الشمروخ 22

شمروخ والأرجوز
22
ما شبعش لسه الأمريكان دمك
يابنت شيخ البلد لساك في صدرك نفس
لسانك في حلقك لسان
وقادره لسه ع الخلف والولد
وامك بتملك ملس من صوف ومن كتان
وابوكي لما يموت... لسه بيلقي الكفن
ولسه ليك أخ غايب راح يشيل همك
لذا ما أنش الأوان... لو تفهمي العقده لو... ويحسها العربان
ما شعبش لسه الأمريكان من دمك
لسه ف بلادنا مشايخ فاهمه في التواريخ
لسه مدارس بعقل تفسر القرآن
وشطوط بتطرح عسل منجه وساعات بطيخ
ونخيل بيرمي حموله كافة الألوان
وزهور بتفهم فبتفتح علي الألحان
وشعر من نظم أمك

وزجل بديع عمك
لذا ما آنش الآوان
ماشعبش لسه الأمريكان من دمك
لسه الكنايس بتسهر كل دخلة عيد
وجناين العشق تطرح غله في المواعيد
والنيل في عز المجاعة القحط بيوافي .. يفيض ويزيد
وفي الجليل – الأدان من مدنه الأزهر السهرانه ع التجويد
الحافظة العهد بالتقوي وبالتجديد
لساك قديمك جديد
نهرك في نفسه وشوقه يخضر الصحراء
وأهل الربابة مازالوا بيحكوع الشهداء
تونس بتقرأ أمهات الكتب
وأسكندرية تلون بحرها في الصيف
وصور جمال لسه في صيدا علي الجدران
وفي المدينة الحمام لأخضر يقول يانبي
البابا رافض أن يزور القدس
غير وابتسامة الحر فوق فمك
لذا ما آنش الأوان
ماشبعش لسه الأمريكان من دمك
عايزين يشوفوك سطيحة
زي الجمال الدبيحة ملقحة ع التل
ينهش حشاها الديابة كل بورصة وسوق
آخر نفس – آخر حجر حي في إيدين أطفال
آخر قصيدة شعر لها معني
أخر اهه فى موال
آخر بريزه حلال
عاقداها أم اليتيم للعيد في طرف الشال
آخر رغيف شمس ف بيوت الصعيد الطين
------------------------------
عايزين يقابلك نسيم الصيف .. وما تشموش
ولا يحسكش
الضل ما يريحكش
التمره ما تشعبكش
أخرس وأطرش ومعدوم الشرف والدين
تفتح لهم بوابة المختار وحوش عابدين
وتسب ع السبحة شهدي و سعد و عرابي
وتهد لجل الشالية .. باب توما و المتولي ... وتهدم الأهرامات
ولحاجةالاعلانات تنقش حجارة الطوابي
تخضع لحكم الحصار
تلاقي شمسك في المدار بتولي.. في حضن الغرب
يميل معاها الناموس لما الميزان يختل
تفوز شريعة التجارة .. يحكموا التجار
الشعر يرهن حجته للبنك
النفط ينشف .. وتجيف شطوط القري
يحل عصر الافترا والضنك
يسمح لنا بس قد ما يسمح السمسار .. فروق العملة والأسعار
----------------------
مطلوب رقبتك في سلاسل حديد
وحلم امك .. في ققص من جريد
مطلوبة مش بس راس الحسين وحده
لا .. مطلوب خيانة يزيد
يركع جبينك في التراب ينذل
فتنسي معني كلمة إستعمار أو استغلال
وننسي ست الحسن والشطار
نفتح بيبان الدار لكل شريد.... ومن المحيط للخليج .. نفضل وطن محتل

سايق عليك الوطن
الله عليك يا سلامة .. ياللي كتابتك علامة
ع العقل ... والاتزان
حتي في ساعة الغضب
تشرح في غاية الأدب
وتجرح ... البهتان
يسلم لي نفسك وقلمك ياللي في فرحك وألمك
قلبك علي الأوطان

عفيف ما ينطق عيبة
ولا اتخرس عن خيبة
ولا رقص بهلوان
باتمني تفضل مصحصح
في زمن عوالم مزبلح
عاوج لسان الشيطان
تحية لكاتب معرفوش شخصيا – اسمة / سلامة احمد سلامة
تعليق - في رباعية وربع
* بالإغتيال بانتخاب بالورث باستفتاء
الابن فوق كرسي ابوه يرقد بلا استحياء
ياللي انتوفاكرينها لعبه حظ ومصادفة
علي قفاكم قليل صك ألف حذاء
عصر الهزايم عايزكم ضحايا، مش شهداء

