الشمروخ 12

رباعيات ... ولكن وربع

رباعيات ... ولكن وربع

عن العشق وسنينه
عن الثقافة وأيامها
عن العسكر وأحكامهم
عن العشق وسنينه
انت الغنى قد ما تقدر وتستغنى .. وتحاجى ع الروح بسحر الشعر والمغنى
واهبة الحياة نبضها لكسرة ورشة ملح .. ولحظة من فرح نادرة تنولك معنى
موهتنا فى خضوعنا للى لوعه طمعنا
بعض الخجل يا جدع بيزيد حلاوة الروح .. سوا كنت حزنان وبتخبى فؤاد مجروح أو كنت فرحان تباهى الكل وتفاخر بعض المشاعر بيقتلها جهير البوح
هوج العواصف يدمدم فى الخلا ... ويروح
لازم وبكره أكيد ح يتم شئ ما .. اعتى الجبار ينكسر لازم بشرخ ما
الكدب قادر ولكن قدرة محدودة .. الليلة سوده وح يبدده ضى ما
قوم صلى للشمس .. شعرك هز قلب ... وما
أصبحت بابعد عن النسوان واغنى لها .. وانا اللى روحى زمان دابت فى هلالهيلها
سبحانه من خلال قلب الشيبة يتشحتف ... وقلوعه تحدف حسب ما يشتهى مليها
وبرضه قدرنا نشكم بالحنان خليها
الشمس كل غروب بتبدل المنظر .. خايفة عليه الملل ييجى بكره ما احضر
أنا يا للى حس الجمال وقصايد الألوان حكموا بإيقاع الزمان قلبى وأنا صغير
ذاكرولى فى المدرسة وحمونى فى العنبر
الحب فى أحيان كتير مسكين لما يصيب بالسهم ناس كاملين
يصدر عليهم حكمه بالحرمان فلا يشفع الرمان ولا ينفع الياسمين
جناين العشق ما بتفتح سوى لمجانين
تعب القمر م السهر فاتنى ونام بدرى . مالوش فى طول لاحتمال ولاله حبال صبرى
غاية مداه السما فى مدار بلا نهاية وأنا بداية غوايتى حين طوع فجرى
وصعب انى اسم للظلام أمرى
كل ما تجلقت فى نجوم السما أعدادها تكتر واللى كان باهت ومخفى يبان ويظهر
وانت مين انت ؟.. ما هياش حاسه بيك فوق لا بأس عليك هموم الأرض أكبر
مهما شفت كسبت لو ما فهمت تخسر
افتح أبوابك للشمس تدفى حياتك خليها حقيقة اكيدة لكافة احتمالاتك
لولاها لا كانت خضرة ولا أشواق ولا فن ابليس اتجن عشان نورها بيطهر ذاتك
غايظة انك بتمارس فى وضوحها لذاتك
ليلكم نهاركم .. تسنو سنكم على بعض مستموتين فى صراع النهش .. هبش وعض
الرب كان ياما كان خالقو.. نسل قرود وبعت لكم انبيا تتبوبوا .. لحد - ما جض
منكم انما عايش باغنيكم يا ملح الأرض
يا للى قاعدين والفرح م الحزن شطب جهلكم فى الرعب عطب
ساقية مجنونة الخلايق فيها داير .. على أرض بايرة كل خضرها محطب
حتى صفصافها ما عاد يا نيل … يرطب
احنا بواقى سلالة المحكومين العبيد .. ولا الساعات السويسرى نزبط المواعيد
ولسه عايشين زمن - يسعد مساك يابا .. .. نقلق بجد، أن غموسنا مرة واحدة يزيد
ونفرحوا بالجديد زى العيال فى العيد
من كتر ما كدبت على روحك مصدقها .. وهى من كدبها لخماك فى ارزاقها
توأم من اللؤم شادين السما للأرض .. ارومة طينة .. عكنها الفقر وحرقها
فى بحرم الكدب مهما تعوم تغرقها
