الخوف

الخوف راجع يتمطىّ ويتمطع فى شوارع مصر
بيزعق من بر الجيزة للقلعة
ومن شبرا الخيمة يفزّ يفزع فى مدينة نصر
راكب عربيات ليها خرابيش
لابس بدل الخفافيش
يعصر قلب الضعفا الهمّل والحرافيش
يرعش ويزلزل كل اللى مافيش
من أنفار اليومية وطلب الخيش
يقطع حيل اللى بيلهدوا ورا فرافيت العيش
بيمد درعته وضلوعه سواتر
يتدارى فيها – ويرمح يفرح فى ضلّه الحرامية
مش هجامين ولا نشالين ولا خرتيّه
لأه .. يا كاركى يا سليم النيّة
قصدى البهوَات ولأفندية
أمات جارفيتات وياقات مكوّية
البشوات اللى نهبوها صكوك وبنوك
وهبوها لجرذان الصحرا
ورهنوها لخواجات الجات بورصة وشيكات
بعد ما زرعوها شتوى وصيفى ونيلى
هالوك وصوبات وشكوك ..
فرشوها حصيرة على عتب القصر
لجل يدوسها الخاطى والواطى
وابو ذمة وسيعة مطاطى..
والمتخفى ورا دقن مخاطى
و الا سارينة ظباطى
بتجمع أشباحهم ترجع فى صمت مريب
وبصبر عجيب
فى ايقاع مترتب و غريب
ترطن وتبرطم بلغات العصر
تطبع صور الشهدا الشبان
اعلان مجانى لأنابيب معجون لاسنان
ترسم وتنغم شعارات الميدان
ع الشبكات المدعومة والملغومة الكدابة
وع المناديل الفوط الكلينيكس الألوان
وتعيد رسم خريطة الأوطان ..
باللون والجنس وعصبيات الأديان
على قد مقاس أمن الدولة..
وحسب الإمكان
ينسى العمال اللى حطــّمهم
ويتحامى الفنانين فى أحضان اللى معطنّهم
والفلاحين فى الدلتا يتشكروا فضل اللى سرطنهم
يتنكر أولاد النوبة ومطروح
وصعايدة قبلى ومشايخ سينا لأوطانهم
وشباب الثورة يتلهوا فى رطانهم..
يتفّرقوا على حسب وداد اللى فطمهم
تشتى سماوات الخوف ع الأرض
شرايط وكابات ونجوم – دولارات وهموم..
من بر الجيزة لشبرا بخوم..
م القلعة لمدينة نصر
نضطر احـنا ياللى حلمنا معاهم بالثورة ذات يوم
ومعاهم ذات صبحية اتنشقنا الحرية
دقينا ابواب العصر بأحلام العدل السلمية
نرجع- وبكل وقاحة باسم الوطنية
وعلى موجة جهالات العصر
نفرش مصر بكل جمالها ومالها وعيالها..
سجادة على عتب القصر

الخوف

الخوف

الخوف :: تعاليق