخطر ببالك
مرمطني عشان تعيني
أرضي بقرف عيالك
داللي بيكم بلادني
أجبرني أسمع واطاوع
ورجع عنكم ملاني
عارف طبعي الملاوع
من فضلك اكوي قلبي لو بربشت بعينية
أحس الذنب ذنبي
كل ما تجيك رزية!
للحبايب سكة واحد.. لو حبايب
إفردوا أحضانكو علي الوسع ولاقونا
عايزين نموت في حضن بعض – استحملونا
إحنا شيلنا جبال هموم مع بعض ياما
ومشينا كتير سكك رغب وندامة
شيلنا بعض، ظلمنا بعض
وياما من بعض استحينا..
من آهات مصر الحزينة
اللي لمتنا علي رغيف الأمل خبز اليتامي
رغم نيران الغضب بينا وعلينا
لولا همتنا سوا وضمة إيدينا-
ما رجعنا – لا .. ولا عدينا بحر الغربة-
غنينا م القلب الجريح
فرحتنا سالمة يا سلامة...
بارفيقي – ياصديقي الحميم..
ياقديم.. زي التاريخ والنيل
وموسيفي الطبول..
والصراع الطبقي وطفولة النديم..
ياما كلنا زمان سويا – عيش وملح وفوم وفول
ياما طبطبنا واسينا لبعضنا ميت ألف جرح
وقسمناه – الرغيف الحاف في أيام المجاعة
ف ليالي الرعب كم عشناه-
سوا جنون الشجاعة
كنا نبكي فرادي ياما انما ضحكنا جماعة..
لما كنت مصر شابة وصاحية بلسنا بتهتف
في ساحات الجامعة وف ورش النسيج
علي أوتار حلمنا الممنوع بتغزف
إغنيات مبحوحة من هبو الحلج
وبدما شهداءنا تحلف..
تنيس أسامينا لكن تحلم بنا..
تمشي خطاوينا وتخشي ضلنا
لجل مش قادره علي هموم عشقنا
ولا مالكة تسد جزية حبنا
واحنا رغم النسايين ياما دفعنا
وبضوافرنا قطعنا عتيق قيودها
ياما في ليلها العتيم الشوق جمعنا.
نقيم حدودها
نعزل الحرية شال عز وكرامة
تباهي بيه اكفان جدودها
نلبس الشوك لجل نكسيها الحرير
اللي سرقة شاويش وبيه
وعدونس / حدودها
يشهد ابو زعبل علينا والواحات..
شجر الخروع دبل م القهر / جف النهر مات
وحجارة عنبر التأديب بكت دم ودموع
لما مزعت الضلوع الطبية الحرة-
ضوافر الشوم الضرير..
واتسرسبت ف عروقنا أشواك الشوك
لجل ترمينا فرادي فوق سكك الرجوع..
فانسخطنا
تهنا.. من بعض انفرطنا
صيرنا قطعان من بواقس زحف مهزوم
في البراري
نمنمات شاردة لعي شطوط الصحاري..
لا (حسين) فضل (حسين)
ولا رغم الشعر والمشاوير (سمير)
لساه (سمير)
ضل جيشنا في الشتات ما بين قتيل
وجريح أسير
اتأسرنا فرادي في التيه اتاخدنا نفر ..نفر
بعضنا م الحسرة مستوحش وحيد
بعضنا ف زنزانة مش جدران حجر
ولا حديد
بقي يرعبنا الغفر
لما بدلنا القمر بهوي الحاجات
وكرهنا الحلم فضلنا السكات
وكإنه تبا نبات
بقي يسرقنا السفر
مات اللي مات..
فرقت بينا مساحات الصمت
مسافات السكات
بعضنا استكفي بفتافيت الفتات
إتسخطنا .. لما من بعض انفرطنا
ضيعنا في الأرض روح الأنسانية ...
طلة الشمس العفية في الغيوم
طاقة الحرية ف زنازين الهموم
فافردوا الأحصان علي الوسع
ولاقونا يارفاقة
فرصة حتي لو أخيرة
ترجع البسمة لوجة الأرض
أو نموت في حضن بعض!!