يابنتى وانتى أعز خواطرى وقصايدى عيدى النظر واقبلينى بطبعى وعوايدى
أنا عمى فلاح، وامى بنت شيخ نجار .. والجد مصرى أرارى لا .. رومى ولا هندى
وأبويا يوم اتنصف م الفقر.. بقى فندى
آدى يوم جميل عدى زى النسمة ولا موتش .. عافرت جنيت .. حزنت رضيت ولا ضحكتش
لكن فى قلبك فرح مكنون فى حزن نبيل وزك تواصل مسار العشق ما هربتش
ومادام تحس الجديد اكيد ما ح تكلش
عاشق صغير سنة، ضاحك سنة جننى .. شاف الحليوه فى عينيه ثار وغار منى
أنا قلت أعوى الغلط راعى حدود حدك وايااك تظن أن عمر شبابى من سنى
أنا قد قلبى .. اللى عند يميل ويقتلنى
عيونك على نهود النسا بتتنطط .. مع أن صاحبك إذا فرفر بتتلخبط
حزين على نفسك المكروبة م الحرمان... قتلته ليه الأمل ، وف قشه متشعبط
عناقيد كانت ملو ايدك سيبتها تفرفط
اعوى يهمك وكل .. كل اللى نفسك فيه .. مادام على مد ايدك بالحلال تلاقيه
اقعد مع اللى تحبه ما دام سكن قلبك .. واللى كرهته عشان قتله الغرض - ارميه
قلبك دليلك .. فسلم كل امرك ليه
غباوة الغابة بعض غبارة الإنسان .. حين سبعها يطوى رايته يطاطى للخرفان
ح يبغبغ البغبغان للقرد فى دولته .. والقط بإيمان يدرس حكمة الفيران
وتاكل الأرنبة اولادها بكل حنان
يمامه طايره وقتلو ضلها ع السور وقبض عليه الشاويش بأمر من مأمور
كتمه وكرتن عليه فى عتمه الزنزانة لكن الخيال عدى فى هسه جبال وبحور
شعرى يا فرخ اليمام عمرك رهين بالنور
ربيت عيالى على الغالى .. يا سيدنا البيه الوردة أغلى من الخردة أم ألف جنيه
وكلمة الصدق شمعة فى سجن صاحبها واللى الحلال عرقه - قطره من ندى ترويه
شعرى على قدى وأنا قد اللى عشت عليه
هاجمة القصايد على قلبى حنين جارح .. غرضها تحبس خيالى ف ذكرى امبارح
وأنا صدار لى مدة هوايا دمدمة اعاصير .. لجامها جرح إيديه بميت حصان جامح
ما اجمله الشعر حين ع العشق نتصارح
ما شى ف بلاد الغربة دون .. استبن وكأنه يا ولدى لا عندك بنا ولا ابن
اسمع كلامى وخد حذرك من الأيام .. الخوف على بكرة قوة، موش خبل ولا جبن
داللى حفظ مصر - لميتها كناسة الجرن
يا قلمى بطل بكا وعياط على اللى راح .. لا الدم خضر شجر ولا حزن داوى جراح
الكل شايل السلاح ع الكل حتى الموت .. لا قابيل فرح بانتصاره ولا هابيل ارتاح
شجر الهموم ما طرح إلا ألم ونواح
كان ظنى انى راح ابنى للشعوب جنه .. لذا استطالت يا ابنى مسافات التعب بينا
وكتير كسرنى الوطن وسرقنى ياما الشعر .. لكن انت واختك بقيتوا الفرض والسنة
كنتم ضميرى اللى قلبى فى حماه غنى
يا عم حيلك لا أمك قارية ما كتبته .. ولا مراتك فى يوم حست بما كبته
سجنت نفسك بنفسك من غير استئناف .. شبرين وحته لا دا كسبته .. ودا خسرته
قطر الحياه عدى، وانت كبرت ما ركبته
يا شعر نفسى أنام ارحم مواويلى .. ليه بنض حيلك بيحرك فى قلق ليلى