داء الوفا طبع الكلاب
رعاة الشاة تحمي الذئب عنها
فكيف إذا الرعاة هي الذئاب

ياسيدي قتلتني
هل من هزيمة تالتة تابته علي ايديك
تاخدني تحدفني علي فين خدتني
حولتني خصيان عبيد
حكمت فيه ملكتني شردتني ... أحزان في عيد
بين التمني والوعيد .. جوعتني
أتبعك راض من بعيد
أخرت زمني سلبتني الدهشة من الكدب الجديد
وبضحكة باردة رعبتني بنظرة عينيك أخرستني
نطقتني
فإن دماً أجريته بك فاخر
وأن فؤادا رعته لك حامد
ياسيد ... ياسيدي ... رحماك سماح
في أي شرع ورثتني
كرهتني حلول المسا طلوع الصباح
أكرهتني نسيتني افرح بالقمر
توهتني في سكك السفر
وبغنوه السوس في الشجر سممتني
براحة الضل اللي كان يشفي الجراح جرحتني
نزفتني دموع قلبي دم.. أوهام وهم عصرتني
دفعتني تمن السلاح اللي انت بيه وبكل فخر قتلتني
ياسيدي يكفاك.. تاريخ يكفاك خطب
أقلام موالي

موالد
ربك كريم وح نحمده
ياللي بك الشعرا إهتدوا
بقت القصايد كلهن بكافة الأسواق محض فوائد
ياسيدي... يكفاك دما.. ياسيد
نهبت من الإعمار مالو حويته
لهنئت الدنيا بأنك خالد
ياسيد
يكفاك رصايد من مصايبنا وتكفي مصايد
أحنا اكتفينا من الهزيمة بالإياب
من الرجوله بالشناب
من البطولة بضل شيخ أو ضل باب
ماعدش حته ف جسمنا وجسم الوطن تكفي لخنجر أو لتصريح أو حراب
الجلد ياحجر ... ياداب
البركة نشفت والكتاب إصفر من كتر الهباب
الحرة كان في الأصل يقتلها السباب
دلوقتي يسبيها الغراب
اللي بيغنيها بريشة عن الهدوم وعن الهموم وعن الشباب
أيه لسه في جرابك لزوم الإغتراب ... زهقتني
إيه باقي في صحاريك سراب خادعتني
حيرتني بين السما وبين السموم.. قطعتني
كل المدن صبحت (سادوم) ضيعتني
يكفاك حروف علي كل لون
خطب غضب وخطب جنون
خطب جدل.. وفنون علي شك الظنون
سحر ودجل
من كل جدر خلعتها فخلعتني
يكفاك عذاب سم ف عسل
سقت العباطة علي الهبل. وبلا خجل
حملت قلبي الهم بدري حرمتني ضي الأمل
ما ازددت حين وليت إلاخسة
كالكلب انجس ما يكون إذا إغتسل

ماقدرتش انطقها زجل
فبدون زعل أرضك سماك جرذان كلاب هو عوعوة .. أفزعتني
تحت الغطا لو انام أخاف.. أحس جندك طعم جلدك في اللحاف
روحي بقت محشورة في القلب الجفاف... خنقتني
حبة نسيم .. فهقة هوا.. دي الشمس حتي الشمس تحتاج للغياب
يادي الزعيم يادي الرئيس يادي الملك
ياركن يا مهيب.. يامهاب
يا من حلبت الثروة من بز الخراب
عصرتني في كاس الشراب
عميت عيوني في ساحات الحرب من أجل السلام
عرّيتني ومن غيطاني قلعتني
ياسيدي جميلك وصل
واللي انت ياما وعدتنا وأوعدتنا بيه قد حصل
فاسمعني دون ما عتاب ..غضبك عليّه يهدني
فأنت حياتهم غضبت عليهم
وهجر حياتهم لهمو .. عقاب
الطاعة حق علي الكلاب .. ياسيدي حبة وفا
حبالنا دابوا والى حطك فوق كتافنا ما اكتفى
لذا عندي حل فيه الشفا ترحل .. تحل عن القفا
وعن الوطن
حتي وان تبت يدي.. ياسيدي
من أي داهية بدون سيادتك قد يجوز .. راح نبتدي
وبأى شئ دون خبرتك ..يمكن .. يجوز .. قد ..نهتدى
وقد يقطع العضو النفيس لغيره
وتدفع بالأمر الكبير .. الكبائر
فاعملها مره ياطويل العمر إنك ثائر
واهي تبقي كفارة فدا كل الذنوب
إرحل .. تحييك الشعوب
ارحل
نشيلك فى القلوب
رمز و امل ح نخلدك وبايدك انتى نحفظ جميلك يا بطل ونقدّرة
وبايدك انت – مش بايدهم – زيد و عمرو تآمروا
نقدرك حين نخسرك
قبل الوطن ما يطق كفرآ – من جنابه فنخسره