هموم علي لحن مصري
بلادنا الزمن بالمرض فابتلينا
بكل اللي ما كنا نرضاه رضينا
وقاسوا كرامتنا ع العرة فينا
وصار الي يوص صبي من يقص
قالوا لك ظروف البلد مش مناسبة
ماهوش وقت للرفض أو للمحاسبة
علي الشاشة يكفي نجيب علمه صعبة
ونفتي ومن لم يطول راح يص
ظروف عولمة وشي طبيعي انكمشنا
أمرو السياسة بقت لعبة خشنة
ولازم نراعي بوليسنا وجيشنا
ونقبل مشورته إذ1 اختارنا فوص
ولو قزعة لكن رقبتة ونص
وصاحب غرض يوم ما نبدا نرص
ولو بانتخاب زيهم نص نص
يادوبك زعيم حب عشة وخص
ما عادش اليسار ميزة ياأهل اليسار
ما دام الكفاح في الزمن ده انتحار
سؤال الوطن صعب دون اختيار
وإذا الأزمة حبكت بنلعبها طوس
ويكره اما تفرح ونصبح بعافية
ومية بلدنا تروق تبقي صافية
اكيد راح نسيب عضمة لاولادنا كافية
ومن ا يقرقش ح يقدر يمص
قصيدة قديمة من عشرين سنة
ثقافة الوسط
ياواد ياابو السط السايب
يالبن رايب
يحق لك في زمان خايب
تقلبها بوتيك
ثقافة إيه مالهاش لازة
أحنا ف أزمة
بقي الكتاب والأ الجزمة
لو عزت اهديك
أبرم مع البلية الماشية
خش الحاشيه
دغميشة سياحية وغاشيه
رقص ومزازيك
باريس تبوسك علي خدك
قيميس قدك
بنفخة ح تزيد عن حدك
وكإنك ديك
في روما تعمل سوبر مان
حظ النسوان
دايبين في دباديب الطليان
الغجر الشيك
تلحس عقولهم هلاهيلك
تبرم ديلك
ملا ألاناجر دلاديلك
فتة وفريك
ما احنا ف زمان الخباصة
عيال رقاصة
شة حناتر مهياصة
هزه الهزازيك
تشرية دقة واحدة ونص
يوم ما بتقص
يادوب نهار اللجنة تبص
اسم الله عليك
والبيت خرغ ولا علي بالك
مين داعيه لك
اللي ابتلانا بأفعالك
بكرة ح يبليك
وح تبقي بيعة برسمالها
تروح بعبلها
تدفنها سرا تدعي لها
ماحدا يعزيك .!.
فزورة ثقافية
أوبرا الفلسعة
موتي بغيظك ياشبرا
(مزراطة ) ح يبقي آوبرا
مش نكتة ولا باهرج
العرض ميعاده بكرة
مافيش فيها ملقن
أغاني بدون ملحن
بطل الفيلم اللي أخرج
هو اللي بدعها فكرة..
والفكرة جهنمية
تكفي ماجورع القضية
تاخد اكبر هدية
وتكيد أهل المبادرة
ونبقي ف الحلاوة
لا خصام ولا عداوة
لمانبطل شقاوة
نفهم من غير ما نقرا
بلا أخضر بلا عظمي
كان جوع صابانا بتخمة
وإذا قالوا الحكم تهمة
علي سلوهم ح نكره!