مستعبدانى وغاضبانى اوهامك على روقى .. خليتنى عرقى ومرقى سرجت لى خيلى
وصرت هبيان ... وكنت شبعت بقليلى
خيال عيالك بيهرب من هجير بردك .. مالكش حل خلاص غير أن تموت وحدك
الأمس جمر ف عروقك نيل وحيل وحياة .. وبكره أضيق واضعف أن يفى بوعدك
حوشك بقى جحر نملة وكيف صبح قدك
ستين سنة فى دواير دايرة نفس المدار .. اساطير مشاوير .. معارك وحكايات شطار
خطيت ما ونيت .. عافرت وشلت ما نخيت .. مازال قميصك تاريخ مشموط على مسمار
ما اعجبه من مسار إجبار، قبلته اختيار
على دق طبله ند له القلب، تعا نسهر .. حضن ايديه واخدنى لحارة فى الأزهر
الله أكبر قصادى كانوا ملو العين .. فؤاد و متولى نفطر فول ونتسحر
حظك يا شاطر حسن بالشعر صرت أكبر
كلك هوان يا هوا .. للى هواه غلبه .. واتخلى عنه أما تاه فى ملقفك ادبه
سفن النجاة لا تطيق العقل فى جنونه .. تنول حلالها بلالها .. يا تخسره بسببه
دليله حلقت لـ شمشون الغرام شنبه
فى النفس ها يجه الأسئلة كتيرة .. ولا فيه جواب يشفى من تاريخ ولا سيرة
الجهل خدع العقل بالإجابات .. م الكدت مات الحق .. بات حيرة
فى مفرق الشك حتى الفرحة ، تكديرة
جاى النهاردة بتبكى خيبتك الكبرى .. وانت شايلها حمول حية وهموم ذكرى
بلا نيلة .. هى حياتك والزمن قاتك .. ولا علمكشى تصد فى حياة أخرى
لذا شبه امس لازم راح يكون بكرة
محلاك يا مسكينة وانتى راجعة مبسوطة .. بالألف عيش والكرنبة وشوة القوطة
من بعد غلب الميكروباص .. والشغل .. ح ترطبى البيت بضحكة ولو زغنطوطة
وانتى فى ليلك نهارك جته مشموطة
استاذة دكتور فى التفصيص وفى التقوير .. على الرصيف فاتحه معهد فنى للتقشير
كوسة بدنجان - بسلة ف إيدها زى الفيلم .. لو كان هناك علم - كان بتقى وزير تصدير
آخر سلالة عمار أرضك يا مصر - بخير
هذا الشعور النبيل بالحز … عاصرنى .. بحضن مليان حنان حارق محاصرنى
مديت إيديه اتبنت فى شطوط عشقك .. ماطالش كفى سوى الوهم اللى حسرنى
الشعر وحده بخداع بصرى .. مبصرنى
طايرة ف سديم السما ترقص شراشيبها ... حضن النجوم المحال والشمس مطلبها
بيشدها الخيط لتحت تشق بيه على فوق لو يفلت الطوق تكسر قلب صاحبها
احلى ساعات فرحتك مرهونة بتعبتها
ما ألذه طبق الفول على الصبحية .. بالبصلة والفلفلة مع صحبة العربية
من غير ميعاد اجتماعنا . الكل شبه الكل .. ح يكون صباح فل . كيف ؟ من غير ملاغية
فين ما تولوا وجوهكم .. ثم طبلية
الصدفة حكمت حياتك فى الهوى صدفة .. زى التاريخ والممالك عمرها - صدفة
إياك تفكر بانك أقل م السلاطين .. دى حكاية منذ البداية ماشية بالصدفة
م الطين إلى الطين .. وبالصدفة بقت نطفه
أصحابى بيتوهوا منى فى ضباب الأمس زى الحقايق حين تضيع .. بالهمس
اوعى تقول لى الزمن وطبيعة الأشياء .. ضل الشجر طعمه اطرى لما تحمى الشمس
والقلب كايده الهوى عمره يا دوب باللمس