كلام من القلب
بما إني شاعر.. وفلاح
كان قلبي كما أرضي .. براح.
بما إني فلاح .. وزراعي
كان سهل خداعي ومتاح
لذا كل نجوم الّلوتاريه
فنيه – سياسية .. سلاح
بالجملة – أو بالقطاعي
بتبيعني ف سوق الوطنية
وتعاير قلبي بأوجاعي
وتزيدني جراح

الشعر والحرية
الشعر من تهويمة – في ملكوت
ولا كارت للبنكنوت
ولا حجة للسمرة – علي الرغيف والقوت
الشعر فرض لعشق – أرض الوطن
للحب يجعل منه نبض الزمن
للشعب – قوة تعنية ع الجبروت
الشعر في إيد البشر نبوت
يصك راس الظلم والظالمين بمعلمة وبأدب
ويدي للمظلومين الضعفا... – حق الغضب
وكشف ستر الخاين- العكروت
والمفتري العنتري – المتلون الهلفوت
الشعر... – هوه الحجة...- هوه السبب
اللي مخلي حضارة الإنسانية
ضميرها من فجرة... صحصح ع الجمال والعدل
وروحها – شوق الفن – للحرية
واو . واو . واو. واو. واو.و
كرهت الشعر وكرهتك
وعمرك وانت إلهامي
قتلني الكدب سامحتك
ياكدبة بحجم أيامي
و
طول عمرك صاحب الواجب
قاسم قلبك.. نصين
عينهم تعلا علي الحاجب
وانت تروح في الرجلين
و
كل اللي أحييت مواتهم
وشيلتهم في الحشا
عصروني خمرة ف كاساتهم
مزوا بي بعد العشا
و
لما أصطفيتك بحبي
وعدتني بدنيا جنة
أيه ذنبي بتهد قلبي
والحب طول عمره بنّا
و
بتلومني وعايزني اتحمّل
وانا شايل حملين م الحاصل
وبحجة حبك اتجمّل
وانت علي دمي بتفاصل ؟
و
رقصت في الزفة يا مجدع
استأتذوا فينا التلاميذ
النيل كفر هجر المنبع
كل الشجر طلّع جميز