ياما قلنا وانطرشنا
ياما شفنا ما اندهشنا
إذا لعنو أم خاشنا
برضه الناغشة وعشرة
ومادمت دماغ لوحدك
ما بناك الأ اللي هدك
علي كيفة بفتلة شدك
كده نوم وكده مهابرة
واحنا هابرنا ياما
وسوقنا في التلامة
لا قامت القيامة
ولا الدهماء مذاكرة
لجام وصبح كمامة
في سكة الندامة
إية أجدع م الدراما
نخلد فيها ذكري
فلسع حب السلامة
سوق البدو الأيامة
كنت أكبر م الزعامة
ياآخر العباقرة
حسن الختام بفرقع
ما يجعجع ال مجدع
في عزما كان ملعلع فاسع م خرم إبرة
كلام من القلب
راهنت بعمري وفكري وشعري ع الشوعيين
صاروا أصحابي وأهلي وضي ونور العين
البعض جرحني سامحته وقدمت سلانة النية
لكن العلة المخفية دبحني بسكاكين تالمين
لولاه أيماني محصني لقتلي غل الخابيين
أنا باعترف أن نفس كان عليكو تقيل
وحضوري لما أهل كإنه طلة – فيل
لأن طبعي أما أجامل ما يطاوعني لسان وأقول في وش الجبان دمك غتت ورزيل
عيبي إني كائن طبييعي لا بقرون ولا ديل !
أنا شلت في الانتفاضة قصايدي كالشمروخ
عشمان أرمم بشعري في النوايا شروخ
لا الشعر سمع ولا حوق في أهلي زجل ولقيتني فاقد أمل.. بدراع هشيم مملوخ
الكل هربان بجلدة في وطن مسلوخ
حكمة شبة شعبية
رضينا بالهم طمع الهم رضي بينا...
وكرهنا روحنا اندبحنا بسيف اهالينا
شكشكة ع الماشي
سايق عليك الوطن
يدعو الشمروخ الزعماؤ.. والسياسية العرب للأضراب عن الكلام ليوم واخد من اجل التخفيف علي المضربين عن الطعام
بطلوا عجن ياخلق ولت
جاتكم نيلة تاريخكم عت
وجاي تقول لي فكر جديد
كل سنة أفكاركو جديدة
نقعد فوقها بالمواعيد
نص القرن صبح قرنين
ربعا فوقة يسار ويمين
واللي اتنمرد راح في حديد
هات جرنان من ست سنين
والا تمانية قول عشرين
تخاريف ما بتقبل تجديد
ما بقاش عندك نقطة م
تتذكر تخجل تهتم
لذلك قادر تبق سعيد
إيه اللي مخليك تتدلع
رايق البال والكون ح يولع
فيه إنه وراك بالتأكيد
إيه ساندك وعاطيك الكارت
تطلع واحنا تمللي لتحت
علي رقابينا تشد القيد
كدبه كبيرة وشغل عوالم
ولصوص ست نجوم وهوانم
خبراء في علم التهويد
ايشي مولد نصب وتسويق
بيشي سرقة بإسم التنسيق
طبل يوماتي زفة وعيد
هيصة ورقص ومغني وزينه
وكإن مافيش أم حزينة
ولا أرض قاطع بيها شهيد
إستحملين أنا فلاح جاهل
وحقود واهبل وانت العاقل
راسم مشوروع التأبيد
انزل مرة ومرف شارع
والا اشتري كوز درة من صايع
راكب تالته ف سكة حديد
سيبك م الأبهة والجيش
حس الجوع في طابور العيش
اضرب بلطة ف نجع صعيد
فوت في العتبة صلح ساعة
إملاف باب اللوق ولاعة
ادخل مكتب بوسته بريد
حاول مرة يتيمة تصيف
مش في مارينا ومش بمكيف
والا اتفسح في بني عبيد
عيشة الخلق عسيرة ومرة
واوعي تقول لي إنما حرة
داحنا رجعنا رزقي وسيد
لو فيه مخ وحس وهمه
كان حسيت بتاريخ الأمة
أو تشنق نفسك يابعيد
كأنه مالوش قديم
غايظني أنه مالوهش وظيفة
ولا شغلة تجلب له لقمة شريفة
ولو حتي عند الجيوش الحليفة
لأن العمل فرقنا م الحمير
عمر ابن ادم مميز بشغلة
ولو لص مشرط أو كان غفير
محامي طبيب أو حرامي ببشة
يانشال بتلف ايده ف حرير
لكن ده لا سفير ولا كان وزير
ولا عرفناه في يوم مسئول مدير
إيه النظرية؟.. بيزايد عليه؟
وايه ميزاته يرسم لي لهوية
وفي القعدة يكون هو الكبير
يحدد ايه حلالي وايه حرام
ويشرح لي ميزات شد الحزام
شربناها مرار حرب وسام
وسيبنا عقولنا يشكمها اللجام
يسوقنا براحته ياسوء المصير
أنا كنت أقول لو اجير – رزقته!