حلمك عليه بقيت مش حمل أحمالك أنا يا للى صبوة صبايا ندرتها لجمالك
بقيتى كالدنيا .. ما افتكرتش ترحمنى .. شغلها عنى اشتغالى بصعب أحوالك
فات الكتير واللى جاى ما خطرش على بالك
بتحاصرك الغربة بريحة التوت فتستغرب .. كل البعيد م المشاعر - يبقى ليك أقرب
لمسة ايدين أم شعر اكرت .. ونخل ياسين .. أغراك جنونك بجمر الذكريات فاشرب
لدغة خطاوى السنين فى القلب كالعقرب
حقك عليه ياريس السحر يا ساهى .. كان قلبى عاشقك وعشقك لهو وتلاهى
وما كانش على بالى حبى ع الرضا تلاوعه . ويوم تطاوعه تصير الآمر الناهى
خدعنى شط العيون فغرقت فى مياهى
الشعر يفرح بطعم الكدب بعض ساعات .. زى الشجر لما يستطعم فى ضله - نبات
كان ياما نفسى أن نده طيفك اغنى معاه .. لكن غرامك يا دوب نطق لسانى ومات
العشق لو كان بحق ما تهزموش وشايات
اليأس بيزيد .. أكيد لما لأمل يكبر .. والحلق زهد العسل من كتر ما مرر
ليه السعادة ساعات ره حسابات البنك .. وكان هنا الروح زمان فى شوقها تتحرر
وليه ألم لاكتئاب بقى باب .. رحيب واخضر
يا حلو قولى لى على طبعك وأنا امشى عليه .. حبيبى حتى أن غفى بالمح واشوف بعنيه
شرط أن يبقى حبيبى وليه .. لى وحدى .. لجلن ما تفضل زهورى متفحة فى ايديه
مادام ملكنى وملكته طب ح نطمع ليه ؟
دقيت بقلبى على باب السما .. ما فتحش .. زعق ملاك من هناك: جاى تعمل ايه يا جحش
ستين سنة صرمحة سايق الهبل شيطنة .. دلوقتى قتلك مرض - والا الغرض ما فحلش؟
اعمى بصيرة امتلك قفة عيون - ما لمحش
رقض الخريف رقصته وكسا الشجر فساتين .. هاج الجمال فى الشوارع كلفت النساوين
وانا الوحيد الأسير رهن المصير الرمادى ... القهر عرى بلادى للبنوك والدين
طبع الجمال الحزين .. يقسى على العاشقين
لبس الشجر توب عرايس مهرجان ألوان .. ظنه بأن الجنان راح يخدع الإنسان
فينسى أن الشتا بالبرد ح يوافى .ز كالح عديم الملاحه يقلب الأحزان
ويعرى توبه البديع .. ويرقصه عريان
لو كان ح يغسل خطايا الأنسانية المطر .. كانت الملايكة تعيش ع الأرض زى الشجر
لكن البشر عمرهم ما بصوا فوق السحاب لأنهم جنس طينه معدومين النظر
مكتوب لكم تكرهوا اللى يحبكم يا غجر
يا ترى الأغانى ح ترجع تانى تتشاقى .. تفتح فى حيط الغباوة للغرام طاقة
وتهز قلبى العجوز الفرحة من تانى .. والا لبكره بشر غير شكل، وجراءة
طول ما الهزيمة فى رقبتى حزه خناقة

يا أيها الطفل العجوز العبقرى .. لسه على مكر الذئاب لحمك طرى
نازل تهبب ايه فى سوق المكلوبين .. لا كنت بياع يا غبى .. ولا مشترى
جاى بعد عمرن يخيبه .. تعمل مفترى
شرقان وباطحن فى قمح الذكرى باسنانى .. على لحم بطنى وبامضغ فرحى احزانى
الماضى بهتان بيهرب منى خوف أمله .. وقلمى غرقان بضعفه بحر نسيانى
وأنا من جنونهم باعانى رعب إنسانى
على قد ما عشقت موسكو كرهتها من القلب .. وف كل شئ تكرهه بتلاقى شئ يتحب