هموم علي لحن مصري
لابد من مجلس أعلي
قطرة من بحر بيرم
يوم اكتفت مصر بالشكوي لخالقها
سارقها أبدع – نظام المجلس الأعلي
فكل شئ من التخليل .. للكرة
رهن بأمر ومزاج .. المجلس الأعلي
العلم والفن أرزاق مسببه
حسب سماح بنود المجلس الأعلي
العقل قفزا خطى للقرن منفتحا
وبمصر يذوى صريع المجلس الاعلى
بدل وعمم وكابات واشرطة
عجنت دماغ لجان المجلس الاعلى
ترى العواجيز اعجازا مسندة
على كتاف صبايا المجلس الاعلى
يستنسخون دوام الحال لائحة
من عهد فرعون رب المجلس الأعلي
تري البنوك التي نهبت خزائنها
رسمت خطاها خطايا المجلس الأعلي
وتري الحقول التي بارت مجرّفة
لحساب من برمجوه المجلس الأعلي
كافة جرس في البرص حين الفرص سنحت
علقت بحبل نجاة المجلس الأعلي
سقط الكلام اذا فاضت فضائحة
يبلعه رمل صحارى المجلس الاعلي
صار اليسار يمينا في تبرجه
منذ اصطفاه رئيس المجلس الأعلي
فى كل حزب جماعات مروضة
رهين شيكات أمر المجلس الأعلي
في كل حفل تراهم عصبة سهرت
يتلمسون رضاء المجلس الأعلي
واكم سهرت علي الكورنيش أرقبهم
في كل حفل لذكر المجلس الأعلي
فشفت عجبا رؤوس الخلق قاطبة
تدور سكري كؤوس المجلس الأعلي
كبة وكفته مع الساليزون يلهطه
ابن الي سارق رغيفها المجلس الأعلي
ولأن كل الذي رفع السلاح قضي
ثمنا لأرهاب جند المجلس الأعلي
وكل من – مرة – بالحق أعلنها
أضحي ضحية غدر المجلس الأعلي
أما من فقعت بشعري مرارة الدنيا
فقع مرارتي وكادني المجلس الأعلي
إن كنت أخشي شاويشا مجرما اشرا
أذوب هلعا لذكر المجلس الأعلي
وإذا رماني الهوي فأكلت طيبة
أحسست أني سرقت المجلس الأعلي
واذا طلبت اتقاء الفر مكرمة
طلب اللئــــام دمى فى المجلس الاعلى
وإذا نصفت وحاز القلب كاعبة
قبل الزمان أتاها المجلس الإعلي
لذا سكبت مداد العمر في قرف
خوف احتياجي لحبر المجلس الأعلي
فلو أمنت إلي الاذعان منكفئا
لن يرض عنى صديقي المجلس الاعلي
ياقارض الشعر رعب اليأس مزقة
حتى القريض اختصاص المجلس الأعلي
-------------
اعترافات الزعيم الأوحد
أنا مالياش وطن.. ولا عمرى حسيت بيبيت
لأني مش إنسان وعمري ما حبيت
أنا نموذج زعيم الدوله والتنظيم
في صدري شوق حنت فاجر
قاطع طريق ولئيم
لذا عمري ما استحييت
لأني ع الحرمانية عاقد النية
مضغت كبد الديابة النية واستحليت
ودقت لحم البشر أطفال فما استكفيت
وفي دموع اليتامي غرقت .. فاتوضيت
علي رقاب المؤمنين بمواهبي أنا استعليت
عديت عليها حين إمام صليت
يادوب ح يلزم ليه صفين من عساكر ميتين القلب
ينيمو الملايين من المغرب
وصف افنديه ميتين الروح
يصبح كلامهم حجة ع القوانين
أرسم حدود المحارم والأدب والدين
واحسب حساب المعارك والغنا والحرب
أبني صروح الوطن والحق والتقويم
فأنا وعدكم للكرامة – المجد مهما خطيت
أنا عزكم من عواري ضغفكوا استقويت
ما نمت ما اطمنت ما ونيت
عيوني مفتوحة مثل الديب إذا كنيت
فافهم يا من حبيت وحزت حسن الفطن
رضايا هو الوطن
وفسوتي الانسانية
وحضن عرشي وضله هو البيت
************
هموم .. المشيب
عليك عين جريئة بتسبي البنات
ولك قلب أبيض في لون القمر
بتسمع موسيقي وتقرا روايات
وتكتب قصايد تهز البشر
وحضنك جناين ملانه حاجات
تخلي السحابة تسح المطر
وتأسر طيور الربيع للشجر
وفرحانة تقلق وتحلم تغني
تحرضها تفرح بسحر الحياة
وانت ف همومها بتغرق – حجرا
************
حكمة شبه شعبية
لما بلادنا عماها بلاها بزمن القحط
كلنا علي قدنا بلبطنا ف برك النفط
لكن فرق كبير انك غصب عطشت شربت
وانك بمزاجك غوطت اتلغمطت فلخبطت
وأن كان ريق الكلب نجاسة زي خراه بالضبط
المضيفة
رسالتنان من قنا
سايق عليك الوطن لتزود الأشعار
خللي الثورة تشعلل فينا ليل ونهار
وعلّي صوتك وقول وكتّر من الأفكار
شوف الزرع الأخضر قادت فيه النار
ولسانا اتعوج بعد ما كنا زمان شطار
ويبقي السؤال ما العمل؟ ياعم سمير
الهلف اتربس وحكم فينا بالحديد والنار
سايق عليك الوطن ياإبن عبد الباقي
البلد ريحته عطن والصبر مش لاقي
سايق عليك الوطن ياجندي يابو سلاح
تعب مني البدن وقلبي اتملا جراح
سايق عليك الوطن ياطالب الجامعة
الفكر صابه الوهن والدنيا مش سامعه
سايق عليك الوطن ياعامل ويافلاح
نسّاج مالاقي الكفن ولا في يدّي سلاح
للشاعر محمد نصر ياسين

وقال عبد الستار سليم
من فن الواو

أول كلامي ياسمعين
أمدح في سيرة نبينا
يارب ع اللي اتقسم عين
نصبر علي اللي نابينا
و
اصبر علي الهم ياقلب
كام ناس ربك بلاها
دنيا وزمانها قلب قلب
ولّي وأتانا ... بلاها
و
كانت بلدنا لنض جاز
صبحت كهارب كتيرة
بعد الربابة ولارجاز
عشقت مادونا وشاكيرا
و
كل الطرق صبحت اسفلت
والريف سكن في المدينة
شوف الحرامي لبس فلت
والشيخ نسي علم دينه
و
يادار حالك ماتنشاف
ولا تنحكي في المجالس
والله سجرتك ماتنشاف
غير م الخسيس والموالس
و
ياما نصحتك ماتلهيش
ولا يوم سمعتي كلامي
وفرحتي بالحلف والهيش
ومليتي جيبك أسامي
و
غنيتي قول الهلافيت
ونسيتي ما تغنّي شعري
لفّيت وراكي لما حفيت
وآخرتها رخّصتي سعري

فريدة النقاش والشاطر قرن الفول

الشمروخ 22

الشمروخ 22

الشمروخ 22 :: تعاليق