ولو كان غفير كنت أقول – سلطتة
وكان انكشف سر سيف كلمته
وليه بيطاطي لي الكبير والصغير
أنا قرفان وغلي ياناس فاقعني
مين اللي عطالة حق أنه يبيعني
وبسياساته وأفكاره قنعني
إذا عصلجت يزغرلي فزعني
وإذا شافني باغجن يلت الخمير
وشاعوا ان سراكتئابي غبائي
وشعري عن النكسة عطل شفائي
وكافة لجانه بتوصف دوائي
إذ ما نسيت أن أسمي سمير
واسيبها عصابته ف حكومة ومعارضة
تأكد لنا الحالة مش حالة عارضه
بلدنا كده من تاريخها البدائي
بتقنعنا نهتف بإيقاع غنائي
إله الفراعنة ابنه يبقي الأمير
وهيه كده مهما ترفض تفلفص
حتعمل لي فيل وانت أرنب معصعص
كان الخير قصادك وليه لم تمصمص
لسانك حصانك ولك حظ سير
ولا يمها وإخرس وربي عيالك
دا حال مصر منذ1 اللي بالي في بالك
وورث اللي دول يمينك شمالك
وجعلك نوايه ما هيش لاقيه زير
وحكمك بشرعة تراث العبيد
وخلا الدماغ اللي فات في الحديد
رسم للبشر حلم عالم سعيد
بيلحس تراب نعل فكرة (الجديد)
كما أعمي ساحب لجامة ضرير!
رو بابيكيا
أيه ناوي تبيع تاني يازعيم
والسوق مستكفي؟
حيلتك إيه الإ كلامك .... عاد..
واللي ما بقاش يسوي تلاته مليم..
لكن الألاضيش رافعينه
أفيشات في الميادين
ناسخينه مانشيتات علي صدر
جرايد ما حدش بقراها
حاطينه ومحاوطينه
بضي عيونهم في الفتارين
فارضينه جهلا غصب
تلامذه في مناهج التعليم
مع أن ماحدش منهم أصلاً
بيصدق أنك تعزف تقرا..
علشان تقدر تكتب كده شعارات
وتهندس كده تصاميم.. وتقنن وتعاليم..
وتفنن كل دي تفانين.
يانصير الفقراء والمظاليم
تم التسليم!!
في دماغ الوطن المسكين ..
كل الناس عارفين
إنك ملك النصنصة والتقسيم
خبير متمرس في فنون المصمصة
والقصقصة والتحكيم
طول عمرك صاحب مفاهيم وفيهم.
تغسل تكوي.ز
في ايام الخصخصة زي ايام التأميم..
فارحمنا من تقل حضورك...
إرحل عن سماواتنا – لنا رب كريم
لا التاريخ عاد يستحمل سفسطة
ولا الجغرافيا ناقصة تلطيم
بقينا في أراضينا معازيم
لا يسا رقادر يتحنجل زي البني أدمين
ولا قادر يتنطط فيها يمين
انت لوحدك مالك
حق التأخير والتقديم
فايق زي الحشاشة
رايق متعايق يوميا تظهر ع الشاشة
مزوق وملزق ومروق
علي قد ما علمك يبقي اسود ودميم
لأن الدنيا حر .. والبعض لم يبطل
قر .. وتجنبا لقليل من الشر لجأنا
لحيلة المضبطر وأجلنا (لمضيفة) هذا الشهر فعذرا واللي محتاجة البيت الشهر فعذر واللي محاجة البيت يحرم ع الجامع -الشمروخ

الشمروخ 28

الشمروخ 28

الشمروخ 28 :: تعاليق