لكنى فى العشق اعمى أراى زى الكره ز. لأنى عبد لعواطفى الهبلة - بنت الكلب
ومع العواطف اكيد كدب المواقف - صعب
مدينة صعبة واصعب منها ابنى .. حبسني فى حبه اللى معذبنى
وكل ما عزت اتملص واتفلفص .. شوقى لحريتى، لخاطره .. يأنبنى
كالعادة استسلم لقله حيلتى تغلبنى
عجزت يا أبو سمرة حتى صرت م الأطفال .. خايفين عليك م السكك حالك بقت غي رحال
لا الشعر يشفع - ولا خبرة سفر وسجون .. فاعقلها وارضى ما احلاها بخلو البال
مش عيبة لو تخضع الشيبة لرأى عيال
حبسنى خرسى وسط ألف لسان .. مع نجمة حمرا مسجونة ما بين صلبان
ونجمة بهتانه خرسا بترتعش فى القلب .. ونبض بيشك قلبى - عشقى للإنسان
عصرنى حلمى بكا فى غير مكان وزمان
اهلت نفسى لمر الدنيا .. ريحنى.. وعمرى ما امنت ليها حين تفرحنى
لذا عشت مالك زمام نفسى بنفسى وحر حتى أم كانت بتغدر بيه تجرحنى
استغنى تبقى غنى ، رأسك ماهوش محنى
معنى الحياة أن تعيشها حى مش بطال ... أن تحتمل ما يصيب النفس من أحوال ياللى انت ساجن طيور روحك ومتأتت .. ح يضربوك بالقديمة .. يوم ما راح تنشال
هيه الطبيعة كده .. لك ضل .. إلا خيال؟
ضعيت عمرك هبل تهرب من النسوان .. لا عجز كان .. لا خبل .. لا زهد لا نسيان
لكن ضمير ابتزازى شل إحساسك حبسك فى سجن الشرف وعمل عليك سجان
ولا يقتل القلب قد الكدب والحرمان
قلمك رسم يا فؤاد صورة الوطن ألوان .. نغمها بهجت ، بريشته بأبدع الألحان
مين اللى قال .. إن إنسان الفرح بيموت .. وانت على ميعادكو ويانا سحور رمضان
قود دب رجلك مكان ما تحب يا إنسان
الشعر زى المرة ح تحايله . ح يعاندك .. وإذا نكرته يجوز يرضى يصون عهدك
ويلوعك ما بين ده .. وما بين ده ... وإذا توافقتوا تلاقيه يا دوبها بيهاودك
لكن إذا العشق مسك يشعلل جمرته ف خدك
عجبنى يا يوم أربعة يا غريب فى تاسع شهر .. كم شفت منك ومن شهرك سقيتنى القهر
إلا فى ليل الهزيمة فاجئتنى بفرحة ... رغم انكسارى ف يونية، قيمت بيها الضهر
هديتنى ابنى اللى علشانه واجهت الدهر
بيلبدو لى فى الدرة لو أنام يشخبطوا لى ... تختة الأيام
أنا يا للى عشت بقسمتى راضى .. باشبط بقلبى ف رقبة الأحلام
واخاف اعدى البحر … أنا العوام
قالوا حياتك قفه .. لها ودنين .. لذا ضرورى سوا لازم يشيلها اتنين
لفعتها وانتى - على قلبى هموم وحمول اتارينى مكتوب لى تغرق خطوتى ف شبرين
لولا أن عشقك غوانى عشتها - عمرين
بها جيجو دب الخط فى قلب العدا .. دبه .. من أجل يعرف شهيدنا قد ايه بنحبه
عمك فؤاد حين سمعها اتكلمت بالعربى .. بلسان فصيح ضمها كالطفلة فى قلبه
والأصل فى الفن، فنان روحه من شعبه
لا أب فرحان ساعة ابنه ما يجبى سعيد ! وبا ابن مهموم بيسأل عن قريب وبعيد
الشعر صابه الهبل أصبح زجل باهت .. حتى الأديب قلبه ما بيسهق لجرح جديد
ما باقى غيران تستوحش غريب ووحيد
