قصائد للشاعر سمير عبد الباقى مكتوبه

شعر / سمير عبد الباقي
فوانيس الأراجوز التعيس فى ليل المد والتوريث
* إنت النموذج ، وإحنا كلنا أشباه
لو شئت إنت نبى ملهم. أنت نص إله
قول ما بدالك واعمل ما بدا لابنك
نعيم رضاك ح يكفينا ما موتى ـ حياه
الكل دبحاه هزيمته بيبكى على ليلاه!!.

* كم للزعامات حسابات على حسب الشعوب تلاكيك
تسوق عوج رأيها لوجع القلوب تماحيك
كان لك منين كل ده وزرعك شجر عاقر
وكل عامر خربته ونفضت منه إيديك
كابس نفسنا.. هتفنا بدمنا نفديك!!

* سماحة ملك شعب مصر العزيز مطرطق ودانك لروما وباريز
عشانهم بتعزف همومنا نعم
يطول حبال اصطبارنا اللذيذ...

رئيس التجمع ، رئيسة الأهالي ، رئيس مصر ، حــــــــــــيوا الثلاثي الكسيح

خيالات ماَته علي غيــــــــــــطان خضوعنا لحكم الجهالة المذل القبيح

كتابة علي الحيطان تاريخنا إلي سلٌم مصيـــــرنا لغيرنا

ونفق مالوش بكره حتى تعشمنا شمسه إذا ما برق في خيالنا شفق

لكن لـــيل مغـــوٌل ، ليلاتي مطـــولٌ ، يحول وجـــودنا لوهم وسراب

مدام ربها فـوق دفوفها يطـــبل ، يرتب صفوفها وراء الغراب

فيا من بلاك القدر أن تشوفهم وهمٌه بياكـــــــــــــلوا كـــما الدود تاريخك

عـــليك العـــــــوض في بواقي طبيـــــخك لأن الخــــيانة لبنها مريح

يامصر .. شعر سمير عبد الباقى لحن وغناء ســيد مكـــاوى
يا مصر حضنى فردته ع الغيطان شالها
و دراعى لما نطرته حطها و شالها
و قطعت حر الجبل نجم السما لحافى
و مشيت طريق الشقا ع الشوك عليل حافى
لا طلعت يوم نخلتى
و لا زرت صفصافى
لكن عشان بسمتك
يا بلدنا نشقالك