أنا كنت تايه فى ليل العتمة من بدرى .. حوط ضياك قلبى عوضنى طويل صبرى
أصبح خليلى فى زمن عادم امان وعويل .. يا دوبها وهلة وكأنه دليلى من صغرىز
ليه يا بخيل - يا قمر - طالع لى كده وخرى
باينه مصروف لنا يا مصر قفه حزن .. نشيلها مع بعض نفردها بوسع الجرن
أنا انقطع نفى وانتى اللى انقطع خلفك .. البخث حدفك على قلبى خدك بالحضن
مع انى بالغن مرار حبك يا ست الحسن
أنا كنت ماشى لوحدى فى شوارع مصر عبرت باب الفتوح وزرت باب النصر
طبلة فؤاد زققت قلبى بنغم رمضان .. زعم رفعت روانى بعطر ماء الزهر
طيفهم سوا هز قلبى وراح يصلى الفجر

قاعد بتشرب بيرة تتفرج على النسوان .. حين تفتكر تترعب وتخاف من النسيان
لحظة يوافى الفرح .. تقلب عليك المواجع .. وكأنما جبلتك - من طينة الأحزان
حلمك على الدنيا وانسى عشان تكون إنسان
عيشتى يا نجلاء عيوب جوزك تداديها .. كم شيلتى ياما وداريتى .. من خوافيها
لكن مراود الفرح انت جبال الحزن .. والحب وهبك شموع ضوت لياليها
يوسف و ليلى و لينا .. الدنيا وما فيها
ملعون يا داء العشق حزن ومسرة .. عصرت قلبى وخفيت منها ميت مرة
قلبت ليه جمرتك تكوينى .. يا مجنون ... وأنا قلبى عمره ما كانش من برة
فرحان بذكرى زمان .. والرعب جاى بكره
محلاك يا صوتها العفى حين يحتيى التلفون .. لما الألووه ترسمك ميت شفه يا مجنون
الكلمة تصبح ايدين والحرف جمرة نار .. والكون يزهره فى حسك ألف نبرة ولون
سبحانه جعل الودان بير .. بالجنان مسكون
سن القلم زى شعر الريشة سيف وحصان .. والرسم والشعر فتحوا السكة للإنسان
ولا كل من نظم الكلام .. رسيم .. ولا كل شاعر ينطق خلطة الألوان
إلا فؤاد حين تجلى بعشقه للأوطان
شدى حبال المرارة وافقعى الفقافيق . اجترى عيش يأسك المر اللى كله دقيق
الغيه فى الجايه مش أكثر من الرايح .. والغل طارح بلح ، عمره ما بل الريق
جنيه العجز زارعه الخوف فى كل طريق
قلبى اللى مات من زمان خايف يعود للحياة ... وكأنه فى صحرا قفر ماداقش طعم المياه
إلا فى حمله يخابله من بعيد النيل .. وفجأة حاصره بفيضه فزلزله بلقياه
أخلاقى من بختى فى أرابيزها راميانى .. تعزف بضوافرها خوف عى دف حرمانى
يحاصرنى يكسر فؤادى الغل والشياطين ... لا يوافق الطبع .. ولا نفسى مطاوعانى
أنا اللى قاتلنى جوعى، للمسة نسوانى
قلبك بيهجر قفص شعرك وراء الشمس .. زى اللى هربان لبكره من جراح الأمس
مطلوق ورا حلم مش قدك ولا ف طوقك عرفت سره ف بؤونة شربت مره ف بشنس
وخرست ... والعمر شدوك لا يطيق الهمس
هزم السحاب القمر واسودت الدنيا .. همد الوجود واكتأب وارتد فى ثانية
الخلق دول شهداء والخلق دول قتالين .. عجزت أفرق بين الهدامة والبانية
مزعنى يأس البشر بين لحظة والتانية
امك قليلة تجربة .. وابوك على قده.. كانت بسيطة قوى وستتها سى عبده
على مد ايدها حياتها .. تطولها وتناول .. امتى الحياة ضيعت راضى بما عنده
كفاية يشبع عفافه .. والحلال سعده
كان لى زمان فى هجير الصحرا ضليلة .. أنا فى ضله كأنى ف قاعة العيلة
علمنى ياما وغنيته لأهل الريف .. ضيعنى فى الصيف وفاتنى عاجز الحيلة
معلون أبوها السياسة ملوك وترحيلة
يمكن كون فيه بلاد احلا وبلاد أكبر .. يمكن تكونى وطن على قده .. ومتكدر
نهشوك وهزموك ونهبوا بالحرام خيرك .. لكن ما فيش غيرك انتى .. عليه متجبر
مريض أنا بيكى .. موتى فيكى .. متقدر
يا أهل الغرام دبرونى فى غزال ينحب .. وهو مثل الرياح شارد ما عندوش قلب
اسرتنى نظرة عيونه منذ طل على .. أتاريه ما شافنيش وحنا من دمايا الكعب
والشكوى ذلة سواء للعبد أو للرب
عصر والى رمان حياتهم قوت وأنا صغير .. وم الضلال بخرونى بحلال المسك والعنبر
خطفنى منهم زمان العيب .. وغربنى .. لو عزت افرح بهم .. بهمومهم اتكدر
ليه يا زمان اختلفت.. وجبنى ما اتغير
فى الذكريات القديمة ضمان بعمر جديد .. يا معفى من مرها وجنانها ... قلبك حديد
الشخص منا جراح عشق وبيوت وبشر .. غيطان واحزان وموت ..أو هو زلطة أكيد
فرق البشر م الحجر فى الحزن بالتأكيد
عافقنى ليه من رقبتى يا هاتف الماضى ... سلمت قلبى لشبك وعدك وانا راضى
يئست مليت على ضيك أشوف بكره .. حررنى من عفقك .. يا نبع امراضى
الليلة شق القمر على مهله فى قلبى .. زعلان فقلب عليه علتى وذنبى
مع انه كان فى الصبا عليه له شنشان . فى السجن عشق وحنان ينزل ينام جنبى
ضيقت ليه الخلا فى عيونى يا صاحبى
الشمس غابت وكان بدرى عليها تنام ... لم النهار فرشها امه اتشنق على حبل وهم السلام
والموعودين فى سلامها قبولهم الأرحام
بتشحت الشمس وانت الشمس غيطانك .. فقدت فين يا قليل البخت ميزانك
طمع اللى خانك فى ضعفك عكر الأحلام .. افقر بسم الكلام والشك وجدانك
لكن نبيل الألم مرهون بأحزانك
النيل خنق خيل الميه ح يموت لو فاض .. ملك شطوطه الحرامية وصحاب لأغراض
ندمان على حسن النية عطشان للخير .. كل التحاليل سلبية غير فى الأمراض
يا خوفى من شيبه ح تكشف كل الأعراض
طول ما انت عايش ما بين الناس وناس حواليك .. ح تحس للشعر معنى .. وفايدة للشبابيك
لكن كتير تبقى ميت وانت مش دارى .. هارى الحوارى غنا ولا حد حاسس بيك
لكن فى كل الحالات سر الحياة فى ايديك
أنا كل ما اقرأ كتاب اكتشف جهلى .. تصعب على سنين فاتت على البهلى
لخمتنى فيها توافه كدبه ما صدقتش .. ما دريتش مكروش عليها والا ده مهلى
خسرت املى ولا عشتش عيشة أهلى

مش عيب عليك يا قمر تسرق ضياك م الشمس .. وكل دول عاشقين ليك فى العلن والهمس
ايه اللى يجبر نبيل القلب .. يتحايل .. وعمره خايل بيتخايل .. عزيز النفس
والا دا شرع الحياة .. واحنا بنقرا ف عبس ؟
بنيت لى زنزانة فيلا دورين بتراسينه .. شرح هواها ترد الروح لها جنينة
وعملت سجان على نفسى - أولعها .. اتاريه ما هوش بره منا السجن شئ فينا
يا ويله فنان فى دنيا دنية وسجينة
فى بطن كفى يادوبك وردتك بتنام .. ويحط على سطح صدرى يرف جوز اليمام
يصحى زمانى اللى كان اجدب وبور وخريف .. كما ريف فى رخ المطر بتجدده الأحلام
يحفظ لبعشقك جمايل فضله ع الأيام
أهو انت ما سهرتش - لكن تعبان .. وعامل لى فيها تمللى واد جدع فنان
بتندمج .. تنهمك .. محموق ما قصرتش .. وخفت ما عشقتش، ازاى تكون انسان؟
عشق الصبايا غواية .. بدون مكان وزمان
أى اسم قديم يشهيك فى الكلام .. دوغرى ترغى كما الفقى ناقص علام
لو محيط م الحبر فى الصحرا ورميته .. وان لقيته - يضيع حلاله فى الحرام
زى مية غسل شهداء الغرام
يا برح ليه حزنان .. وكنت سعيد شايفك كئيب سرحان ببالك بعيد
لك حق .. صبح البشر يا بحر مش همه .. وحتى شط الوطن صار يخلف المواعيد
طب ذنبه ايه قلبى كان شايفك يوماتى جديد
باحلم بجوهر من وهج بنور .. حر الإرادة خفى ف غيم القدر مستور
لا تنظره عين ولا يصعد عتب عرشه .. سوى قلب عاشق فى قلكه المستحيل بيدور
من ليل غيام وحدته، يهديه لنبع النور
عن الثقافة وأيامهــــا
مكروش نفس م القلق روحك ما هيش آمنة النفس وارمة وطمعت فى السما التامنه
حل المشيب يا جدع راعى شعور ناسك رأسك خرب يوم مداسك ما دهس (يامنة
والقبر مش راح يشيل دينارات ولا سمنه
بقر فى هيئة بشر .. وحمير أفندية ... ساقوا الهبل فى السياسة قضية بقضية
على الشاشات يحلفوا أن الحكاية بجد .. ولا حد على باله أن الغلطة .. فنيه!
مفتى بدبورة على جندرمة حرامية
كدبتوا وسرقتوا عشتوا عوالة ع التنظيم وحسبتو تمن الكفن للثورة بالمليم
بعتوا الشباب البرئ تاجرتوا فى جراحة وكنتو أظلم من الظلمة على المظاليم
ويوم الهزيمة لهفتوا نصيبكو فى التقسيم
نهار وليل يرغى فى اللى صدفة قرا عنه ويفتى فى اللى تيسر له وضاع منه
دماغه هوجة زحام ضجة كلام وحروف .. حارماه يشوف جهله أو يفهم هبل سنه
أو يكتشف ذل فنه يوم خلف ظنه
خليك مع الإنسانية احذر من الفكرة .. واياك تقسمها جهل تحب .. يا تكره
قلب البشر كالشجر بتخضره الأحاسيس .. وحده الخسيس اللى قلبه بقفل وبأكره
ياخد المبادئ ركوبه تاكسى بالأجرة
وجوه كئيبة لناس فى الأصل ما تساوى عديم ذمة .. ومستعمل .. ومتقاوى
ضحكوا فى وشك وياما قالوا كدب عليك .. ولعبوا بيك فوق حبال العسكرى الحاوى
خايفين جنونك وانت فى الهبل هاوى
غرورك مسمم شجر كلمتك .. بيخلى الساحات من حضور حضرتك
وفى الشعر ما فيش كبير أو كتير .. فحاول تدوق يا أمير ملحتك
وخاف ينسوا بكره صدى لهجتك
للمرة ألف حساباتك جت غلط يا سمير .. ماتت القرى وانقضر ريفك وردموا البير
ومازلت عايش علىأوهام خيال ميت .. العولمة ملكت رقب الشعوب مآمير

الشمروخ 12

الشمروخ 12

الشمروخ 12 :: تعاليق